LEVITIK 21 - Bible en langue Bulu

Metiñ ma fombô betuni a ényiñe jap

¹ Nti a nga jô Môze na: Kate bone bʼAron be ne betuni na: Ntuni a nji yiane ve émiene mvin a nnambane mbime môte wé.

² Vengevenge ve bôt be ne foʼo émbé: nyia, ésaa, mona fame wé, mona minga wé, monyañ,

³ a kale jé é ngenan éndun é too nye bebé, éyoñ é ngenan te ke aluk; vʼane nguleya ve émiene mvin be kal éte.

⁴ Ezezañ ya bôte bé, ntuni a bili ésaé ntebʼôsu; ajô te a nji yiane ve émiene mvin amu nalé a ye samele nye.

⁵ Eyoñ awu e né, betuni be nji yiane sôté éfase nlô nge tyeñe zel e mefefele mebaé yʼanyu, nge tene mimbak e menyôle map.

⁶ Ba ye bo étyi asu Zambe wob a bo te ndaman étyi ya jôé Zambe wop, amu mbe ba ve Nti mimvean mia diʼibane nduan, bidi bi Zambe wop: ajô te ba yiane bo étyi.

⁷ Ba ye bo te luʼu minga ébamba nge nyô a maneya same, nalé fe ba ye bo te luʼu minga nnôm a te suu: amu ntuni a nʼétyi asu Zambe wé.

⁸ Môt yʼIsraél ase a ye semé étyi ya betuni amu mbe ba liti ma bidi mia ve Zambe wônan; ajô te ntuni a ye bo étyi mfaʼa wé amu me nʼétyi, ma, Nti, me nga tobe Israél na a bo ayoñ e nʼétyi.

⁹ Nge ngone ntuni ja samele ébien a mboon ébamba, a samele ésaa: ajô te ba ye diʼi nye nduan.

¹⁰ Ntuni nnen a ne évete betuni; a nga teléban étyi a ñwoʼone mbone môs a nga taté bisaé bié, a ne nguleya jaé mengômesan me nʼétyi, ajô te a nji yiane tabe nsoé nlô, nge nyabe mengômesane mé.

¹¹ A ye bo te subu mbime bebé; nge ve émiene mvin toʼo éyoñ ésaa nge nyia be wuya.

¹² A ye bo te kui atane ya vôme wom a nʼétyi, nge ndaman étyi ya e ndaa Zambe wé: amu a nga teléban étyi a mbon ba woʼo ya Zambe wé. Ma me ne Nti.

¹³ A ye luʼu vʼéndune ngon.

¹⁴ A ye bo te luʼu nkus nge minga be nga suu, nge minga ébamba nge nyô be maneya samele, ve a ye luʼu éndune ngone ya ayoñe dé.

¹⁵ A za bi mvoñe bôt é ne te mfuban ézezañe bôte ya ayoñe dé: amu ma me ne Nti a telé nye étyi.

¹⁶ Ane Nti a nga kobô Môze a jô nye na:

¹⁷ Kobôʼô Arone na: É miaé mi bôt mia zu, teke môt éziñ ya mvoñe jôé a bili éyem éziñe nyôl a ye bi nkañesane ya subu bebé ataʼa metunaʼa na a ve ma bidi biam.

¹⁸ Teke ñyeyem éziñ wo ye nyoñeban ésaé éte: toʼo ndindim, mfeñke abo, nyô jôé dé é bili éyem éziñ nge na abo, wo, jôm jia yʼété é ne ayab a lôte ji évok.

¹⁹ Nyô abo nge wo bi ne mbuʼan;

²⁰ Nyô a ne akule mvus nge ôwuluwula, nyô a kone mis, nyô a kone mintyañ, nyô a kone mebata nyôl, nge nyô a ne miak .

²¹ Te ke wua ya mvoñe bôte ntuni Aron a bili éyem éziñe nyôl a ye subu ataʼa metunaʼa bebé na a ve Nti mimvean mia diʼibane nduan; amu a bili éyem éziñ, nde a nji bi nkañesane ya bo bisaé ntuni a yiane bo.

²² A ne nguleya di metunaʼa me ne ma mvean, nalé fe bidi bia dañ étyi a bi bi nʼétyi.

²³ Vʼamu a ne ñyeyem, a ye bo te subu bebé éndelé é tyele e zañe nda yʼétyi, nge subu a kui ataʼa metunaʼa. A nji yiane ndaman étyi ya nda jam é nʼétyi amu me ne Nti a ma ma telé betuni étyi na be bo mʼésaé.

²⁴ Ane Môze a nga kalane Aron mejô mete, e bone bé a bone bʼIsraél bese.