HÉBRE 3 - Bible en langue Bulu

Yésus a dañe Môze a Yasua

¹ Ajô te, a mimfufup mi bobejañ, mia mi bili ngap nloone ya yôp, simesaʼane nlôman a beta ntuni ya mmemane mbunane wongan, Yésus.

² Nyô a nga telé nye, a too nye ndi, aval ane Môze a nga too e nda jé ése été.

³ Ve na e duma a nyoñ da dañe di Môze amu, mezene mese, nlôñe nda a wum a dañe nda ébien.

⁴ Nda ése é bili môt a nga lôñe je. A e nyô a nga bo mame mese, a ne Zambe.

⁵ Amu Môze a mbe étabe ndi ya ngume nda wé, aval ane mbo ésaé mfaʼa ya baʼale mame mese ma ye jôban e melu ôsu.

⁶ Ve Krist nye a ne mon, a too fe nda jé. Bia bi ne nda jé nge bia baʼale mbunan a ndi nlem bia vaʼa bie akekui asuʼulan. Nyiane ya awoʼone Zambe amu mbunan.

⁷ Amu ajô te, aval ane mfufup Nsisim a jô: den nge mia wôʼô tyiñe jé,

⁸ te boone minleme mienan ayet, aval ane melu me mbenane njôan a ôlun, e môse mebôbelaʼa e nkôte si,

⁹ éyoñ be éso benan be nga bôbôlô ma, a kômbô veʼele ma, a be nga yene mimboon miam nté ya mimbu mewôme nyiin.

¹⁰ Ajô te me nga yaa miaé bôt ôte. A me nga jô na: Asimesan dap da yale feñ éyoñ ése, be nji ke wôk e jame ma yange be be.

¹¹ Amu me kaneya ngana ayaa dam été na: Ba ye foʼo bo te nyiin awoʼone dam été.

¹² Tabaʼane ntye, a bobejañ, na, môt éziñe ya be mia a bi mbia nlem a ayete nlem da ye kandé nye baa vevea Zambe.

¹³ Ve lebaʼan môs ane môs , wua a nyô mbok, nté ôse e ne jôbane na: dene ya mimfufube mintilan a fombô bia, nde môt éziñe ya be mia a ye bo te bo ayete nlem a meduʼan me abé .

¹⁴ Yaa, bi ntoo bemvôé be Krist, nge bia tuʼa baʼale ndi minlem bi nga nyoñ aso atataʼa,

¹⁵ éyoñ e ne njôane na: den nge mia wôʼô tyiñe jé, te boone minleme mienan ayet, aval ane melu me mbenane njôan.

¹⁶ Nde beza mbe be nga wôk, a be nga soñe Zambe? Ye sa ba bese be nga kôlô Ejipte Môze a wuluʼu be?

¹⁷ A beza mbe a nga yaa be nté mimbu mewôm menyin? Ye sa ba be nga bo abé mbe bete mimbim mi nga ku nkôte si?

¹⁸ A beza mbe a nga kane ngana na, ba ye bo te nyiin awoʼon dé été, ye sa bôte melo bete?

¹⁹ A bia yene na, be mbe te nguleya nyiin amu ayete minleme dap.