KÔLÔS 4 - Bible en langue Bulu

¹ A bemasa, belaʼane belo benan e zôsôô été, a bo be e mam ma yian, mi yeme na mia fe mi bili Masa e yôb été.

Mebendé a mebatan

² Boʼone mbane meyeʼelan. Bômbaʼan évevé ajô te a mvean akéva.

³ Yeʼelane fe ajô dangan na Zambe a yoé bia mbé ya nkobô asu ya kañete ndimba jame Krist, nje fe me nga kaʼabane je ngataʼa,

⁴ me kañete je ane ma kômbô.

⁵ Tabaʼan ane da yian e mise me bôt be nji bo bekristen. Belaʼan mbamba éyoñ ate.

⁶ Mejô menan me bo éyoñ ése ma me mvam , ntyitan a nku, asu ya yeme yalane môt ase ane da yian.

Mejô ma suʼulan

⁷ Mfaʼa ya ényiñe jame mamien, mia ye bi mefoé mese ya été a Tisik, e mojañ ma nyeʼe, mbamba mbo ésaé, a ébe mbo ésaé e be Nti.

⁸ Ma lôme mia nye, foʼo ve amu na a kate mia mefoé mangan a ve mia ngule minlem.

⁹ Onézime, mbamba a étua édima mojañ, baa nye ba zu. Ane wua ya be mia. Ba ye kate mia mam mese ma lôte va.

¹⁰ Aristark, bia nye bi ne mimbôk a batane mia, nalé fe Mark, mone monyañe Barnabas. Mi nga nyoñe mefoé ajô dé. Nge a zuli be mia, mi nyoñe nye mvoʼé .

¹¹ Avale te fe Yésus nyô ba loone na Justus a batane mia. Mbe étam, e Beyude été, bia be be bi nga bo ésaé asu éjôé Zambe. Be nga volô ma nlem .

¹² Epafra, a ne fe wua ya be mia, a batane mia; mbo ésaé Yésus Krist ate, a nji jôʼé wosan ajô denan a zene ya meyeʼelan na, mi tebe ne sim, nya mvoʼé asu ya ve nkômbane Zambe mewôk.

¹³ Me ne ngaa wé na, a nyoñe njuʼu abui ajô denan, ajô ba ya Laôdisé a ba ya Hiérapôlis.

¹⁴ Lukas, mvôé jangan, dokita , a batane mia a Démase fe.

¹⁵ Mi bataʼane ma bobejañe ya Laôdisé a Nimfa, a keké é wôʼô sulane nda jé.

¹⁶ Eyoñe mi lañeya kalate wom, mi boʼo na be lañe fe nye e keké ya Laôdisé. Lañan, mfaʼa wônan, e nyô a ye so Laôdisé.

¹⁷ Wôna, katane Arkip na: Baʼaleʼe ésaé ô nga nyoñe be Nti, a jeñe zene ya tuʼa bo je.

¹⁸ Mebatane ya wo wom, ma Paul, e mme ma: mi simesaʼan bengôkobe bam. Mvam é tabeʼe be mia!