LEVITIK 1 - Bible en langue Bulu

Etyiʼa ba diʼi ngumba

¹ Ane Nti a nga loone Môze a kobô nye, tyiñ é soʼo e nda éndelé bendôbaʼan na:

² Kobôʼô bone bʼIsraél a jô be na: Éyoñe môte wua ya be mia a kômbô ve Nti mvean éziñ, a ye ve wô ô soʼo mbame benyak nge mbame mintômba a bikela été.

³ Nge mveane wé ô ne étyiʼa ja diʼibane ngumba ô soʼo mbame benyak, a ye ve nnôm a ne mvoʼé ne selem; a ye ve nye anyiine nda éndelé bendôbaʼan, nalé étyiʼa te ja ye nyoñebane be Nti.

⁴ Môt ate a ye beté wo wé e nlô étyiʼa Nti a maneya kañese asu njaman abé dé.

⁵ A ye tyiʼi étoñe nyaʼa tyiñ asu Nti; betuni, bone bʼAron, ba ye ve metyi a miame me mbômaʼan a ataʼa metunaʼa e ne anyiine nda éndelé bendôbaʼan.

⁶ A ye soé étyiʼa ja diʼibane ngumba ékôp a ba je mefuse mefus.

⁷ Bone bʼAron Ntuni ba ye futi nduan ataʼa metunaʼa a wua njaʼa e nduan été.

⁸ Betuni, bone bʼAron, ba ye bôé mefus, nlô a avoñ e njaʼa é ne mfutane nduan ya ataʼa metunaʼa yôp.

⁹ Ba ye sôbe miñya a mimbiaé mi tit, a wua ya betuni a ye diʼi biôm bite bise ataʼa metunaʼa yôp: étyiʼa ja diʼibane ngumba e nduan nje le é too fe mbamba menyum e be Nti.

¹⁰ Nge mvean ô nʼétyiʼa ja diʼibane ngumba wo so e mone mbame biyem, mintômba nge bikela, a ye ve nnôm a ne mvoʼé ne selem,

¹¹ a ye tyiʼi nye tyiñ asu Nti ataʼa metunaʼa akôé, a betuni, bone bʼ Aron, ba ye miame metyi mé mbômaʼan a ataʼa metunaʼa.

¹² Ntuni a ye ba nye mefus, nlô a avoñ bi too fʼété; éyoñe te a bôé biôme bite e njaʼa a nduan ya ataʼa metunaʼa yôp.

¹³ Miñya a mimbiaé bia ye sôban a mendim. Eyoñe te ntuni a ye ve biôme bite bise a diʼi bie ataʼa metunaʼa yôp. Etyiʼa ja diʼibane nduan ngumba nje le é too mbamba menyum e be Nti.

¹⁴ Nge mveane wé a ve Nti ô ne étyiʼa ja diʼibane ngumba ô soʼo anon, a ye ve adu nge bezum.

¹⁵ Ntuni a ye ve ônon ataʼa metunaʼa yôp. A ye bok a té wô tyiñ a jaé, a diʼi wô ataʼa metunaʼa yôb a miate metyi yʼété mbômaʼane ataʼa metunaʼa.

¹⁶ A ye vaa ngok a mesaé a wua ônon ôbien bebé ataʼa metunaʼa mfaʼa jôb da tôô e vôm ba kut asup.

¹⁷ A ye nyabe vie mfaʼa ya mefab ve teke té me, éyoñe te ntuni a ye diʼi ônon ataʼa metunaʼa yôp, e njaʼa é ne nduane yôp. Etyiʼa ja diʼibane ngumba e nduan nje le é too mbamba menyum e be Nti.