LEVITIK 19 - Bible en langue Bulu

Avale Zambe a kômbô na be bo nye ésaé

¹ Ane Nti a nga kobô Môze a jô na:

² Kobôʼô ékôane bôt ése yʼIsraél na: Mia ye bo étyi, amu ma Nti, e Zambe wônan, me nʼétyi.

³ Môt ase ya be mia a ye semé nyia a ésaa a baʼale fe besabate bam, ma me ne Nti Zambe wônan.

⁴ Mia ye bo te kôñelan e be azezambe nge bo miabebien biveʼelaʼa bi azezambe a nyeman étyé. Ma me ne Nti e Zambe wônan.

⁵ Eyoñe mia ve Nti mimveane ya nlatane ngbwa, vaʼan mie avale da yiane na mi nyoñebane mvoʼé be ma.

⁶ Ba ye di étyiʼa e môse ja veban nge môs wo tôñe valé. Jôme ja buk a kui môse lale ja ye diʼibane nduan.

⁷ Nge ba di je e môse lale, étyiʼa te é ntoo jôm é ne te mfuban a me se nguleya kañese je.

⁸ Môt a ye di je a yiane yeme na a ndaman étyi ya jôm é ne ma mvean a émien a ye beʼe mekua ya ékobe jé; môt ate a ye vaseban e zañe bôte bé.

⁹ Eyoñe mia ye kôane bidi e si jenan, wo ye liʼi vôm éziñ yʼété teke kôane bidi ya valé, nalé fe na wo ye bo te bulan ke kôane jôm é ne nliʼane mvus.

¹⁰ Wo ye bo te kolé bisanté bi ne nliʼan afube mindiʼi dôé, nge toʼé mefese mese me ne nkuan été. Wo ye liʼi éngôngole môt a ntabe biôm bite. Ma me ne Nti, Zambe wônan.

¹¹ Mia ye bo te wup; môt ase ya be mia a ye bo te laane môt ba nye be too minsos nge duʼu nye.

¹² Mia ye bo te kane ngana minsos a jôé dam, amu ô za ndaman étyi ya jôé e Zambe wôé. Ma me ne Nti.

¹³ Wo ye bo te wôlé môte mia nye mi too jôm a ngu nge wube jôm éziñ. Wo ye bo te baʼale maʼan me mbo ésaé e nda jôé a kui mametyé.

¹⁴ Wo ye bo te kobô ndôndok nkobô nkpwala a ésas, a te bôé ndindim jôme ya kolé wô ôbak ôsu. Ve wo ye ko Zambe wôé woñ, ma me ne Nti.

¹⁵ Te boon ékotekot ntyiʼane mejô été: te ko môt a nʼatek éngôngol é ne te yian nge semé beta môt ésemé é ne te yian, ve mia ye tyiʼi bôte mia be be mi too mejô teke ôbangam.

¹⁶ Wo ye bo te ndeñe mfuk e bôte bôé été. Te veʼele bo na môte mia nye mi too a nyoñe meleb yʼawu amu bibôta mejô biôé asu betyiʼi mejô: ma me ne Nti.

¹⁷ Te siñe monyoñ e nleme wôé été, ve ô vaʼa nye bijô nalé wo ye bo te beʼe mekua ya abé dé.

¹⁸ Te kune womien a te baʼale bone ya ayoñe dôé ôvitiʼi nlem , ve wo ye nyeʼe e môt a too wo bebé ane wo nyeʼe womien: ma me ne Nti.

¹⁹ Mia ye fe baʼale memvinda ma, te kañese na mevale me tite mebaé me yam; nalé fe te miase mvoñ mevale mebaé afube dôé été; a wo ye bo te jaé ngômesan é too ntiñan a minsiñga mevale mebaé.

²⁰ Nge fam éziñ ja fulane minga, nge minga ate a ne mbo ésaé a bili atiñ aluk a fame fe ve a nji bi éto fili, ba ye lume bebaé vʼaleman, ve saa melebe yʼawu, amu minga ate a nji bi éto fili.

²¹ Amu mekua mé, fam ja te jôʼôbô minga ate ja yiane zuu nnôm ékela e be Nti, anyiine nda éndelé bendôbaʼan asu mveane ya mvaane mekua.

²² Eyoñe te ntuni a ye bulu nsem asu dé asu Nti, amu abé a nga bo; a ye bulu nseme te a nnôm ékela a nga veban asu mveane ya mvaane mekua, wôna abé a nga bo da ye jambane nye.

²³ Eyoñ mi nyiiya si ya Kanaan a bé bilé bia wum bibuma mevale mese, mia ye yene bibuma yʼété bi too te mfuban tañ mimbu mila a mia ye bo te di bie.

²⁴ Bibuma bia ye wum e mbu nyini, mia ye ve ma bie ézezañe abôʼô mevaʼa été.

²⁵ Mbu tane mia ye di bibuma ya bilé bite, nge mia bo nalé nkôane bidi wônan wo ye nenenen, ma me ne Nti, e Zambe wônan.

²⁶ Te diane minsôn mi tit e vôm émiene ya mi nga kuli je metyi. Te boone mame ya majik nge bo mame ya bemviʼi.

²⁷ Te tyembane ntyiʼi e minlô nge tyeñe mekuʼu ya zele jôé.

²⁸ Te tenane mimbak e menyôle ane ndeme ya meyep, nge kpwele bikanga e bikôbe bienan: ma me ne Nti.

²⁹ Te sili ngo jôé si éyoñ wo tindi je na é bo ébamba amu na ngume si ôse ô za nyiin ébamba été a bo mbia jôm e mise me Nti.

³⁰ Mia ye baʼale besabate bam a semé vôme wom a nʼétyi: ma me ne Nti.

³¹ Te kean e be ba ba loone minsisim bekôn nge biʼi mam ma ye boban melu ôsu, mi za ve miabebien mvin a be: ma me ne Nti, e Zambe wônan.

³² Wo ye tebe tetele asu ya nyô nlô ô ntoo ne fuum a semé éto nnôme jé. Wo ye ko Zambe wôé woñ: ma me ne Nti.

³³ Nge ntabe wo zu tabe e si jenan mia be be, te belan wô ane e ne te yian.

³⁴ Mia ye belan e ntabe ô too be mia ane bialébialé ya zañe jenan; wo ye nyeʼe nye ane womien, amu mi nga too mintabe e si yʼEjipte: ma me ne Nti e Zambe wônan.

³⁵ Mia ye bo te bo ékotekot toʼo e ntyiʼane mejô été, toʼo éyoñ mia veʼe nté a ndam, nge adit nge abim.

³⁶ Mia ye belane minlôt mi ne zôsôôô, metyi minlôt me ne zôsôôô, nkoé ô ne zôsôôô, a viek ô ne zôsôôô: ma me ne Nti e Zambe wônan, Nyô a nga soo mia si yʼEjipte.

³⁷ Mia ye baʼale memvinda mam mese a minjôane miam mise a bo mie: ma me ne Nti.