HABAKUK 3 - Bible en langue Bulu

Meyeʼelan me nkulu mejô Habakuk

¹ Meyeʼelan me nkulu mejô Habakuk a nga yeʼelan me too ane jia du:

² A Nti, me wôʼôya jam ô nga jô, a Nti, ma ko mimboone mi mam miôé woñ kelʼôsu a bo nalé mimbu mia zu! Ane mimbu mia lôt, boʼo na bôt be yeme mie ve ayaa dôé été, ô simesaʼane nkoon éngôngole wôé.

³ Zambe a so Téman, Nyô a nʼétyi a so nkôle Parañ. Nyô a nʼéjijin a buti yôp, si ése é jaéya a duma dé.

⁴ A faé anʼéfufup; minkôkô mia téé nye wo; ngule jé é solô nje le!

⁵ Ebubua ôkon ja wulu nyʼôsu, ôkone tit wo so nye mebo si,

⁶ a tebe a veʼe si. A fombô a bo na meyoñ me bôt me siʼan; minkôle mi too nnôm éto mia kandan, a bone minkôle ya melu kôa ba nyemé. Avale te fe bone mezene ya melu kôa.

⁷ Me lôô menda bindelé ya Kusan me ntoo zesé jôm, bitabaʼa ya si Madian bia fôʼôban,

⁸ Ye Nti a yaa asôé? Ye ayaa dôé da fombô asôé? Ye ayoʼo dôé da fombô mañ, éyoñ wo bet e bikabela biôé yôp, e bevagoñe bôé yôp?

⁹ Mfane wôé ô ntoo nsoé, mengana môé me ne mekoñe ya nkobô wôé. Wo sale si a asôé.

¹⁰ Minkôle mia yene wo ve fôʼôban, ôkôse mendim wo lôt, édoʼo yee ja bete tyiñe jé a bete mo mé yôp.

¹¹ Jôp a ngon ba tebe vôme wua, ba taté dulu a éfufube ya mekoñe môé, a minkôkô ya akoñe dôé.

¹² Wo tyiʼilane si a ayoʼo ese, wo koʼo meyoñ me bôt a ayaa ese,

¹³ wo kui atan asu ya nyii ayoñe bôte dôé, asu ya nyii e môte wôé a ne ñwoʼone mbon. Wo buʼu ôtondé ya nda mbo mam abé , wo tyame je ne meñ.

¹⁴ Wo tube nlô bivete biap a mekoñe mabe mebien, mme ma kubu ma nyô anʼôkôs asu ya buʼu ma, be beteʼe metyiñ a mevak, avalʼane nge ba min éngôngole môt asoé.

¹⁵ Ô yoéya bikabela biôé zen e mañ, e avise beta mendim été.

¹⁶ Me wôʼôya, a biôme yʼabum été bi liʼibaneya, éduñe te é boya na biyaé biame fe bi fôʼôban. Bivese biam bi nga mane duñ, ma nyeñeban teke fôʼôsan, me yangeʼe môs ôlun, ñwô môt a dili bita a ye zu wosane ayoñ.

¹⁷ Amu figié aa ye ke beʼe sam, teke nkôane bibuma e mefub mindiʼi mi woon. Nwuman ôlivié a ye wum wo ye bo ateʼe nyô, mefup ma ye bo te yô bidi, mintômba a bikela bia ye man e mebemba été. Nalé fe teke benyak e mevôme map be wôʼô di.

¹⁸ Ve ma ma ye vak e be Nti, ma ye fôn e be Zambe ya nyiane wom.

¹⁹ Nti, éñwom, a ne e ngule jam, a kôñelane mebo mam me funane ma minkok a a bo na me wulu mevôm me nʼôyabe yôp. A évete beyia bia! E jia ji é yiʼabaʼan a memvet.