LEVITIK 9 - Bible en langue Bulu

Aron a bone bé ba taté mvean metunaʼa

¹ E môse muame, Môze a nga loone Aron ba be bon a bemvendé yʼIsraél.

² Nde a nga jô Arone na: Nyoñʼétoñe nyak ane étyiʼa ya njaman , a nnôme ntômba asu étyiʼa ja diʼibane ngumba, nyôna a nyô mbok be too mvoʼé ne selem, éyoñe te wo ye liti bie asu Nti.

³ Wo ye kobô bone bʼIsraél na: Nyôñane nnôm ékela asu metunaʼa ya njaman , étoñe nyak a étoñe ntômba bi ntoo mbu wua, mvoʼé ne selem, asu étyiʼa ja diʼibane ngumba.

⁴ Nyaʼa jia a nnôme ntômba wua asu metunaʼa ya nlatane ngbwa, nalé mia ye ve bie metunaʼa asu Nti, ô laté fe mveane ya mefup ô too mfuʼan a mbon. Amu Nti a ye yené be mia den.

⁵ Nde be nga zuu biôme Môze a nga bendé ôsu ya nda éndelé bendôbaʼan. Ane bôte bese be nga subu bebé a tebe tetele asu Nti.

⁶ Eyoñe te Môze a nga jô na: Jame Nti a nga bendé nde di, boʼone de, éyoñe te étôtoʼo Nti ja ye yené be mia.

⁷ Ane a nga jô Arone na: Subuʼu bebé ataʼa metunaʼa, vaʼa metunaʼa môé ya njaman a étyiʼa jôé ja diʼibane ngumba, boʼo mame ya njaman asu dôé a ékôane bôt; vaʼa fe mveane ya ngum ayoñ bôt ôse a bo mame ya njaman asu dab avale Nti a nga bendé.

⁸ Ane Aron a nga subu bebé ataʼa metunaʼa a tyiʼi étoñe nyaʼa tyiñ asu abé dé émien.

⁹ Wôna bone bé be nga kalane nye metyi, ane a nga dubʼônyu été a woʼo me e minlaʼa mi ataʼa metunaʼa; metyi me nga buk, a nga sôé me e tin ataʼa metunaʼa si.

¹⁰ A nga diʼi avoñ, mimbañ mi ôtam, ndalebôbô é yale éseʼe étyiʼa ya njaman abé, bise ataʼa metunaʼa yôp, avale Nti a nga bendé Môze.

¹¹ Ve a nga diʼi minsôn a ékôp e nduan e minkan atan.

¹² A nga tyiʼi étyiʼa tyiñ asu mvean wo diʼibane ngumba; wôna bone bʼAron be nga kalane nye metyi, nde a nga sôé me mbômaʼan ataʼa metunaʼa.

¹³ Be nga kalane nye étyiʼa mvean wo diʼibane ngumba, é too mbaane mefus, nlô ô too fe été: a nga diʼi bie ataʼa metunaʼa yôp.

¹⁴ A nga sôbe miñya a mimbiaé, a diʼi bie ataʼa metunaʼa bi bete mvean wo diʼibane ngumba yôp.

¹⁵ Wôna a nga ve mveane ya ngum ayoñ bôt ôse. A nga nyoñ nnôm ékela é nga veban asu njaman abé ya bôt, a tyiʼi nye tyiñ a ve nye asu njaman abé, avale fe ane étyiʼa ôsu.

¹⁶ A nga ve mvean wo vebane ngumba aval ane ñyeʼelan ô né.

¹⁷ A nga liti mvean avut a jalé wô e wo wé, éyoñe te a nga diʼi wô ataʼa metunaʼa ô too jôm ja bebe e mvean wo diʼibane ngumba yôp.

¹⁸ A nga tyiʼi nnôme nyak a nnôme ntômba, bi bo metunaʼa ya nlatane ngbwa asu bôt. Bone bé be nga kalane nye metyi, ane a nga sôé me mbômaʼan ataʼa metunaʼa,

¹⁹ nalé fe mevoñe me nnôme ntômba; be nga kalane fe nye njem, a avoñ e yale miñya , mimbañ mi ôtam a ndalebôbô yʼések be nga vaa be nnôme ntômba;

²⁰ nde be nga beté mevoñ mete angône yôp, be nga diʼi me ataʼa metunaʼa yôp.

²¹ Aron a nga bo jam da liti nkalan ôngôn a éname ya mbo nnôm e be Nti, avale Môze a nga bendé.

²² Eyoñe te Aron a nga same mo mé e vôme bôt be nga tele a botane be. Wôna a nga sise si éyoñe te a maneya bo mimveane ya njaman , mi mia diʼibane ngumba a mimveane ya nlatane ngbwa.

²³ Môze ba Aron be nga nyiin e nda éndelé bendôbaʼan. Eyoñ be nga kui atan, be nga botane bôt.

²⁴ Nde nduan é nga so ôsu be Nti a mane diʼi mvean wo diʼibane ngumba a avoñ ya metunaʼa ataʼa metunaʼa yôp. Bôte bese be nga yene jame te: be nga bete metyiñe yôp a mevak, be nga ku si bubutu.