LUKAS 13 - Bible en langue Bulu

Nloon asu nkôñelane minlem Nkana nkôkôme figié

¹ Melu mete, bôte bʼéziñ be nga zu kañete nye e jam e nga kui e be bôte ya Galilé e mbe bete Pilat a nga bundane metyi map a ma bityiʼa biap.

² A nga yalane be na: Ye mia simesane na bôte ya Galilé bete be mbe beta bebo abé a dañe ba bevoʼo bese amu be nga tôbane mintaé avale te?

³ Ma jô mia na momo. Ve nge mi nji kôñelane minlem, mia ye fe jañe bese avale te.

⁴ Nge na e bôte awôm a muam e nkume ya Siloé ô nga ku yôp a wôé, ye mia bumi na be mbe be bili mekua a dañe bôte bevoʼo bese be too Yérusalém?

⁵ Ma jô mia na momo. Ve nge mia bo teke kôñelane minlem, mia ye jañe bese avale te ebien.

⁶ A nga kane fe e nkana wu: môt éziñ a nga bili élé figié mbéan afube mindiʼi dé été. A nga zu jeñe bibuma yʼété ve teke koone jôm.

⁷ E nde a nga jô mbaʼale afube mindiʼi na: tame yen, den a ntoo mimbu milaa, me zaʼa jeñ bibuma bi figié nyô, ve teke koone jôm. Bakéʼé je; amu jé ja di si e zesé?

⁸ Mbaʼale afube mindik a nga yalane na: A Masa, betaʼa jôé je e mbu wu; ataté éyoñe ji a kui éyoñe te, ma ye faʼa je mbômaʼan a kut akun été.

⁹ Melu ma zu éko éziñe na ja ye wume bibuma; nalé momo, wo ye baʼé je.

Ñyeyeme minga wo saéban

¹⁰ Yésus a yeʼeleʼe e da ya meba me Zambe e môse Sabat,

¹¹ minga éziñe mbia nsisim ô nga veñesane ñyeyem den mimbu awôm a muam a mbe valé; a mbe kukuu teke foʼo nguleya tebe.

¹² Yésus a nga yene nye a nga kobô nye a jô nye na: A minga, ô kôtébaneya mfaʼa ya éyeme jôé.

¹³ A nga beté nye mo. Awolo te a nga tebe a kañe Zambe.

¹⁴ Ve évete ya aba Zambe é nga yene nalé abé na Yésus a nga saé môt e môse Sabat, nye jama bôte na: mimôse ya saé mi ne misaman, zaʼane ñhe saéban mimôse mite saa e môse sabat . Nti a nga yalane nye na:

¹⁵ A bôte bebaduʼu, ye môt ase ya be mia, e môse sabat , a nji tii e nyaʼa jé nge éjakase jé na a ke nyuu je mendim?

¹⁶ Ye e nji yiane na minga nyô, ngon Abraham, e nje Satan a biya nkaʼan den a ntoo mimbu awôm a muam, be tii nye, ngataʼa éte e môse Sabat?

¹⁷ Eyoñ a mbe a kobôʼô nalé, besiñe bé bese be mbe njalan a meyat, a jama bôt a nga vak amu bitôtoʼo bi mam bise a mbe a boʼok.

Minkana ajô fes ôndôndôô a mvusu

¹⁸ A nga beta jô na: éjôé Zambe ja funane jé, a ma ye veʼane je a jé?

¹⁹ Ja funane fes ôndôndôô, e nje môt a nga nyoñ a wua je afube dé été; ja faa a bo élé, a anone ya yôp da tabe je mintyaé.

²⁰ A nga beta jô na: Ma ye veʼan éjôé ya yôp a jé?

²¹ Ja funane mvusu e nye minga a nga nyoñ a futi nye avut mveʼan ôvek biyoñ bilaa a kui na ébañ é vus.

Ofanefane mbé

²² Yésus a mbe a tyiʼilaʼane bitison a minlam, a a mbe a yeʼeleʼe a kelek e mfaʼa ya Yérusalém.

²³ Môt éziñ a nga jô nye na: A Nti, ye ve bôte tyôtyoé e mbe da ye yen ényiñ? A nga yalane be na:

²⁴ Vaʼane ngule ya nyiin ôfanefane mbé . Amu ma jô mia de na: ézuk ja ye jeñe na é nyiin, ve teke ngul.

²⁵ Eyoñe mie ndaa a kôlôya si a a feteya mbé a na, éyoñ mi liʼiya atan, mia ye taté na mia kute mbé a jô na: A Nti! Diʼi bia e mbé ! A ye yalane mia na: Mi ne bôte ya vé?

²⁶ Eyoñe te mia ye taté na mia jô na: Bi nga di a nyu ôsu viôé, a ô nga yeʼele e minjoñe miangan.

²⁷ A a ye yalane mia a jô na: Kelane ma ôyap, mia bese mia bo ékotekot.

²⁸ Minyôn a nlatane mesôñ bia ye bobane valé, éyoñe mia ye yen Abraham, Izak, Yakob a bekulu mejô bese éjôé Zambe, a éyoñe mia ye wuaban atan.

²⁹ Bôte ba ye so e jôbe da tôô a e jôbe da dim, akôé a e nké; a ba ye tabe tawôlô éjôé Zambe.

³⁰ A tama yenan: e ba be tele mvus, ba ye tebe ôsu a ba be tele ôsu, ba ye tebe mvus.

Yésus a ke e Yérusalém

³¹ Eyoñe te Befarizieñ bʼéziñ be nga zu jô nye na: Kelek, kôlôʼô va, amu Hérôde a kômbô wôé wo.

³² A nga jô be na: Kela jôan nkemvaʼa te na: ô lôô ma vaa mimbia minsisim a ma saé bôt den a akiti; a e môse lale wo ye bo wu e mmanan ésaé.

³³ Ve ma yiane wulu den, a akiti a e môse wo tôñe valé; amu e nji yiane na nkulu mejô a wu e Yérusalém atan.

³⁴ Yérusalém, Yérusalém, wo wôé bekulu mejô a lume ba ba lômbane mekok , abime biyoñ avé me nga kômbô kôane bone bôé, ane nyia kup a kôan e mefabe mé si e metyi a bôʼô yôp, ve mi nji ke kômbô nalé.

³⁵ Tame yenan, e nda jenan ja ye liʼi mia bilik; ve ma jô mia de na, mia ye bo te beta yen ma akekui mi jôya na: Ebotan é boʼo be nyô a zu a jôé Nti!