LEVITIK 11 - Bible en langue Bulu

Atiñ ya betit be ne mfuban a ba be ne te mfuban

¹ Nti a nga kobô Môze ba Arone na:

² Kobôʼô bone bʼIsraél a jô be na: E betite bese ya si, bana mbe mia ye di.

³ Mia ye di tit ése é bili éboʼos é too nsalan, mbiaé fe ô too nsalan a a boʼotôʼô nyalak.

⁴ Ve bana mbe mia ye bo te di akôsa bo na ba boʼotô nyalak nge na be bili éboʼos é too nsalan: kamel, amu a boʼotô nyalak ve éboʼos te nsalan: mia ye yene je ane tit é ne te mfuban;

⁵ nyôk é too mekok , amu ja boʼotô nyalak ve éboʼos te nsalan: mia ye yene je ane tit é ne te mfuban;

⁶ Liévre, amu a boʼotô nyalak ve éboʼos te nsalan: mia ye yene nye ane tit é ne te mfuban;

⁷ ngôé, amu é bili éboʼos é too nsalan nalé fe mbiaé, ve te boʼotô nyalak: mia ye yene je ane tit é ne te mfuban .

⁸ Mia ye bo te di minsône miap: mia ye yene be ane betit be ne te mfuban .

⁹ Betite bese ba nyiñe mendim, bana mbe mia ye di: Ba bese be bili mengap a bibas be too e mendim, toʼo mañ nge bone bʼasôé.

¹⁰ Ve ayôme betit ése é too mendim a jôm ése ja nyiñ e mendim, toʼo mañ nge bone bʼasôé, ba bese be nji bi mengap nge bibas, ba ye bo mbia be biôm mfaʼa wônan.

¹¹ Ba ye bo mbia be biôm mfaʼa wônan, mia ye bo te di minsône miap a mia ye yene mimbime miab ane mbia be biôm.

¹² Betite bese be ne e mendim te mengap nge bibas, ba ye bo mbia jôm mfaʼa wônan.

¹³ Mfaʼa ya anon, dina nde mia ye yen ane mbia jôm, a mia ye bo te di de: jun, ébandôé a ndôé mañ;

¹⁴ ze yôp a fufu ôbam a di da funane nye;

¹⁵ éngbwañ a anon ese da funane nye;

¹⁶ a éngutu, a mvômvôt, a élolé mañ a ôbam avale dé;

¹⁷ a nyôk, nsoñemetoʼo a nduk;

¹⁸ akuñ e beʼe bitombo, ngôkoé a ntememvoé;

¹⁹ Bingobingo, Sôsolôsôé a ônon ôse ô ne ane je, hupe a Ôngem.

²⁰ Mone tit ase a beʼe mefab a wuluʼu a mebo menyin, a ye bo mbia jôm mfaʼa wônan.

²¹ Ve bone betit bese be beʼe mefap be wuluʼu a mebo menyin, mia ye di e ba be beʼe mevale mebo mebaé: ma ba wulu me a ma ma volô be na be yôô.

²² Bana mbe mia ye di: Étandak, mbaʼasan, mbu a aselek, jôm ése yʼété é too avale dé.

²³ Bone betite bevoʼo bese be beʼe mefab a mebo menyin, ba ye bo mbia jôm mfaʼa wônan.

²⁴ Be ne bo mia na mi yené te mfuban , a môt ase a ye nambe mimbime miap, a ye bo te mfuban a kui mamengôʼé,

²⁵ a môt ase a ye beʼe mimbime miap a ye sôbe mengômesane mé a tabe fe te mfuban a kui mamengôʼé.

²⁶ Tit ése éboʼos é ne nsalan ve mbiaé ô too te nsalan, nalé fe te boʼotô nyalak, mia ye yene je ane nyô é ne te mfuban .

²⁷ Betite mekule bese, mia ye yene be ane te mfuban : môt ase a ye nambe mimbime miap a ye bo te mfuban a kui mamengôʼé,

²⁸ a môt ase a ye beʼe mimbime miap a ye sôbe mengômesane mé a tabe te mfuban a kui mamengôʼé. Mia ye yene be ane betit be ne te mfuban .

²⁹ Bone betit ba woñe si bana mbe mia ye yen ane te mfuban : kpwañesan, fôô a nsoo, jôm ése yʼété avale dé;

³⁰ afaé, nkaʼa, kuu, ôngôtô a jôngô ô.

³¹ Mia ye yene be ane te mfuban e bone betite bese été: môt ase a ye nambe be, éyoñ be wuya, a ye bo te mfuban a kui mamengôʼé.

³² Jôm ése jôme ya mimbime miab ja ye nambe ja ye bo te mfuban : ékanda, ngômesan, ékôbe tit, nkuta, élabaʼa ése ba belane je: ba ye futi jôme te mendim é tabe fe te mfuban a kui mamengôʼé, ja ye bo mfuban éyoñe ngôʼé é lôteya.

³³ Jôm ése ba ye koone je élabaʼa é ne mboon a tyia été a jôm éziñe ya mimbime betite mite é too été, ja ye bo te mfuban , a mia ye bôé élabaʼa te.

³⁴ Adi ese ba di, mendim ya élabaʼa te me too nsôan été ma ye bo te mfuban; jôm ése ba nyu avale élabaʼa te ese ja ye bo te mfuban .

³⁵ Jôm ése ngabe ya mbime wob ja ye ku yôp ja ye bo te mfuban; jaʼane mbum nge ntakaʼa ya di, ba ye tyame bie. Bi ne te mfuban , a mia ye yene bie ane te mfuban .

³⁶ Ve jame da na anjeñ a ébé bi ne mboon mfaʼa ya baʼale mendim bia ye bo mfuban; ve nyô a ye nambe mbime wop a ye bo te mfuban .

³⁷ Nge jôm éziñe ya mbime wob ja ku e mvoñ ja yiane béébane yôp, mvoñ éte é ngenane mfuban;

³⁸ ve nge be nga jini mvoñ éte mendim, a jôm éziñe ya mbime wop é kpwelé je yôp, mia ye yene mvoñ éte ane te mfuban .

³⁹ Nge tite jia ya betite mia di ja wu, môt a ye nambe mbim a ye bo te mfuban a kui mamengôʼé;

⁴⁰ môt a ye di avale mbime te a ye sôbe mengômesane mé a tabe te mfuban a kui mamengôʼé.

⁴¹ E mone tit ase a woñe si a ye bo mbia jôm: ba ye bo te di nye.

⁴² Mia ye bo te di toʼo ve wua ya bone betit ba woñe si, nge ba ba vutan a mebum, nge ba ba wulu a mebo menyin nge a abui mebo, amu be ne mbia jôm.

⁴³ Te boone miabebiene mbia jôm amu bone betite bete bese ba woñ; a te boone miabebien te mfuban a be, nge ve miabebiene mvin a be.

⁴⁴ Amu me ne Nti, e Zambe wônan: mia ye telé miabebien étyi, a naa mia ye bo étyi amu me nʼétyi; a mia ye bo te bo miabebiene mvin a bone betite bete bese ba woñe si.

⁴⁵ Amu me ne Nti a nga soo mia e si yʼEjipte na me bo e Zambe wônan, a mia ye bo étyi, amu me nʼétyi.

⁴⁶ Atiñe da fombô betit, anon, bevevee be biôme bese ba fôʼôsan e mendim a biôme bi vee bi woñe si, nde le,

⁴⁷ mfaʼa ya kandé jôm é ne te mfuban a jôm é ne mfuban , tite ba di a nyô be ne te di.