KÔLÔS 3 - Bible en langue Bulu

Mfefé ényiñ e be Krist

¹ Nge mia be Krist mi nga wômô ñhe, jeñane mame ya yôp, e vôme Krist a too e mbo nnôme Zambe.

² Bômbaʼan évevé asu mame ya yôp, saa ñhe ma ya si.

³ Mi ne foʼo ñwuan, a ényiñe jenan é solô a Krist e be Zambe.

⁴ Eyoñe Krist, ényiñe jenan, a ye yené, wôna mia fe mia ye yené njalan a étôtok mia be nye.

⁵ Ajô te wôéane mame ya si nyô me ne be mia: ébamba, mvin, ntulane mam ôkup, mbia minkômban a ôzañ akum ôte, ñwô ô ne nkañane bengunemelan.

⁶ E mam ma dutu ayaa Zambe e be bone ba bene njôan mme le.

⁷ Melu mvus mi nga wulu e mam mete été, éyoñe mi mbe mi nyiñik me été.

⁸ Eyoñe ji, mia fe vaʼane ñhe mam mete mese be mia: ayaa, ñwôʼan ôlun, évô, meta, mbia minkobô mia kui e menyu menan.

⁹ Minsos mi boʼo te yené ézezañe jenan. Amu mi vaaya nnôme môt a mimboone mié,

¹⁰ a mi jaéya mfefé môt, nye ate, asu ya bi ñyeman, a ne te jôʼé mboone mfefé éfunane a nté wé.

¹¹ Vôm ate, mone Grék a nji bo nge mone Beyude, ntyiʼan atyel, ndimi mam nge ñyeme mam, ôlo nge nti , ve Krist a ne mam mese e be bôte bese.

¹² Amu mi ne mintobane mi Zambe a nga nyeʼe a telé étyi, jaane ñhe minleme mia wôʼô bôt éngôngo, mvam , nsuubane si, njeʼeban a njiban.

¹³ Mi jibaʼan, bana a ba bevok; a nge môt éziñ a bili nyô mboʼo ajô, mi jamaʼane mia mia; avale Nti a nga jamé mia, mia fe boʼone nalé.

¹⁴ E mam mete mese yôp, jaane nyeʼan: élat ja dañe mvaé nje le.

¹⁵ E mvoʼé Krist é jôʼô minleme mienan nje éte mia bese mi nga loban na mi bo nyôle jia. Nyiñan e mvean akéva été.

¹⁶ Ajô Krist e tabeʼe be mia afoʼo dé ese été. Mi yékaʼan a mi lebaʼan, bana a ba bevok, njalan a fek. Yiʼane Zambe mvean akéva wônan, e minleme mienan été, a besam, a bia Nsisim wo ve ngule ya yia.

¹⁷ E jam ese mi ne jô nge bo, boʼone de a jôé Nti Yésus, a ve Zambe akéva amu nye.

Nda bôte bekristen

¹⁸ A beyal, suʼane mia bebiene si e be beyôme benan, aval ane da yian e be Nti.

¹⁹ A beyôm nyekaʼane benyo beyal, a te mia wôʼô be ôlun.

²⁰ A bon , vaʼane bebiaé benane mewôk mfaʼa ya mam mese. E jame Nti a yene mvaé e nde le.

²¹ A bebiaé, te boone na benyo bon be wôʼôlun be za bili ateʼe minlem.

²² A belo, wôʼane bemasa benane ya si nyô mfaʼa ya mam mese. Boʼone be bisaé, saa ke amu na ba fombô ane mia saé, aval ane nge mia kômbô yené mvaé e be bôt, ve amu njeʼebane minleme ya ba ba ko Nti woñ.

²³ Aval ésaé ese mia bo, boʼone je ane nge mia bo je Nti, saa bôt.

²⁴ Mi yeme na mia ye nyoñe ngabe be Nti ane maʼane menan. Masa a ne Krist. Mia bo nye bisaé.

²⁵ E nyô a yené ékotekot, a ye nyoñe maʼane ya ékotekote jé, a teke ôbangam éziñ ô ne be nye.