LEVITIK 16 - Bible en langue Bulu

Beta môse ya njaman abé

¹ Nti a nga kobô Môze e mvus awu bone bʼAron bebaé mbe be nga tebe asu Nti avale bebien be nga kômbô, ane fe be nga wu.

² Nde a nga jô Môze na: Kobôʼô monyoñ Arone na a bo te nyiin e vôme wom a nʼétyi éyoñ ése, a dañedañe na a bo te tulan éyé é tyele e zañe nda éndelé, a tebe ôsu ébutaʼa é nʼéwolo yʼélate yôp: éyoñe te a ye bo te wu, amu ma suan ébutaʼa te yôp me too e nsume nkut été.

³ Avale di nde Aron a ye nyiin e vôme wom a nʼétyi: a bili étoñe nnôme nyak asu mveane ya sili njaman abé, a nnôme ntômba asu mvean wo diʼiban.

⁴ A ye jaé éwomane ndombo é nʼétyi a jaé mekuba me ndombo e nyôle jé; a ye tiñeti asese ndombo angeteñ a jaé fe ôzomezome ntôme ndombo e nlô: mengômesan me nʼétyi a ye jaé mme le, éyoñ émien a tatéya mane wobane mendim.

⁵ Wôna a ye nyoñe beyôme bikela bebaé e be bôte bese yʼIsraél asu mveane ya nyoñe njaman abé, a nnôme ntômba asu mveane wo diʼibane ngumba.

⁶ Aron a ye ve nnôme nyak mfaʼa wé asu njaman abé, éyoñe te a ye bulu nsem asu dé émien a asu nda bôte jé.

⁷ A ye nyoñe beyôm bikela bebaé a zuu be asu be Nti, anyiine nda éndelé bendôbaʼane.

⁸ Eyoñe te a ye bo bikela bite bibaé asimba , asimba da asu Nti a di avok asu azazél.

⁹ Aron a ye nyoñ ékela asimba da ye liti asu Nti a ve je mveane ya njaman abé.

¹⁰ Wôna ji asimba da liti asu azazél a ye zuu je vevee asu be Nti, nnôm ékela ate a ye volô asu mbulane minsem éyoñe ba lôme nye Azazél e nkôte si.

¹¹ Aron a ye ve nnôme nyaʼa wé asu njaman abé, éyoñe te a ye bulu nsem asu dé émien a asu nda bôte jé. A ye tyik e nnôme nyaʼa wé a ne asu njaman abé tyiñ .

¹² A ye nyoñ ésiʼi é bili abui metyeʼe me nduan a te vaa ataʼa metunaʼa asu be Nti a asube da nyume mvaé, njalane mo mebaé, éyoñe te a ye kee bie ôyab a éyé é tyele e zañe nda éndelé.

¹³ Eyoñe te a kut asub e nduan asu be Nti, nalé ôtita wo ye yian ébutaʼa éwolo yʼélat, a a ye bo te wu.

¹⁴ A ye nyoñe metyi me nnôme nyak a miame me a ônyu ôsu ébutaʼa éwolo yʼélat mfaʼa jôp da tôô, a ye miame metyi mete a ônyu ôsu ébutaʼa éwolo yʼélat tañe biyoñe zamgbwal.

¹⁵ A ye tyiʼi nnôm ékela njaman abé ya bôte tyiñ a kee metyi yʼété ôyab a éyé ya e zañe nda éndelé, a ye belane metyi mete avale fe a nga belane ma me nnôme nyak; a ye miame me e yôp a ôsu ébutaʼa éwolo yʼélat.

¹⁶ Avale te nde a ye bulu nseme ya vôme wom a nʼétyi amu mvine ya bone bʼIsraél, amu mimboon mi njete miab a amu minseme miabe mise. Avale te fe a ye bo asu nda éndelé bendôbaʼan é ne be be, ézezañe ya mvine jap.

¹⁷ Teke môt a ye tabe e nda éndelé bendôbaʼan été éyoñ Aron a ye nyiine na a bulu nsem e vôme wom a nʼétyi akekui a kuiya atan. A ye bulu nsem asu dé, émien, asu nda bôte jé a asu ngum nsamba bôt ôse yʼIsraél.

¹⁸ A ye kui atan mfaʼa ataʼa metunaʼa e ne ôsu Nti, a bulu nsem asu ataʼa metunaʼa; a ye nyoñe metyi me nnôme nyak a metyi me nnôm ékela, éyoñe te a futi me mbômaʼan a minlaʼa mi ataʼa metunaʼa.

¹⁹ A ye miame metyi ataʼa metunaʼa yôp tañe biyoñe zamgbwal; a ye fubu de a telé de étyi amu mvine bone bʼIsraél.

²⁰ Eyoñe Aron a maneya fubu vôme wom a nʼétyi, a a maneya fe fubu nda éndelé bendôbaʼan a ataʼa metunaʼa, a ye bo na be zuu nnôm ékela vevee.

²¹ A ye beté mo mé mebaé e nlô nnôm ékela a vee, éyoñe te a ye mem minsem mi bone bʼIsraél mise; melo mab a minkobane miab e nnôm ékela yôp, a beté nye mie nlô, éyoñe te a lôme nye e nkôte si a wo ya fam é ne nkômesan ya bo jame te.

²² Nnôm ékela a ye ke e vôm a ne teke bôt a beʼe minseme miabe mise. Eyoñe be maneya lôm ékela e vôm a ne teke bôt,

²³ Aron a ye bulan e nda éndelé bendôbaʼan, a vaa mengômesane me ndombo a nga jaé éyoñ a nga nyiin e vôme wom a nʼétyi a liʼi me valé.

²⁴ A ye wobane mendim e vôme wom a nʼétyi éyoñe te a beta jaé mengômesane mé émien. Eyoñe te a ye kui atan a ve mimveane mié mia diʼibane ngumba a mimvean mi bôt mia diʼibane ngumba; a ye bulu nsem asu dé émien a asu bôt.

²⁵ A ye diʼi avoñ étyiʼa ya njaman abé, ataʼa metunaʼa yôp.

²⁶ Môt a nga kee nnôme ntômba a ne asu Azazél e nkôte si, a ye sôbe mengômesane mé a wobane mendim, éyoñe te a suʼulane bulan e minkan.

²⁷ E nnôme nyak a ne asu njaman abé a e nnôm ékela a ne asu njaman abé mbe ntuni a nga belane metyi e vôm a nʼétyi asu ya bulu minsem, ba ye kee be e minkan atan a diʼi bikôbe biap, minsône miab a mebi mab e nduan.

²⁸ Môt a ye diʼi biôme bite a ye sôbe mengômesane mé a wobane fe mendim, wôna a ye suʼulane bulane minkan.

²⁹ Mvinda nyô ja ye bo nyô ya éyoñ ése mfaʼa wônan: e ngone zamgbwale é too melu awôm nje mia ye liti miabebiene njuk; mia ye bo te bo ésaé éziñ, toʼo bialébialé toʼo ntabe ô to ézezañe jenan.

³⁰ Amu môs ôte ba ye bulu nsem asu denan, nalé mia ye bo mfuban; mia ye tuneban mfaʼa ya minseme mienan mise asu be Nti.

³¹ Môs ôte wo ye bo mia Sabat, môs awoʼon a mia ye liti miabebiene njuk: mvinda ya melu mese nje le.

³² Ntuni ba ye woʼo mbon wo a ve nye nguleya tyendé ésaa ésaé é nʼétyi été nye a ye bulu nsem. A ye jaé bifumulu mengômesan, mengômesan me nʼétyi;

³³ A ye bulu nsem asu vôm ya Etyi a né, asu nda éndelé bendôbaʼan a asu ataʼa metunaʼa, a a ye bulu nsem asu betuni a asu nsamba bôt ôse.

³⁴ Mvinda ya éyoñ ése mfaʼa wônan nje le. Avale te nde ba ye bulu minsem mise mi bone bʼIsraél, mbu ôse éyoñe jia. Be nga bo e jame Nti a nga bendé Môze.