LUKAS 16 - Bible en langue Bulu

Mbia mbaʼale akum

¹ Yésus a nga jô fe beyéʼé bé na: Nkukume môt éziñ ô nga bili mbaʼale akum, a be nga kate nye na môt ate a miase nye akume dé.

² A nga loone nye a jô nye na: Za jame ma wôk be kobôʼô ajô dôé? Boʼo sitoʼo ya mbaʼalan akume wôé, amu ô se nguleya beta bo mbaʼale akume wom.

³ Mbaʼale akum a nga jô émiene na: Ma ye bo aya, amu masa wom a vaa ma mbaʼalane ya akume dé? Ye ke faʼa si? Me nji bi nguleya bo nalé. Ye ke ma bo zak? Ma wôʼô nalé ôson.

⁴ Ma yem e jam ma ye bo, nalé ate e ba ba ye nyoñe ma e menda map éyoñe ba ye vaa ma e mbaʼalan akume wom ba ye yené.

⁵ Ajô te a nga loone môt ase ya bebii memvôla be masa wé a jô nyô ôsu na: Ô bili masa wom tañeya?

⁶ A nga yalane na: Lita mbon toyini élaa a mintete misaman. A a nga jô nye na: nyoñe afebe mvôla dôé, jikaʼa tabe si, tiliʼi na: toyini a mintete muam.

⁷ A nga jô mfe na: Wo ki ô bili tañeya? A nga yalane na: Belita be fôn toyini mewôm melaa a ésaman. A a nga jô nye na: nyoñe afebe mvôla dôé a tiliʼi na: lita fôn 2880.

⁸ Ane masa a nga seʼe ékotekote mbaʼale akum ate amu a nga bo ane môt a ne ntyee. Amu bone ya si nyô ba dañe yeme tabe ntyee e mfaʼa bôte baa be be be ne avale da, e jame e ne ayaé e be bone yʼéfufup be be.

⁹ A ma ma jô mia na: latane memvôé a akum da so ékotekote mboon, nalé ba ye nyoñe mia e be tabernakel be too nnôm éto, éyoñ akume te da ye jembane mia.

¹⁰ Nyô a ne zôsôô e biôme bi ne tyôtyoé, a ne fe zôsôô e biôme bi ne anen, a nyô a ne ékotekot a tyôtyoé biôm, a ne fe ékotekot a biôme bi ne anen.

¹¹ Ajô te ñhe nge mi nga bo te yené zôsôô akum e nji yian été, za a ye ve mia benya be biôm?

¹² A nge mi nga bo te yené zôsôô e biôme bi ne bi bi môte mfe, za a ye ve mia biôme bi ne émbiôé?

¹³ Teke mbo ésaé éziñ a ne saane bemasa bebaé. Amu naa a ye vini wua a nyeʼe nyô mbok, nge na a ye kabetane wua a biasé nyô mbok. Mi se nguleya saane Zambe a Akum.

¹⁴ Befarizieñ, e mbe be mbe be nyekeʼe moné, be mbe be vôʼôlôʼô mam mete mese, be nga woé Yésus.

¹⁵ A nga jô be na: Mia mi ne e ba ba liti bebiene na be ne zôsôô e mise me bôt, ve Zambe a yeme minleme mienan; amu jam e ne beta jam e be bôt é ne mbia jôme be Zambe.

¹⁶ Azukui be Yôanes, éyoñ é mbe ji metiñ a bekulu mejô; ataté éyoñe te, éjôé Zambe ja kateban ane mbamba foé, a môt ase a belan éngôngôt asu ya nyiin été.

¹⁷ Da dañe tyiʼibi na yôp a si bi lôt, a lôte na e nten ékanga wua ya metiñ ô kôlô.

¹⁸ Nyô ase a suu minga wé a luʼu mfe, a bo mejian , a nyô ase a luʼu minga nnôm a te suu a bo mejian .

Nkukume môt baa Lazar

¹⁹ E nkukume môt éziñ ô nga too a beʼe bitôtoʼo mengômesan, môs ôse ve sandé ényiñ a mimvôman.

²⁰ Engôngole môt, mefôle nyôl ne nyaññ, jôé na Lazar, a nga bôô e mbé ya akaʼa dé;

²¹ a mbe a kômbôʼô di afufus e mbe e kpwaʼak e tawôlô nkukume si. Ve bemvu be mbe be zaʼa nyiane meveñe mé.

²² Engôngole môt é nga wu a beéngele be nga beʼe nye a kee nye e tôé Abraham. E nkukume fe ô nga wu a jambane soñ.

²³ Etabaʼa miñwuan, a nga bete mis; a éndeñelaʼa été, a nga yen Abraham ôyap, Lazar a yeʼe nye tôé.

²⁴ A nga yône na: A ésaa wom Abraham, koo ma éngôngo, a lômôk Lazar na a dube sôsoʼo ônyu jé mendim a ve ma ôyem évôvoé; amu ma wôʼô mintaé e nkabaʼa nduane wuna été.

²⁵ Abraham a nga yalane na: A mone wom, simesaʼane na ô nga bi akum éyoñ yʼényiñe jôé, a na mfaʼa Lazar, a nga tôbane minjuk, éyoñe ji a volebaneya nleme va, ve wo wo wôʼô mintaé.

²⁶ E mam mete mese yôp, beta yee a ne e zañe jangan a mia, nalé ate e ba be ne kômbô kôlô vana a zu be mia be bo te nguleya bo de, be bo fe te nguleya kôlô mi ne wé a zu be bia.

²⁷ E nkukum wô na: A ésaa wom, ma sili ñhe wo na ô lôme Lazar e ndaa ésaa wom;

²⁸ amu me bili bobenyañe betan. A kee be jam a yem, be fe be za zui e vôma éndeñelaʼa nyô.

²⁹ Abraham nye na: Be bili Môze a bekulu mejô, be tame wôʼô be.

³⁰ A nga yalane na: Momo, a ésaa wom Abraham, ve nge môt éziñ a so miñwuan a zu be be, ba ye kôñelane minlem.

³¹ Abraham a nga yalane nye na: nge ba bo te wôʼô Môze a bekulu mejô, ba ye bo te kañese, jaʼane môt a wômô a soʼo miñwuan.