HABAKUK 1 - Bible en langue Bulu

¹ Mbeʼe nkulu mejô Habakuk a nga yen.

Nkulu mejô a loone Zambe na a volô nye

² Ma ye loon a kui éyoñ évé a Nti, wo teke wôk? A kui éyoñ évé ma ye yône na: Evô, wo teke nyii ma?

³ Amu jé wo kañese na me yen abé ? A amu jé wo yen étibelaʼa vʼa mis? Endaman a évô bi ne ma ôsu, ntañete ô ne, a meluman ma boban.

⁴ Ajô te metiñ me ntoo atek, a nya ntyiʼane mejôô a nji fe bo, amu mbo abé a miate zôsôa môt, ajô te ékotekote ntyiʼane mejô é né.

Zambe a yalane Habakuk

⁵ Fombaʼan e meyoñ me bôt été, yenan a kam beta nkaman, amu melu menane ma, môt éziñ a bo ésaé, ve mi se nguleya buni nge ba kate mia je.

⁶ Mi lôô! Ma zu soo Bekaldééñ, e bôt be ne te éngôngo, ve be too njet, ba tyiʼilane mesi, a wôlé éza menda.

⁷ Ayoñe te e ne angôndô a éko woñ, ébien da tyik abime si da yiane nyoñ.

⁸ Bikabela bié bia mate a dañe beze, ayoʼo fe a dañe mekamenyañ ya mamengôʼé. Bewulu bikabela bé ba sôʼôlô dulu ôsu, éyoñ ba zu ôyap, ba yele vʼane vôme ndôé ja bi jôm a ye di.

⁹ Bôt bete bese ba zu asu évô; asu dap é dene vʼôsu, ba bo bôt ba bi minkôm, vʼane nselek.

¹⁰ Ba biasé bejô bôt, be lôô bone bejô bôt ve bivôé. Olem ôse ô ne fe be ve bivôé. Ba bo avise tyia a nyoñe de éyoñe jia.

¹¹ Mvuse ya valé, ba beta vumelan avale mboone mame dap, e zambe wop a ne ve ngule jap.

Nkulu mejô a beta loone Zambe

¹² Ve wo, aso nnôm éto ye ô nji bo Nti, nyô a ne Zambe, éñwom a nʼétyi? Bia ye bo te wu! A Nti, ô nga telé nye na a bo ntyiʼi mejô; a akôme dam, ô nga yemete nye na a ve bôte melep .

¹³ Mise môé ma dañe mfuban Ndʼô se nguleya jibi yen abé . Ô se nguleya fombô ékpweʼele. Amu jé ñhe wo fombô bekoñe bôt, a tabe évô éyoñe môt a ne abé a mine nyô a dañe nye zôsôô ?

¹⁴ Wo belane bôt ane kose ya mañ, ane bone betit be ne te bi njôô.

¹⁵ A dutu bese a nnop, a dutu be avote dé été, a kôane be e tane jé été, éyoñe te a vak a fôn.

¹⁶ Mvus éte a ve avote dé étyiʼa, a ve fe tane jé ôlobinda, amu mbie bia ve ngabe jé anen, a ve fe nye bidi abui.

¹⁷ Ajô te ñhe ye a ye mane vaa biôm bise bi ne avote dé été, a ke ôsu a jiane meyoñ tekʼéngôngo?