HÉBRE 13 - Bible en langue Bulu

Melep mevale meva

¹ Nyeʼan ane bobenyañ ô yenéʼé zañe jenan.

² Te vuane mbamba nyoñane bôt. Amu a wô, bôt bevoʼo be nga nyoñ beéngele menda map, be te yeme nalé.

³ Mi simesaʼane ba be ne nda mimbôk, aval ane nge mia bebien mi ne mimbôk, mia be be. Simesaʼane fe ba ba wu ékpweʼele, aval ane nge mia fe le mia tôban ékpweʼele.

⁴ Aluk e bii ésemé e be bôte bese, a énoñ aluk é boʼo te mvin. Amu Zambe a ye tyiʼi bôte bijabô mejô a bebo mejian .

⁵ O zañe moné ô boʼo te jôô mia. Vaʼan abime mi bili, amu Nti émien a nga kobô na! Teke me yeʼe suu mia étam, teke me yeʼe liʼi mia!

⁶ Amu ajô te, a ndi nlem ése, bi ne jô na: Nti a ne mvolane wom, maa ye ko jôm éziñ woñ, môt a ye bo me jé.

⁷ Simesaʼane beliti zene benan be nga kate mia mbamba foé. Fombaʼan asuʼulane ya binyiñe biap. Vuane mbunane wop.

⁸ Yésus Krist a ne avale da angôʼé a den. A ye tabe nalé nnôm éto.

⁹ Te yalane feñ amu abui miñyeʼelan mia so atan. Amu e ne mvaé na, nlem ô bi ngu a zene mvam , saa a bidi; mbie bite bi nji bo mvolan e be ba be nga baʼale a tôñe mezene mete.

¹⁰ Bi bili ataʼa metunaʼa, nde bebo bisaé ya été be nji bi ngule ya nyoñe bidi biap été.

¹¹ Amu minsôn betit mmie beta ntuni a wôʼô kee metyi vôm a ne étyi mfaʼa metunaʼa ya abé mia diʼiban e nlam atan.

¹² Amu ajô te Yésus, mfaʼa ya fubu ayoñ a metyi mé, émien a nga wôʼô mintaé mbé ya nlam atan, a beʼe ôson wé,

¹³ e nkuane atan ya nlam a tôbane nye, bi beʼe ôsone vié.

¹⁴ Amu bi nji bi nlam ô too kom e si va. Ve bia jeñe nlam wo ye zu.

¹⁵ Amu nye, e mvaʼane Zambe étyiʼa nkañan éyoñ ése, nalé a ne na ébuma ya biyaé.

¹⁶ Ve da vuane mbamba mimboon a akap, amu avale mimveane te nde Zambe a yene mvaé.

¹⁷ Mi vaʼa betebe ôsu benan mewôk a tabe e njôane wobe si. Amu ba mombô éyoñ ése ajô minsisime mienan,

¹⁸ nde ba ye yalan ajô ya été. Boʼone na be bo jame te a mevak, saa a ntat, nalé a ye bo teke mvolan mfaʼa wônan, yeʼelan ajô dangan. Amu minleme miangan mi ne foʼo mfuban , a nkômbane ya wulu ane da yian éyoñ ése.

¹⁹ Boʼon, ma sili mia de éyoñ ése, nde ma ye jiʼa suuban a zu e be mia.

Minkômban a mebatan

²⁰ Nde Zambe ya mvoʼé , nyô a nga vaa beta mbaʼale mintômba miñwuan a metyi mʼélat é too nnôm éto, Nti wongan Yésus,

²¹ a vaʼa mia ngu e mfaʼa jam ese e ne mvaé na mi bo nkômbane wé, a boʼo be bia e mam a yene mvaé amu Yésus Krist nyô a nee duma nnôm éto a nnôm éto. Amen!

²² A bobejañ, ma sili mia na, mi jibi mejô ma lebe mia ma, amu ma te tili mia ômes ômes.

²³ Yemane na monyañ wongan Timôté, be suuya nye. Nge a jiʼa so, ma ye zu yene mia bia nye nsamba.

²⁴ Bataʼane ma betebe ôsu benan bese, a mimfufube mise. E ba ya Italie ba batane mia.

²⁵ Mvam é tabeʼe e be mia bese.