HÉBRE 6 - Bible en langue Bulu

¹ Ajô te nkelan ôsu a tôñe nyeʼelan wo yiane benya bôtô, te beta baʼalane nyeʼelane mame ya atataʼa ajô Krist. E ne na, nliʼan ajô biwuwua mimboon

² a mbunane Zambe, nyeʼelane ya nduan, mbetane mo, ñwômane miñwuan, a ntyiʼane mejô ya asuʼulan.

³ E jam bia ye bo e nde le, nge Zambe a kañese.

⁴ E voʼo bo na, e bôt be nga tame nyoñ éfufup môs éziñ, be tyeʼe mveane ya yôp, be nyoñe ngap ya mfufup Nsisim,

⁵ be wôʼô mvaé ya abui ajô Zambe a mengule ya éyoñ ja zu, ve be kpwelé.

⁶ E ne ayaé na be kôñelan éyoñe baa, e too na ba beta tyelé Mone Zambe élé yôp amu nkôñelane wop wo bo nye jôm ba ta.

⁷ Eyoñe si ja nyu mendime me mveñ ja noñ éyoñ ése, a faa biloʼo bia volô, e ba ba bo ésaé si éte, ja nyoñ ébotan jé e be Zambe.

⁸ Ve nge ja viane faa biyo a ndôé, ja ye bo tee mfi, bebé ya yoʼoban a suʼulane diʼiban.

⁹ Ve mia, a bôt ma nyeʼe, bia tuʼa buni a jô na, mi ne nya zene, e nyô ya nyian.

¹⁰ Zambe a nji bo ékotekot. A se ngule ya vuane mboone wônan a nyeʼan mi nga liti asu jôé dé, a bo mimfufub ésaé e melu mvus, a jaʼan a zu kui éyoñe ji.

¹¹ Ve bia kômbô na môt ase ya e be mia a ke ôsu a ve ngule ya bi ndi nleme ya meyaé mé a kui suk,

¹² teke tek, ve vu ba ba nyoñe ngap ya ngakaʼa, amu mbunan a ndi nlem .

Ngakaʼa Zambe a ndi nlem

¹³ Eyoñ Zambe a nga ve Abraham ngakaʼa, amu, e môte mfe a dañe nye a nji bo avale ya na a kane ngana asu dé, a nga kane ngana e be émien

¹⁴ a jô na: Yaa, ma ye jalé wo a bibotan, ma ye bo wo beta mvoñe bôt.

¹⁵ Eyoñ Abraham a nga bo mbane ya yange, ngakaʼa é nga tôéban e mise mé été.

¹⁶ Bôt ba kane ngana a jôé ya môt a dañe bebien. Mfaʼa ya mane bisô, nde be wôʼô kane ngana.

¹⁷ A zen éte, amu Zambe a kômbô liti bôte bebela ntyiʼane wé, a wôʼô kane ngana.

¹⁸ Avale te mame mebaé me ne tekaʼatyendé, e mme mete Zambe a se ngule ya laa minsos, ma ve bia beta ngule minlem, bia, e ba be nga liʼi mame mese, amu ngakaʼa ya ndi nlem .

¹⁹ Ndi minlem éte, é ne bia ane étyé ba telé je besitima ya nsisim , nya ñyemetane, nje ja tulan éndelé yat,

²⁰ e vôme Yésus a nga nyiine señe jangan ane asuzoʼo, a too beta ntuni nnôm éto, aval ane Mélkisédék.