HÉBRE 11 - Bible en langue Bulu

Mbunane bôte ya nnôm élat

¹ Mbunan ô ne teke bisô ya jôme môt a too je ndi nlem , ô ne ñyenane ya yem e nlem été na, jôme te é ne, jaʼan é nji yené a mis

² Mbunan ñwô ô mbe bemvamba ya melu kôa ngaa e be Zambe.

³ Amu mbunan bia yeme na si nyô é nga téban a njôane Zambe. Amu nalé, e ne été na, tine ya biôm bia yené é nji bo e be biôm bia yené a mis.

⁴ Amu mbunan Abél a nga ve Zambe bityiʼa bia dañe mvaé a dañe mimveane mi kaéñ. A amu wô, nde a nga kalebane na a mbe zôsôô , a Zambe a nga seʼe mveane wé. A amu mbunan ôte, akôsa bo Abél a wuya, ve a ngenan a kobôʼô.

⁵ Amu mbunan Enok, a nga nyoñeban e yôp a saʼale awu, be te fe yene nye, amu Zambe a nga nyoñe nye. A ngenane te nyoñeban e yôp, a nga bili ngaa na, a mbe mvaé e mise me Zambe.

⁶ Amu nyô a subu Zambe bebé a yiane buni na, a ne, a na, a yaʼane ba ba jeñe nye.

⁷ Amu mbunan Noé, éyoñ a nga nyoñe foé Zambe mfaʼa mam me ngenane te tame yené, a nga semé je a lôñe ark ya nyii nda jé. Ane a nga ve si nyô mekua, a suʼulane bo nyoñe ngap ya zôsôô a so amu mbunan.

⁸ Amu mbunan, nye Abraham a nga yebe nloon, a nga bo mewôk a ke e si a nga yiane nyoñ ane ngap. Ane a nga ke, te yem mfaʼake.

⁹ Amu mbunan a nga tabe ane nneñ e si ya ntiñetan, a tabe nda éndelé baa be Izak a Yakob, be ébe benyoñe ngap ya ngakaʼa éte.

¹⁰ Amu a nga yange nlam ñwô ôte nyô a nga bôôé mbôkaʼa ya été, a ne Zambe émien.

¹¹ Amu mbunan, Sara, nye fe, akôsa bo nnôm, a nga bi maʼa ya beta biaé mvoñe bôt, amu a nga tabe ndi nlem e be nyô a nga kaʼa nye je.

¹² Amu ajô te fe bizuʼu bi bôt, aval ane ateté ya yôp, tekeʼalañé, avale fe ane nselek ô nee e nsaʼa mañ, bi nga so e be môte wua, valé nye ke a ntoo ane mbim.

¹³ Bese be nga wu be buniʼi, be ngenan te yene ntôébane ya e mam me mbe be nkaʼan. Ve be nga yene me a sôô me ôyap, a yeme fe na be mbe beyeñ a bewulu dulu e si nyô.

¹⁴ Amu e ba ba kobô avale mame te ba liti ne ngeññ na ba jeñe si é ne énjap bebien.

¹⁵ A nge be nga ye nyamete nyô be nga so, be nga ye fe bi éyoñe ya beta bulan.

¹⁶ Ve ba dañe kômbô si ja dañ abeñ, e nyô ya yôp. Ajô te Zambe a nji wôʼôson ya lobane Zambe wop. Amu nalé, a kômeya be nlam.

¹⁷ Amu mbunan Abraham, éyoñ a nga veʼeleban, a nga ve Izak ane étyiʼa, atyiʼi mone dé, a to ke na, a nga nyoñ mengakaʼa,

¹⁸ a be nga jô nye na: E be Izak nye mvoñe bôt ja ye so e be wo.

¹⁹ Jaʼane ñwuan, ôsimesan wé été a nga buni na Zambe a ne ngule ya wômôlô nye, ane a nga beta bi mone wé, aval ane a nga simesan.

²⁰ Amu mbunane fe, Izak a nga botane Yakob a Esô ajô mame ya e melu ôsu.

²¹ Amu mbunan Yakob a mbeme wu, a nga botane mon ase ya bone be Yôsep, a yeʼelaʼan, a yeʼe e sôsoʼo ntum wé.

²² Amu mbunan, Yôsep éyoñ a ntoo bebé ya wu, a nga simesan ajô nkôlane bone be Israél a ve be abendé ajô bivese bié.

²³ Amu mbunan Môze, éyoñ a bialéya, a nga solébane ngon éla e be bebiaé bé, amu be nga yene mone wop a to abeñ te ko atiñe njôô bôte woñ.

²⁴ Amu mbunan Môze, éyoñ a nga bo nya môtô, a nga ben a lobaʼane mone ngone Faraoñ,

²⁵ a nga top ñwuan ékpweʼele baa be bôt be Zambe a dañe na, a vôman abé été étun éyoñ.

²⁶ A nga yene nsilibane si Krist ane akum da dañ a lôte bitôtoʼo bi mame ya Ejipte. Amu e mise mé me nga beme ve maʼan a ye nyoñ.

²⁷ Amu mbunan a nga kolô Ejipte te ko ayaa njô bôte woñ, a, aval ane môt, nyô a ne te yené, a nga tebe ne bip.

²⁸ Amu mbunan a nga jem abôʼô Pak a mmiamane metyi, ane ñwôé bôt a ye bo te nambe mintôle mi bon be Israél.

²⁹ Amu mbunan, be nga dañ évele mañ ane ba wulu nkôte si, ve éyoñ bôte ya Ejipte be nga veʼele dañ, be nge nyoñ été.

³⁰ Amu mbunan, mimfin ya Yérikô mi nga ku éyoñ be maneya tyiñelane mie tañe melu zamgbwa.

³¹ Amu mbunan, Rahab minga bijabô a nji wu ébaman a bebiasé Zambe, amu a nga solé beloé si ya Israél.

³² Ma ye beta jô aya? Teke éyoñe ya taʼasan ayôme mam ese, ajô Gédéoñ, Barak, Samson, Yefté, David, Samuel a bekulu mejô,

³³ ja jembane ma, e mbe bete, e ntee mbunan, be nga nyoñe mesi, a yemete mboone zôsôô , a yene ntôéane mengakaʼa a mise map, a dibe menyu bengbwengbwem,

³⁴ a dime ngule nduan, a fame akap nkpwaté mekôn. Be beta nyoñe ngu e mvus ôkon a yené miñyôyok a bewosan. Be titane minsamba mewosan bejin.

³⁵ Binga be nga beta bi e bôt bap be nga wu amu ñwôman. Ve bevok be nga ben nkôtan a jibi awu, amu be nga kômbô ñwôman wo dañe mvaé mvaé.

³⁶ Bevok avale da, be nga jibi meveʼele mi ékpweʼele a minkasa, e ma me nkaʼane ngataʼa a nda mimbôk.

³⁷ Be nga lumbane mekok a siʼiban a zik. Be nga wôéban a njian ôtyeñ. Be mbe bewulu dulu, be beʼe mengômesane bikôp mintômba nge mimvot mintômba. Be nga wu ékpweʼele a étibelaʼa. Enyiñe si é nji yiane be.

³⁸ Be nga ke ba ndeñ nkôte si a e minkôle yôp, e mekôme yôp a e mimbile mi si.

³⁹ Bese, nge be nga bili mbamba nkañete, a mbe mbunane wop, valé be ngenane te bi e mam me mbe be ntiñetan.

⁴⁰ Amu Zambe a nga kôm e mam ma dañe mvaé e mfaʼa wongan, a nga bo te kañese na be bo ngumba mvoʼé étam, tee bia be be fufulu.