KÔLÔS 2 - Bible en langue Bulu

¹ Ma yi mi yem abime ngule mewosan ma bo ajô denan, ajô ba ya Laôdisé a ajô jama bôte mfe a ngenane te yene mamien.

² Nalé ate ma yi na be bo ngule minlem, a na, nlatan e nyeʼan été, be kui, afoʼo dé ese été, atyeñ e ne njalan e ñyemane ya ndimba jame Zambe, nje é ne Krist.

³ E be nye, akum ese ya fek a ñyemane bi solô.

Ntyee ajô bikotekote miñyeʼelan

⁴ Ma jô jame te, nde môt éziñ a ye bo te duʼu mia a élene nkobô,

⁵ E ne été na, me ne momo, mfaʼa ya minsôn ve me ne e zañe jenan e Nsisim été, mevaʼa mam me too na me yen ane mi tele été jenan a yeme ngul e mbunan mi bili be Krist.

⁶ Ajô te tôñane Krist Yésus Nti, avale mi nga nyoñe nye.

⁷ Yemetaʼane minkañe mienan e be nye, a too mbôkaʼa wônan, mi yeme ngul e mbunan été aval ane be nga yeʼele mia wô, mi buluʼu ve akéva.

⁸ Te kañese na môt éziñ a lame mia ôlame feʼe meduʼan, nje éte ja so e miñyeʼelan ya minnôme mefulu me bôt. Mengule mete e mme ma jôô si nyô, saa fe Krist.

⁹ Amu e nne ngume njalan ôse ya Zambe ô too be nye, e minsôn été,

¹⁰ a mi ntoo njalan e be nyô a ne nlô ya njôan ôse, a ngule njôan ése.

¹¹ E be nye, mi nga tyiʼibane ntyiʼibane metyele wo môt ô nji volô jôm a ñwô ô nga vaa mia nyôle minsôn. Avale te ntyiʼibane metyele Krist ô né.

¹² Njamban soñ a nye e nduuban été, avale te fe mi nga wômô e miñwuan a nye, amu mi nga buni ngule Zambe é nga wômôlô nye miñwuan.

¹³ A mia mi nga too miñwuan amu mintyamane metiñe mienan a tee ntyiʼane metyele ya minsône mienan, Zambe a nga ve mia ényiñ mia be nye. A nga jamé bia abé dangan ese.

¹⁴ A nga vaa kalate a mbe a boʼolô bia, nye metiñ me mbe me tyiñelaʼane na a wosane bia A nga bo nye na a bo momo. A nga tyelé nye krôa .

¹⁵ A nga telé bijôé a ngule minjôane soé. A nga bo bie jôme ya yen e menganda bôt été. A nga woʼotô bie e nsamba ndañane ya Krôa.

Krist nye a ne bebela

¹⁶ Ataté éyoñe ji, môt a boʼo te ve mia mekua ajô ndian a nyuan, ajô abôk, ajô meté me ngon nge môse Sabat.

¹⁷ Mam mete mese me ne ve nsisiñe ya mam me nga yiane zu, ve nya jame a so be Krist.

¹⁸ Te kañesane na bôte bʼéziñ be ve mia bijô, mbe ba yene mvaé ya bo mam me nsuubane si mfaʼa ya atan a nkañane be éngele, a nyoñe miñyenane miab étua anen. Bôte mevale mete be ne njalan a zesé mebun, amu mfasane wop wo dañe foʼo ve wu bôt.

¹⁹ Be nji tabe nlatan a Krist nyô a ne nlô, nyô ngume nyôl ôse wo nyoñe meyaé Zambe a ve nye ô too njalan a nlatan amu binyiʼa a minsis.

²⁰ Nge mia be Krist mi nga wu mfaʼa mame ya si nyô, amu jé mia beta tabe e metiñe si, aval ane nge ényiñe jenan é ngenan é tii a si nyô

²¹ te nyoñ, te tyek, te nnambe.

²² Mam mete mese me too ve ajô ya e biôme bia ja ntuk mebelan: mebendé a miñyeʼelan be bôt mbie ñhe le.

²³ Be nga jaé yené ane mimfefek: mbunane môt émien, mboone mame ya mbunan bindeñelaʼa ya nyôl. Mame mete mese me ne foʼo ve zezé a ma volô ve mfaʼa ya ve minsôn avak.