LEVITIK 18 - Bible en langue Bulu

E mfulʼénoñ fam a minga ba yiane saʼale Miñyeʼelan mife mia volô ntabane mfuban

¹ Nti a nga kobô Môze na:

² Kobôʼô bone bʼIsraél a jô be na: Ma me ne Nti e Zambe wônan:

³ mia ye saʼale bo mam ma boban Ejipte e vôm mi nga too, a mia ye saʼale bo mam ma boban e Kanaan e vôm ma kee mia: te wulu metume mab été.

⁴ Mia ye bo minjôane miam a baʼale memvinda mam, a bo ane ma jô: ma me ne Nti, e Zambe wônan.

⁵ Mia ye baʼale memvinda mam a minjôane miam: môt ase a ye bo me a ye nyiñ a me, maa me ne Nti.

⁶ Teke môte ya be mia a ye subu évuvumane jé bebé na a yene soé jé: maa me ne Nti.

⁷ Wo ye bo te yen ésoo soé nge nyua. Amu nyua wôé le: wo ye bo te yene soé jé.

⁸ Wo ye bo te yene minga ésoo soé, amu soé ésoo nje le.

⁹ Wo ye bo te yene kale jôé soé: ngon ésoo nge ngone nyua, toʼo mia nye mi ne vʼésaa wua nge ve nyia wua.

¹⁰ Wo ye bo te yene ndaé jôé é ne minga soé, mbialan be ndôman jôé nge be ngo jôé.

¹¹ Wo ye bo te yene ngone minga ésoo soé nje ésoo émien a nga biaé: amu kale jôé nje le.

¹² Wo ye bo te yen ésoñgo soé amu baa ésoo be nga bialé.

¹³ Wo ye bo te yene monyañe nyua soé: amu baa nyua be nga bialé.

¹⁴ Wo ye bo te yene monyoñ ésoo soé, a wo ye bo te subu ngale bebé, amu nyua mongô le.

¹⁵ Wo ye bo te yene nyo mbome soé; amu nga nyo mone le: wo ye bo te yene nye soé.

¹⁶ Wo ye bo te yene nga monyoñe soé: amu soé monyoñe le.

¹⁷ Wo ye bo te yene minga soé ô yene fe soé ngo jé. Nalé fe na wo ye bo te luʼu ngone mona fame wé nge ngone mona minga wé a yene be soé: amu mia be bôte bete mi ne abialé a mboone te ô ne mbia jam.

¹⁸ Wo ye bo te luʼu monyañe nyo ngal ô za dutu mesengan, éyoñ ô yemeya nye soé, e fefele nyo ngal nté a ngenan a vee.

¹⁹ Eyoñe minga a yene ngon wo ye bo te subu nye bebé, amu ñyenane ngon wo bo nye te mfuban : ô nji yiane yeme soé jé.

²⁰ Wo ye bo te bômbô e minga môte mia nye mi too bebé amu nalé a ye ve mia bebaé te mfuban .

²¹ Mi nji yiane ve bone benan ane bityiʼa asu zambe Molok a ndaman étyi ya jôé Zambe wôé: ma me ne Nti. Eyôlé metunaʼa mete é nga suʼulane fe bo Molok (Dt 18:10; 2 Bjb 23:10)

²² Wo ye bo te jôʼôbô fam ane ba jôʼôbô minga: mboone te ô ne Angôndô.

²³ Wo ye bo te jôʼôbô tit éziñ a ve womiene nsem. Nalé fe na minga a ye bo te subu tite bebé a fulane je: nalé a ne mbulekane mam.

²⁴ Te veane miabebiene mvin a mboon éziñ yʼété, amu mam mete mese mme meyoñ me nga titan ôsu vienan me nga bili me mvin.

²⁵ Si é nga bili fe mvin, ane me nga ve je melep , nde é nga wua bôte bé e fé.

²⁶ Ajô te nde mia ye baʼale memvinda mam a minjôane miam, a mia ye bo te bo mboone wua ya bʼangôndô be mam bete, toʼo bialébialé, toʼo ntabe ô too zañe jenan.

²⁷ Amu na bʼangôndô be mam bôt be nga too si éte te naa mi so be nga bo mbe le. A nalé a nga ve si mvin.

²⁸ Eyoñe te si ja ye bo te yô mia amu mam mʼôsone menan, avale fe é nga yô meyoñ me nga too mia ôsu.

²⁹ Amu ba bese ba ye bo jame da ya asone mame te, ba ye vaa be zañe bôte bap.

³⁰ Mia ye baʼale abendé dam a mia ye bo te bo mboone wua ya bʼangôndô be mam be nga boban te na mi so. Mia ye bo te nyoñe mvin a mie: ma me ne Nti e Zambe wônan.