KÔLÔS 1 - Bible en langue Bulu

Mebatan a mvean akéva

¹ Ma, Paul, nlômane Yésus Krist, amu nkômbane Zambe, bia Timôté mojañe bi too,

² ma tili mimfufup, bobejañe ya buni be ne Kôlôs kalate. Mvam a mvoʼé bi tabeʼe e be mia, bi soʼo e be Zambe Esaa wongan.

³ Bia ve Zambe akéva, Esaa Nti wongan Yésus Krist, e meyeʼelane mangan ya kom ése ajô denan.

⁴ Bi nga wôʼôtan ajô mbunane wônan mi bili be Yésus Krist, a ajô nyeʼan wônan mfaʼa mimfufube mise.

⁵ Amu ndi nleme ja yange mia e yôb été, nje é nga kateban e be mia a zene ya benya mejôô, Mbamba Foé a

⁶ nga kui be mia, aval ane a wume bibuma a mialan e si nyô ése, avale fe a bo be mia. Ataté e môse mi nga nyoñ a yeme mvame Zambe e benya mejôô bé été,

⁷ aval ane mi nga yéʼé e be Epafra mvôé jangan a ébe mbo ésaé a tyendé bia mvoʼé aval ane mbo ésaé Krist,

⁸ a nga liti bia avale nyeʼan avé Nsisim a fôʼô mia.

Meyeʼelan ajô keké; Krist a dañ

⁹ Amu ajô te, e mfaʼa wongan, ataté e môse bi nga wôʼô nalé, bi ne te jôʼé yeʼelan ajô denan. Bia jaʼé Zambe na mi jaé a ñyemane ya yeme nkômbane wé, a fek ése e Nsisim été.

¹⁰ Nde mia ye nyiñ ane da yian e be Nti, mi jeñe meseʼesaʼa mé. Amu mbamba mimboone mise mia ye bo, mia ye wume bibuma a yaé e nya ñyemane Zambe été.

¹¹ Mia ye yeme ngul e mezene mese a ngule ya étôtoʼo jé, nalé mia ye kui e mban a njibane meveʼele mese. A mevaʼa mese,

¹² vaʼan Esaa akéva, e nyô a nga ve mia ngule ya nyoñe ngab éliʼi mimfufup, éfufub été.

¹³ A nga vaa bia a ngu e ngule ya dibi a kee bia éjôé Mone ya nyeʼane wé;

¹⁴ e be nye, bi kôtébaneya, e mam abé mangan me ntoo njaman .

¹⁵ A ne éveʼelaʼa Zambe a ne te yené, ntôle mone ya bitétéa bise.

¹⁶ Amu biôme bise bi nga téban e be nye, e yôp été a e si nyô; e biôme bia yené a e biôme bi ne te yené, bito bi njôan a bijôé, bejôô a mengu. Biôme bise bi nga téban a nye, a bi ne amu nye.

¹⁷ A too ôsu ya biôme bise. A biôme bise bi tii e be nye.

¹⁸ A ne nlô ya nyôl, nje é ne keké. A ne atataʼa, ntôle ya bewômô miñwuan. Nde a nyoñ éto ya ôsu e mam mese.

¹⁹ Amu Zambe a nga yene mvaé ya tooé njalane ya mam mese e be nye,

²⁰ a late biôme bise a nye, a amu nye, e si nyô a e yôb été; amu a maneya ve mvoʼé a metyi ya Krôa jé.

²¹ A mia, mi nga too beyeñ e melu mvus, ba e mbe bete mbia mimboone miap mi nga dutu ayaa dé,

²² ve éyoñe ji, Zambe a lateya mia amu éwuwua nyôle mone wé, amu awu dé, mfaʼa ya bo mia na, mi yené mfuban , a tee bijô a mekua asu dé.

²³ Ve, da sili na, a zene ya mbunan, mi tebe ngu, te yeñelan, a bo te kañese na, mi jañele ndi nleme ya Mbamba Foé mi nga wôk, nye a nga katebane e be ététéa ése e yôbe si, nye ate ma, Paul, me ntoo mbo ésaé ya été.

Bisaé a mewosan me Paul

²⁴ Ma yen avaʼa dam éyoñe ji e minjuʼu ma jibi été ajô denan. A e jôme ja jemban ôlune Krist, ma jalé je e minsône miam été, amu e nyôle jé nje é ne keké.

²⁵ Me ntoo mbo ésaé ya été amu mbeʼe Zambe a nga kaʼa ma mfaʼa wônan, e ne na, e sondô nkatan ajô Zambe,

²⁶ e ndimba jam é nga baʼaleban nsolane nté ya miaé mi bôt, a nje éte Zambe a litiya mimfufube mié éyoñe ji.

²⁷ A nga kômbô bo na be yem afok a étôtoʼo ya ndimba jam éte ézezañe ya meyoñe me ne te yeme Zambe, e ne na Krist, ézezañe jenan, ndi nleme ya étôtok!

²⁸ E Nye bia kañete, bi boʼo môt ase ayemé, bi tyeñeleʼe môt ase ése, nde bia ye bo môt ase ane da yian e be Krist.

²⁹ E jam ma sôñ ésaé jam, a mewosane mam, a ngule jé ja bo ésaé e be ma, e nde ñhe le.