HABAKUK 2 - Bible en langue Bulu

¹ Ma fe ma zu tebe e vôm me wôʼô mombô. Ma zu tebe ôzomezome nda yôp. Ma zu fombô, me yene jame Nti a ye jô ma a jam ma ye yalan ajô ya minjaʼane miam.

Eyalane Nti

² Ane Nti a nga yalane me na: Tiliʼi ñyenan jam, kpwele de e mekok , éyoñe te ba ye lañe wô tyiʼibi tyiʼibi.

³ Amu ñyenane te ô bili ngum éyoñ ô ne ntelan. Nyenane te ô mbeme tôéban teke meduʼan. Nge wo bo te jiʼa tôéban, yangeʼe, amu wo ye foʼo tôéban, teke selan. A éyoñe ya ntôéban ja ye bo te subu ôsu.

⁴ Tame yene nleme ya môt a tibili bôt ô ne mvusan, ô se ke zôsôô abume dé été, ve zôsôa môt a ye nyiñ amu mbunane wé.

Mevale biyoʼé metan

⁵ E ne bebela na woon a ne nkoñe bôt. Nalé fe môt a ne mebun teke tabe ne séé, a ndamé éngoñe jé ane vôme ya miñwuan, a ne teke jaé ane awu. A dutu meyoñ me bôt mese e bʼémien,

⁶ ye balé bete bese ba ye bo te bo nye jôme nkana ? Jôme éwovioé a asoé ba? Ba ye jô na: Bidim a môt a kôane biôm Bi nji bo émbié. A kui éyoñ évé? Za a beté adite mbeʼe ya memvôla mé!

⁷ Ye bôt ô bili memvôla ba ye bo te kôlô si atemetem? Ba ba ye fôʼô wo, ye ba ye bo te vee ôyo? Wo ye bo jôme jabe ya nsa!

⁸ Amu ô nga sa meyoñ me bôt abui, ajô te meyoñ me bôte mevoʼo mese ma ye sa wo, amu metyi me môt, amu évô ô nga bo e si jangan, tison a bôte bese be too été.

⁹ Bidim a môt a jeñ ékotekote mvaé asu ya nda jé, nalé ate a ye lôñe dumbaʼa dé e mebôbône minkôle yôp na bidim bi bo te kui e vôm a né.

¹⁰ Yene na ô tyiʼiya asu ôsone ya nda jôé; éyoñ ô nga wôé abui meyoñ me bôt ényiñe jôé le ô nga selan.

¹¹ Amu akok da yôn e mfine nda , a ntuʼa wo yalane de e mfaʼa ya andil.

¹² Bidim a môt a lôñe tison a nkulane metyi, nyô a lôñe tison a mboone mbia be mam.

¹³ Ye jame di e nji so e be Nti ya minsamba mewosan na: Meyoñ me bôt ma jalé mebien njuk asu nduan, a minsamba mi bôt mia wu njuʼu zesé?

¹⁴ Amu si nyô ja ye jaé a ñyeman étôtoʼo Nti, avale fʼane mendim ma yandan édoʼo mañ.

¹⁵ Bidim a môt a nyuu môt ba nye be too jôm a te sôé nsu, a bo nye na a sok a tebe sôsoé!

¹⁶ Yeme na ô jaéya a ôson, sa ñhe a duma; womiene fe ô ntoo ve nyu a tebe sôsoé! Elaé ayaa Nti ya mbo nnôme wé ja ye kôñelan abé be wo; duma dôé da ye bili ôson!

¹⁷ amu évô ô nga bo Libañ ja ye late wo a abuk, a jôme mimbame betite miôé mi nga tibi ja ye buʼu be a woñ, amu nkulane metyi me môt, amu évô é nga boban e si, e tison a e be bôt be too été.

¹⁸ Ngunemelan ja volô jé ane mbo biôm a mo a kpwele je, nalé fe éveʼela é ne mboon a nyeman étyé ja yeʼele minsos. Ane môt a nga bo je a tabe je ndi a kui vôme ya bo azezambe e ne teke kobô?

¹⁹ bidim a nyô a jô élé na: Tebeʼe tetele! A akoʼo e too évôle na: Veʼe ôyo! Ye akoʼo te e ne yeʼele jôm? Toʼo e bili or nge argent. Te kʼéveʼelaʼa nsisim akoʼo te e bili.

²⁰ Ve Nti ke a ne e Nda Zambe jé é nʼétyi, si ése é kpwaʼa ne kubuk asu dé!