LEVITIK 13 - Bible en langue Bulu

Akon yʼékôbe nyôl

¹ Nti a nga kobô Môze baa Aron a jô be na:

² Éyoñe môt éziñ a ye bi mvin ékôbe nyôle jé nge ékôbaʼa, nge abat da suʼulane bo fôle zam ékôbe yôp, ba ye zuu môt ate be ntuni Aron, nge be wua ya bone bé be ne betuni.

³ Ntuni a ye fase fôl é ne ékôbe nyôl. Nge mimvot yʼété mi ntoo éfumulu a nge fôl ébien é ntoo édok a dañ ékôp, wôna fôl éte é ntoo zam . Eyoñe ntuni a maneya fas, a ye mialane foé na môt ate a nji beta bo mfuban .

⁴ Nge éfumulu abat é nʼékôbe nyôl é nji ke dañ édok a mimvot yʼété teke éfumulu, ntuni a ye fete môt ate e nda été tañe melu zamgbwal.

⁵ E môse zamgbwale, ntuni a ye beta fase môt ate. Nge fôl é nji ke nen a yian ékôbe nyôl, ntuni a ye beta fete nye éyoñe baa tañe melu zamgbwal.

⁶ E môse zamgbwale, ntuni a ye beta fase nye. Nge fôl éte é ntoo abôl teke yian ékôbe nyôl, ntuni a ye yôtane na môt ate a ne mfuban : jôme te é nʼékôbaʼa, môt ate a ye sôbe mengômesane mé wôna a ye bo mfuban .

⁷ Ve nge ékôbaʼa ja mane yian ékôp, éyoñe te a maneya liti émien e be ntuni na a lañebane mfuban , a ye beta ke yené e be ntuni éyoñe baa,

⁸ na a fase nye. Nge ékôbaʼa é maneya yian ékôp, ntuni a ye yôtane na a nji ke bo mfuban : a kone zam .

⁹ Eyoñe fôle zam ja ye kui e nyôle be môt éziñ, ba ye zuu nye be ntuni na a fombô nye.

¹⁰ Nge éfumulu mvim ja yené ékôbe nyôl, a nge mvim éte é veñesaneya mimvote ya vôm ate éfumulu a na minsône ya vôme mvim é né mia yô,

¹¹ zam éte é ne nyô é tabeya ayab ékôb be môt ate. Ntuni a ye yôtane na a nji bo mfuban; a ye bo te fete nye e nda été amu a nji bo mfuban .

¹² Nge zam ja kui a mane yian ékôbe nyôl ése ya môt a beʼe fôl, ataté nlô a kui mebo, e vôm ase ntuni

¹³ a ye fase nye, a yene tyiʼibi, nge zam ja mane yiane nyôl ése, ntuni a ye yôtane môt a beʼe fôle na a ne mfuban , amu nyôle jé ése é ntoo éfumulu, nde môt ate a ne mfuban .

¹⁴ Ve môs be ne yene minsôn mia yô e nyôle jé, môt ate a nji fe bo mfuban .

¹⁵ Eyoñe ntuni a yeneya minsôn mia yô, a ye yôtane na môt ate a nji bo mfuban : amu minsôn mia yô mi nji bo mfuban , zam nje le.

¹⁶ Nge minsôn mia yô mia tyendé a bo éfumulu, môt ate a ye ke be ntuni

¹⁷ na a fase nye; nge fôl é ntoo éfumulu, ntuni a ye yôtane na môt ate a ntoo mfuban .

¹⁸ Nge môt éziñ a nga kone jot e mane yet,

¹⁹ nge éfumulu mvim ja kui e vôme jot e nga too, nge abat e nʼéfumulu da bo ne vé, môt ate a ye ke yene ntuni .

²⁰ Ntuni a ye fombô môt ate. Nge abat e nʼédok a dañ ékôp, a mimvote ya valé bifumulu, ntuni a ye yôtane na a nji bo mfuban : fôle zam nje le é nga kui e vôme jot e nga too.

²¹ Nge ntuni a lôô na éfumulu mimvot é nji bo abat été, a na abate te e nji bo édok a dañ ékôbe nyôl, e ntoo fe abôl, a ye fete môt ate e nda été tañe melu zamgbwal.

²² Nge abat da mane yiane nyôl, ntuni a ye yôtane na môt ate a nji bo mfuban : fôle zam nje le.

²³ Ve nge abat e tele vôme wua teke mialan: évele jot nje le; ntuni a ye yôtane na môt ate a ne mfuban .

²⁴ Nge môt a te diʼi e nduan, ateme na abate da faé e fumu fe, nge na abat e ne ôbe évele da kui e vôme ndiʼan ô né,

²⁵ éyoñe te ntuni a ye fombô nye. Nge mimvot mi ne abat été mi ntoo éfumulu, a abat e too fe édok a dañ ékôp, zam nje ñhe le é kuiya e vôm a ne ndiʼan: ntuni a ye yôtane na môt ate a nji bo mfuban : fôle zam nje le.

²⁶ Ve nge ntuni a yene na bifumulu mimvot bi nji bo abat été, nalé fe na abat ebien e nji bo édok a dañ ékôbe nyôl, a na abat e ntoo abôl, ntuni a ye fete môt ate e nda été tañe melu zamgbwal.

²⁷ E môse zamgbwale, ntuni a ye fombô nye. Nge abat e maneya yian ékôp, ntuni a ye yôtane na môt ate a nji bo mfuban : fôle zam nje le.

²⁸ Ve nge abat e tele vôme wua, nge e nji ke yian ékôbe nyôl, a nge e nji ke bo abôl, ndôle nduan nje le: ntuni a ye yôtane na a ne mfuban amu éfele nduan nje le.

²⁹ Nge fam nge minga a beʼe fôl e nlô nge éyezel,

³⁰ ntuni a ye fombô fôl éte. Nge é nʼédok a dañ ékôbe nyôl, mimvot mi ne nyôle mfô a tyôtyoé mi too fʼété, ntuni a ye yôtane na môt ate a nji bo mfuban : meko le, zame ya nlô nge éyezel nje le.

³¹ Nge ntuni a yene na fôle meko é nji bo édok a dañ ékôbe nyôl, a na mimvot mi nʼévindi mi nji bo été, a ye fete môt ate e nda été tañe melu zamgbwal.

³² E môse zamgbwale, ntuni a ye fombô fôl. Nge meko me nji ke mialan a nge mimvot mi ne nyôle mfô mi nji bo été, nalé fe teke édok a dañ ékôbe nyôl,

³³ môt ate a ye tyeñeban, ve te nambe e vôme meko me né, a ntuni a ye fete nye e nda été éyoñ éfe tañe melu zamgbwal.

³⁴ E môse zamgbwale ñwô ñhe ntuni a ye fombô meko. Nge meko me nji ke yian ékôbe nyôl, a nge me nji bo édok a dañ ékôbe nyôl, ntuni a ye yôtane na a ne mfuban . A ye sôbe mengômesane mé a a ye bo mfuban .

³⁵ Ve nge meko me nga suʼulane yian ékôb a koé be yôtaneya na a ne mfuban ,

³⁶ ntuni a ye fombô nye, a nge meko me maneya yian ékôp, ntuni a ye bo te beta jeñ nge mimvot mi ne nyôle mfô mi nʼété: môt ate a nji bo mfuban .

³⁷ Ve nge meko ma yené na me nji ke nen, a na mimvot mi ne bivindi mi too été, meko mete me yeteya, a môt ate a ntoo mfuban , a ntuni a ye yôtane na môt ate a ntoo mfuban .

³⁸ Eyoñe fam nge minga a ne teme na bifumulu mebat bi ntoo nye nyôl,

³⁹ ntuni a ye fombô nye. Nge ékôbe nyôle jé é bili mebat me too ôbe éfumulu, tone le é kuiya nye nyô: yeme na a ne mfuban .

⁴⁰ Nge fam éziñ ja ye bo te fe ésil e nlô, môt ate a ne ayane nlôa môt, a ne mfuban .

⁴¹ Nge éfase ya mvom asu nje é ne nye te kʼésil, a ne ayan asu môt.

⁴² Ve nge fôl é ne nye éfas ayane ya dol nge asu, fôl éte é too ôbe évele, yeme na zame le é vameya nye éfas ayane ya doo nge asu.

⁴³ Ntuni a ye fombô nye. Nge fôl éte ja kui mvim é too ôbe évele éfas ayane ya dol nge asu, avale da fe ane zame ya ékôbe nyôl,

⁴⁴ môt ate a ntoo nzezam, a nji bo mfuban; fôl é ne nye e nlô.

⁴⁵ Nzezam wo kone fôl wo ye jaé mengômesan me too nyaban, nlô fe ô too nsoé; a ye fe solé éfas asu jé ya si a yôtane na: Te mfuban ! Te mfuban !

⁴⁶ Nté ôse a ye kone fôl, a ye bo te mfuban . A amu a nji bo mfuban , a ye tabe étam, a étabaʼa jé ja ye bo e minkan atan.

Miengele

⁴⁷ Eyoñe mebat me mieñgele ma yené e mengômesan me ne mboon a mevule me ntômba nge a ndombo,

⁴⁸ nge yené biyé nge besanglis be ne mboon a mevule me ntômba nge ndombo, nge yené e bikôb nge biôm bi ne mboon a ékôp,

⁴⁹ nge mebate mete me ne bebé ane nyôle mekaé bilé nge ôbe évele yeme na me ne mebat ba yiane liti ntuni .

⁵⁰ Eyoñe ntuni a maneya fombô jôm é bili mebat a ye fete je tañe melu zamgbwal.

⁵¹ E môse zamgbwale ñwô a ye beta fase mebate me mieñgele mete. Nge mieñgele a maneya yiane ngômesan ése a mevôm mese, nge yian ékôb nge jôm é nga boban a ékôp, yeme na mieñgele ate a ne nyô a se nguleya beta vas: jôme te é nji beta bo mfuban .

⁵² Ntuni a ye diʼi ngômesan, éyé nge sanglis a ne mboon a mevule me ntômba nge ndombo, nge jôm é ne mboon a ékôp. A amu mieñgele ate a se nguleya vas, ba yiane foʼo diʼi jôme te e nduan.

⁵³ Ve nge ntuni a yene na mieñgele a nji ke yiane ngômesan, éyé, sanglis, nge jôm é ne mboon a ékôp,

⁵⁴ a ye bendé na be sôbe jôm é nga bili mieñgele, éyoñe te a fete je éyoñe baa tañe melu zamgbwal.

⁵⁵ Ntuni a ye beta fombô mieñgele mvuse ya be maneya sôbe ngômesan: nge mieñgele a nji tyendé nge mialan, jôme te é nji fe bo mfuban , ba ye diʼi je e nduan, toʼo na mieñgele a nga bi je été nge atan.

⁵⁶ Ve nge ntuni a yene na mieñgele a ntoo abôl éyoñ be maneya tuʼu nye, éyoñe te a vaa afôla ngômesan, ékôp, éyé nge sanglis e nga bili mieñgele.

⁵⁷ Eyoñe ayab éyoñ e lôteya, nge abate mieñgele da beta yené e ngômesan, éyé, sanglis nge jôm é ne mboon a ékôp, yeme na mfefé mieñgele le wo kui. Jôm é bili abat ja yiane diʼiban éyoñe te.

⁵⁸ Eyoñe be maneya sôbe jôm é nga bili mieñgele: ngômesan, éyé, sañglis nge jôm é ne mboon a ékôp, a abate mieñgele te da kôlô, ba yiane beta sôbe sôbe jôme te éyoñe baa, nalé ja ye bo mfuban .

⁵⁹ Miñyeʼelan mia fombô mebate me mieñgele ma yené e mengômesane mevule me ntômba nge ndombo, e biyé, besanglis nge biôm bi ne mboon a ékôp mmie le. Miñyeʼelane mite mia volô ntuni a yôtane na jôm é biliya é ne mfuban nge momo.