HÉBRE 10 - Bible en langue Bulu

Susuʼa benya metunaʼa

¹ Metiñe beyude me nji bo njalan a nya éveʼela ya benya biômô. Me ne ve nsisiñe ya mbamba be mam ma zu e melu ôsu. Me voʼo bo ba ba subu Zambe bebé nya mvoʼé . Me ne bo de aya a metunaʼa me ne éyoñ ése ve avale da, a ma vebane mbu ane mbu?

² Nge ba ba kañe Zambe avale te be nga ye bo mfuban éyoñe jia mfaʼa ya minkobane miap, ve be nga ye jôʼé mveane metunaʼa.

³ E jam e né e ne na metunaʼa ma volô bôt na be simesane mam abé map mbu ane mbu.

⁴ Amu metyi beyôme bikela me se ngule ya vaa mam abé .

⁵ Amu ajô te Krist éyoñ a nga nyiine si nyô, a nga jô Zambe na: ô nji kômbô étyiʼa, nge mvean; ve ô nga ve ma nyôô.

⁶ Ô nji kañese mvean ba diʼi ngumba, nge bityiʼa asu abé .

⁷ Eyoñe me nga jô na: Ô lôô, ma zu, e mvulekane kalate été, e ne ntilan ajô dame na, asu ya bo nkômbane wôé, a Zambe.

⁸ A taté jô na: ô nji kômbô a ô nji kañese nge bityiʼa , nge mimveane ya mefup, nge mimvean ba diʼi ngumba, nge bityiʼa asu abé mbie bia veban ane metiñ ma jô.

⁹ Wôna a jô na: Tame yen, ma zu asu ya bo nkômbane wôé. Nalé a ne na a tyam nkañan ôsu a telé wu baa.

¹⁰ E nne bi nga tuneban a zene ya nkômban ôte a mveane nyôle Yésus Krist éyoñe jia ya biyoñe bise.

¹¹ Ntuni ase a tebe tetele môs ôse a bo bisaé bié, a ve avale metunaʼa da mbane mban, mme mete me se nguleya vaa mam abé .

¹² Ve nye, éyoñ a maneya ve susuʼa metunaʼa ése, a tabe si mbo nnôme Zambe nnôm éto.

¹³ A taté éyoñe te, a yange na besiñe bé be silibane si a bo ételé mebo jé.

¹⁴ A zene ya avale metunaʼa étam a nga bo ba a nga fubu ngume nya mvoʼé nnôm éto.

¹⁵ Jame te nde Mfufup Nsisim a kate bia. Amu éyoñ a maneya jô na:

¹⁶ élate ji nje ma ye lat a be e mvuse melu mete. Nti a nga kobô na: éyoñ ma ve metiñe mam, ma ye tili me e minlem a asimesane dab été.

¹⁷ A ma ye bo te beta simesane mam abé map.

¹⁸ Amu vôme njaman wo yené, be nji beta bo mimvean amu abé .

Melep asu ñyemane ngu e mbunan été:

¹⁹ Ajô te, a bobejañ, amu bi mbili nya ndi nleme ya nyiine vôm a ne étyi amu metyi me Yésus,

²⁰ bi bili mfefé zen a nga yoé bia, wo tulan éndelé zañ, e ne na, e nyôle jé.

²¹ Amu bi bili éwôlô ntuni ntelane nda Zambe,

²² e nsubaʼane ñhe bebé e be Zambe a minlem mi ne tee meduʼan, a nya mbunan a minleme mfuban teke bijô e mone môt ya nlem été a menyôl me ne nsôban a mfubane mendim.

²³ E ntukaʼa biane ndi minleme jangane ngu amu bia buni na, Zambe a ne nyô a tôé mintiñetane mié.

²⁴ E mombaʼan, wua asu ba bevok, a volan, a liti nyeʼan a mboone mam me ne mvaé.

²⁵ E mboʼone te jôʼé fulu ya sulane vôme wua aval ane ba bevok ba bo. Ve bia yiane leban, a dañedañ na mi lôô e môse Nti ô ntoo bebé.

²⁶ Amu nge bia vañe bo abé éyoñ bi maneya yeme benyaa mejôô, metunaʼa mefe ajô abé me nji fe bo.

²⁷ A liʼi foʼo bia ve angôndô ntyiʼane mejô a ayôñe nduan da ye diʼi bikangekange.

²⁸ Ye môt éziñ a tyame metiñe me Môze? Teke nkoon éngôngo nge bengaa bebaé ba boʼolô, a ne foʼo nye ve awu.

²⁹ Abime mbia ayaa avé, éyoñ mia tuʼa simesan, da ye yiane nyô a tibi Mone Zambe a mebo éyoñ a ndaman metyi ya élat, e mme mete a nga tuneban a me, a biasé Nsisime mvam ?

³⁰ Bia yeme de, nyô a nga jô na: Akunaʼa e ne éndam, ma ma ye yaʼane bôt! A na: Nti a ye tyiʼi bôte bé mejô.

³¹ E ne angôndô ya ku e mo me vevea Zambe.

³² Simesaʼane binyiñe bienan e melu mvus. Angôndô adit a mintaé mewosan mi nga jibi éyoñ mi maneya bi éfufup.

³³ Eyoñ éziñ mi nga wu meta a ékpweʼele, éyoñ éziñ mi fulan a ba ba tôbane mame mete.

³⁴ A mi nga nyoñe ngap mintaé, mimbôk, a kañese jañele akume denan a mevak a ndi nlem na mia ye nyoñ akum da libi da dañ abeñ.

³⁵ Te jañelane ndi minleme jenan, é bili beta be maʼan.

³⁶ Da sili na mi bi abui njiban nde mia jalé nkômbane Zambe, a nyoñe jôme ngakaʼa.

³⁷ A liʼiya ve ôyôme nté wôna, nyô a zu a ye so. A aa ye ke langan.

³⁸ E zôsôô môte wom a ye nyiñ a mbunan. Ve nge a bulane mvus, nleme wom wo ye bo te yene nye mvaé.

³⁹ Ve bia, bi nji bo ba ba bulane mvus a sup, ve ba ba buni amu nyiane ya minsisime miangan.