GALATI 6 - Bible en langue Bulu

Volavolane bebuni , mboone mvaé

¹ A bobejañ, nge da kui na ba dilane môt éziñ a boʼo abé , mia bôte ya Nsisim mi betaʼa sôane avale môte te zôsôô , a nsisime ya évôvoé; ve ô tabeʼe ntye, amu womien fe ô ne ngule ya tôbane meveʼele .

² Mi bekaʼane mimbeʼe mi ba bevok, nalé ate mia ye jalé metiñe me Krist.

³ Amu nge môt a buni na a ne jôm éziñ, éyoñ a nji bo je, a duʼu émien.

⁴ Ve môt ase a fombôʼô mboone wé; nde, nge a yene éfia ya wumu je, da ye bo ve mfaʼa wé émien, saa mfaʼa môte mfe.

⁵ Amu môt ase a yiane beʼe mbeʼe wé émien.

⁶ E môt ase a nyoñe ñyeʼelane ya ajô Zambe, a vaʼa ngab éziñe ya biôme bié e be nyô a yeʼele nye.

⁷ Te duʼuban, Zambe a nji bo nyô ba kpweʼele, amu jôme ése môt a mias, nje fe a ye kôan.

⁸ Nyô a mias mfaʼa ya minsône mié émien, a ye kôane bibuma minsôn mia wum, e ne na, awu. E môt a mias mfaʼa ya Nsisim, a ye kôane bibuma Nsisim a wum, e ne na, ényiñe ya melu mese.

⁹ E mboʼane mvaé te tek. Amu bia ye kôane e mbamba éyoñ, nge bia bo te kat.

¹⁰ Nde, nté bi bili éyoñe ya bo, e mboʼon ésaé mfaʼa mvaé bôte bese, e dañedañ, e ba be ne ba ya nda mbunan.

Krôa Krist a mfefé ététéa

¹¹ Tameka yenan akaʼa beta bikanga ma tili mia ba a wo wome mamien!

¹² E bôt ba kômbô bo miñyené mfaʼa ya minsôn, mbe ba tindi mia ajô ntyiʼibane metye. Susuʼa jam ba sôñ a ne na be saʼale ékpweʼele ajô Krôa Krist.

¹³ Amu e ba bebien be nga tyiʼibane metyele bete, be nji baʼale metiñ. Ve ba yi mfaʼa wônane na, mi tyiʼibane metye, nde ba ye nyoñe duma dap, amu minsône mienan.

¹⁴ Ve mfaʼa wom, teke bebé, teke jam afe ya wume de, vengevenge ve Krôa Nti wongan Yésus Krist. A Krôa éte, si nyô é ne ntyeléban mfaʼa wom, aval ane me fe me ne ntyeléban mfaʼa si nyô.

¹⁵ Amu saa ntyiʼane atyel ñwô ô ne mfi, nge tee ntyiʼan, ve mboban mfefé ététéa.

¹⁶ Mvoʼé a mvam bi ne be ba ba tôñe njôan ôte. Jaʼane be Israél Zambe.

¹⁷ A taté éyoñe ji, môt a boʼo te beta ndeñele ma. Amu me me beʼe bifele bi Krist e nyôle jam.

¹⁸ A bobejañ e mvame Nti wongan Yésus Krist é tabeʼe be minsisime mienan. Amen!