HÉBRE 4 - Bible en langue Bulu

Hé 10:35-39; Eza 26:3

¹ Ajô te, nkoone woñ, a za bo na, éyoñ ngakaʼa ya nyiin awoʼone dé éte é né, môt éziñ ya e be mia a ye yené na, a boya te nyiine de.

² Amu bi nga wôʼô Mbamba Foé avale fe ane bôte bete, ve foé be nga wôk é nji veʼele bo mvolan e be be. Amu éyoñ be nga wôʼô je, be nji nyoñe je a mbunan.

³ E bia bi buniya, bia nyiin awoʼone te été nde Zambe a nga kobô a jôʼô na: Amu me nga kane ngana ayaa dam été, bia ye kôme yen nge ba ye nyiin awoʼone dam été. Akôsa bo ésaé é nga mane boban a so mbôkaʼa ya si nyô.

⁴ Amu vôm éziñ, e mimfufup mintilan été, e ne njôban e môse zamgbwale na: Zambe a nga woʼone bisaé bié bise e môse zamgbwale.

⁵ A beta jô avale da e mintilan été na, ba ye bo te nyiin awoʼone dam été.

⁶ Nde amu ba be nga taté wôʼô Mbamba Foé be nji nyiine de été amu melo map, ve bôte bevok be ne nkañesane ya nyiine de été.

⁷ A beta telé môs ôfe den, a so ayap e mvus e kalate David bi maneya yen a jôʼô na: nge mia wôʼô tyiñe jé te boone minleme mienan ayet.

⁸ A na, nge Yasua a to ve bôt awoʼon Zambe a nga tiñeti, ve a nga ye bo te beta kobô mvus éte ajô môs awoʼon ôfe.

⁹ Ajô te môs awoʼon ôfe ô liʼiya, wo funane môse zamgbwale, mfaʼa bôte be Zambe,

¹⁰ amu nyô a nga nyiin awoʼon dé été, nye fe a nga woʼon ésaé jé, aval a ne Zambe a nga woʼon énjé.

¹¹ E mboʼone ñhe avôle ya nyiin awoʼon te été, nalé ate mbia éveʼela ate a ye bo te dutu môt éziñ e nkuan été.

¹² Amu mejô me Zambe me ne vevee a ngu. Me ne akap, a dañe ékpwelé é ne meyo mebaé. Ma tulan a kui vôm ényiñ a nsisim ba tôban, jaʼane mua me nyôl a foñe bives. Ma yemelan minkômban a minsimesane ya nleme môt.

¹³ Teke nteʼan jôm éziñ ô solô e mise me Zambe. Mame mese me ne soé e mise mé. Mese me bôô kayale asu dé, a nye ate bia ye yalane nye ajô mimboone miangan. Nde amu bi bili beta éwôlô Ntuni, nyô

Yésus Krist a dañe Minlô betuni ya nnôm élat

¹⁴ a nga tulane yôp, Yésus, Mone Zambe, e mbiane mmemane mbunane ngu.

¹⁵ E beta ntuni bi bili, a nji bo nyô a kate yem ateʼe dangan. Emien a nga tôbane meveʼele mevale mese ane bia. Ve a nji bo abé .

¹⁶ Ajô te e nsubaʼan éto njôane ya mvame bebé a ndi minlem, ane bia ye kooban éngôngo a yene mvam , nde bia ye nyoñe mvolan éyoñ ja yian.