HÉBRE 5 - Bible en langue Bulu

Hé 7:26-28; Eza 50:5-6

¹ E beta ntuni ase a nyoñeban a soʼo e be bôt a ne ntelane ya bo Zambe ésaé asu bôt. Esaé jé é ne na, a ve mimvean a metunaʼa, amu mam abé .

² Amu émien a ne mbômaʼane a meveʼele , a bili ngule ya yeme wôʼô ba be nji yem a ba ba kop.

³ Amu nalé a yiane ve metunaʼa ya abé mfaʼa wé émien a mfaʼa bôt.

⁴ Môt a nji yiane ve émiene duma te, ba nyoñe de amu nloon Zambe, aval ane a nga bo mfaʼa Aron.

⁵ Avale te fe Krist a nji ve émiene duma ya bo beta ntuni . A nga nyoñe de e be nyô a nga jô nye na: Ô ne mone wom, den, me biaéya wo,

⁶ avale fe ane njôan ôvoʼo na: O ne ntuni nnôm éto aval ane Melkisédék.

⁷ Nye ate, nté ényiñe wé ya si va a nga bo meyeʼelan a minjaʼan, a beta ntat, a milik e be nyô a mbe ngule ya nyii nye awu. A a nga nyoñ éyalane meyeʼelan, amu nsuan émiene si.

⁸ Mon, aval ane a mbe, amu mintaé mié, a nga yéʼé mewôk a bo njalane be émien.

⁹ Ajô te a nga bo tine nyiane ya nnôm éto e be ba ba wôʼô nye.

¹⁰ A Zambe a nga yôtane nye beta ntuni aval a ne Mélkisédék.

Edoʼo ya ényiñe mbunan

¹¹ Bi bili mam abui ya kobô ajô di, a mfaéan éfufup ya été ô ne ayaé, amu mi ne ôteʼetek ya wôk.

¹² Mi nga yiane bo beyeʼele a so ayab éyoñ. Ve mia beta yi na, be yeʼele mia mame ya atataʼa mejô me Zambe. Amu nalé mi ngenane mi yi ve menyañ, saa benyaa bidii.

¹³ Nyô ase a ngenan a yiʼane menyañ, a se ngule ya tuʼa fase jé é ne zôsôô , a jé é ne ékotekot. Amu a ne nkeñelé mon.

¹⁴ Ve benya bôtô ba di benya bidii, amu, a mbane ya bo nalé, be mbili ngule ya yemelane jôm é ne abé a ji é ne mvaé.