LEVITIK 24 - Bible en langue Bulu

Nkôman ébeʼe belambe a minnoñ mi belet

¹ Ane Nti a nga kobô Môze a jô na:

² Bendéʼé bone bʼIsraél na be zuu wo mbon ôlive a ne ntyaʼan ô too mfuban abui asu ébeʼe belambe, nalé belambe ba ye yôñ éyoñ ése.

³ Aron a ye telé ébeʼe belambe e nda éndelé bendôbaʼan, asu éndelé ja solé éwolo yʼélat; belambe ba ye yôñ ataté mamengôʼé a kui mametyé ôsu viam. Atiñe ya éyoñ ése nde le asu miaé mienan mise.

⁴ Aron a ye telé belambe ôsu viam, ébeʼe belambe é ne nkôman a nya or yôp, nalé ba ye yôñ melu mese.

Belet mimvean

⁵ Ane Nti a nga jô Môze na: Nyoñe nteʼan avut a yame belet é ne njiñelete awôm a ébaé, jia ése yʼété é too kili ésaman.

⁶ Wo ye bôé je minnoñ mibaé ôsu viam, e tawôlô nya or yôp, nnoñ ôse belet ésaman.

⁷ E nnoñe belet ôse yôp, wo ye bôé bifuse meyemete mʼélé ma nyume mvaé a diʼi bie éjiane belet bi bo jôme ya simesan ba diʼi nduan ôsu Nti.

⁸ E môse sabat ôse, ba ye bôé mevale me belet mete ôsu viam, a bone bʼIsraél be ne ntindan ya bo nalé éyoñ ése.

⁹ Belet éte ja ye bo nyô Aron a bone bé ba ye di e vôm a ne étyi, amu ja ye bo be e mvean ô nʼétua étyi ézezañe mimveane mia diʼibane nduan ôsu Nti. Ngab éte é nʼénjab éyoñ ése.

Fonos amu mbiasane Zambe a mintéane mié

¹⁰ Môs éziñ ntañete ô nga boban e minkan e zañe môte yʼIsraél a mona môte yʼEjipte a nga biaé baa ngon yʼIsraél jôé na Kelômit, ngone Dibri ya ayoñe Dan, a nye a nga zu tabe Israél.

¹¹ E mone ngone yʼIsraél nyô a nga kobô jôé Zambe ébiasé a yoʼé de. Nde be nga zuu nye be Môze.

¹² Be nga kee nye e vôm ba tuʼa baʼale nye, be yangeʼe a kui éyoñ Nti Emien a toteya meleb ma yiane nye.

¹³ Ane Nti a nga kobô Môze na:

¹⁴ Kuliʼi nkobô ébiasé ate atan, ba bese be nga wôk ane a kobô ba ye beté mo map e nlô wé, a bôte bevoʼo bese ba ye lume nye mekok .

¹⁵ Wo ye kobô bone bʼIsraél na: Môt ase a ye ta Zambe wé, a ye beʼe mekua yʼabé dé.

¹⁶ Môt a ye kobô jôé Nti ébiasé a ye wôéban: bôte bese ba ye lume nye mekok; toʼo a ne ntabe nge bialébialé, a ye foʼo wu amu a nga kobô jôé Zambe ébiasé.

¹⁷ Môt a wôé môte mbok nye fe a ye wôéban.

¹⁸ Môt a wôé éyeme môte mbok a ye ve éfe é vee.

¹⁹ Nyô a balé e môte mboʼ aveñ, ba ye fe balé nye aval aveñe te.

²⁰ Mbuʼan wo tañe mbuʼan, dis da tañe dis, asôñ da tañ asôñ; ba ye bulane nye aval abé a nga bo môte mbok.

²¹ Môt a wôé éyem a ye bulan éfe, ve nyô a wôé môt a ye fe wôéban.

²² Ntabe a bialébialé ba ye wulu a nkobe metiñe wua amu ma me ne Nti e Zambe wônan.

²³ Nde Môze a nga kobô bone bʼIsraél; ane be nga kuli nkobô ébiasé ate e minkan atan a lume nye mekok . Nalé bone bʼIsraél be nga bo ane Nti a nga bendé Môze.