LEVITIK 10 - Bible en langue Bulu

Nduane Nti a bone bʼAron bebaé

¹ Bone bʼAron môé na Nadab a Abihu, be nga nyoñ, môt ase, Esua daʼa, nde be nga boʼé nduan a futi ôlobinda été yôp; be nga zuu avale nduan afe asu Nti, a mboone te ô selaʼane wu Nti a nga bendé.

² Ajô te nduan é nga so ôsu be Nti a mane diʼi be: nde be nga wu asu Nti.

³ Ane Môze a nga jô Arone na: Nde te ma ye teléban étyi e be ba ba subu ma bebé, a ma ye wum e vôm ayoñe bôt ese é né, nalé Nti a jô. Aron a nga tabe évôl.

⁴ Môze a nga loone Mikaél a Eltsafan mona Uziél ndômenyañe Aron a jô be na: Zaʼan mi beʼe be a kee be ôyab a vôm yʼétyi.

⁵ Nde be nga zu beʼe be e biwomane biabʼété, a kee be e minkan atan, avale Môze a nga jô.

⁶ Môze a nga jô Aron, Eléazar a Itamar mon Arone na: Te mia vaa mintôme nlô, nalé fe te nyabane mengômesane menan, éyoñe te mia ye bo te wu éyoñe mia dutu ayaa Zambe e bʼékôane bôt ése. Bobenyoñe ya nda bôt Israél ése ba ye yôn amu bôte Nti a maneya wôé a nduan.

⁷ Mia ye bo te kôlô anyiine nda éndelé bendôbaʼane, mi za mane wu: amu mi ne ba be ne ñwoʼone mbone Nti: be nga bo ane Môze a nga jô.

⁸ Ane Nti a nga kobô Arone na:

⁹ Wo ye bo te nyu woon nge ényunyui é ne ngul abui, wo a bone bôé, éyoñe mia nyiine nda éndelé bendôbaʼan, éyoñe te mia ye bo te wu. Da ye bo mvinda ya biyoñ bise e miaé mienan mise.

¹⁰ Nalé mia ye bo nguleya kandé jôm é nʼétyi a ji é nji bo étyi, jôm é nji bo mfuban a ji é ne mfuban;

¹¹ A Yeʼele bone bʼIsraél memvinda mese Nti a nga ve be e be Môze.

¹² Ane Môze a nga jô Aron a mebukaʼa me bone bé, Eléazar a Itamare na: Nyoñane mebukaʼa ya mimvean mia diʼibane nduan asu Nti, a di me mfôm ataʼa metunaʼa, jôm ja vusu momo été: amu é ne jôm é nʼétua étyi.

¹³ Mia ye di me e vôme wob a nʼétyi; jame di e ne mvinda mfaʼa wôé a bone bôé, ajô mimvean mia diʼibane nduan asu Nti: amu jame Nti a nga bendé ma nde le.

¹⁴ Mia ye fe di e vôm a ne mfuban : wo, bobefame bôé a bobebinga bôé. Mia ye di ôngône be nga ve a énam be nga vaa: amu bi ne mia mvean, bi too fe mvinda asu dôé a bone bôé, e mimveane ya nlatane ngbwa bone bʼIsraél.

¹⁵ Bone bʼIsraél ba yiane zuu énam a ôngôn, bi bete mengab me nʼavoñ ba diʼi ataʼa metunaʼa yôp. Eyoñe be maneya bo mame ya liti biôme bite asu Nti, mengabe mete ma ye bo asu denan amu me ne émenan biyoñ bise, avale Nti a nga bendé.

¹⁶ Môze a nga jeñe nnôm ékela a ne mveban asu njaman abé; a koé na be maneya diʼi nye. Eyoñe te a nga yaa Eléazar a Itamar, bone bʼAron be nga liʼi a jô be na:

¹⁷ Amu jé mi nga bo te di étyiʼa ya njaman abé e vôm a nʼétyi? Amu é ne jôm é nʼétua étyi, a Nti Nye a nga ve mia je, nalé mia ye beʼe ékobe ya ngum nsamba bôt, éyoñe te mia ye bo jame ya njaman abé asu Nti.

¹⁸ Mi lôô fe na be nji ke kee metyi mé e vôme yʼétyi été: mi nga yiane di je e vôm yʼétyi été, avale Nti a nga bendé ma.

¹⁹ Aron a nga jô Môze na: Ke ô lôô na den nye ba te ve mimveane miab asu njaman abé a mimveane miab mia diʼibane ngumba asu Nti; nalé fe na e mvuse ya jam da te kui be ma, nge me nga ye di étyiʼa ya njaman abé den, ye jame te e nga ye yené mvaé e mise me Nti?

²⁰ Môze a nga wôk a kañese mejô mete.