GALATI 5 - Bible en langue Bulu

Nsubane mvam

¹ Amu ajô ya tuʼa bo beti, nde Krist a nga kôté bia. Tebaʼane ñhe ngu, te beta bili ébôñeté ya éto belo si.

² Ma Paul, ma kobô mia de. Nge mia beta tyiʼibane metye, Krist a ye bo te beta volô mia jôm.

³ Ma beta bendé môt ase a tyiʼiban atyele na, a ne ntindane ya baʼale metiñe mese.

⁴ Mia kandane Krist nge mia jeñe zôsôô wônan e metiñ été. Mi subeya mvam .

⁵ Ve bia a zen ya Nsisim amu mbunan, nde bia yange ndi nlem ya zôsôô wongan.

⁶ Amu mfaʼa nyô a nee be Yésus Krist, mfi ô nji bo ntyiʼane atyel, nge tee ntyiʼane atyel. Ve mbunan wo bo ésaé a nyeʼan.

⁷ Mi nga bo mi tôñe mvoʼé , za a nga bo mia na mi jôʼé ve benya mejôô mewôk?

⁸ Ndutan ôte, ô nji so e be nyô a loone mia.

⁹ Oyôme mvusu wo vusu ngum ébañ ôse!

¹⁰ Mfaʼa wônan, me too ndi e be Nti na, mia ye bo te tôñe zene fe. Ve nyô a miase lubulubu zañe jenan a ye nyoñe melep , jaʼane a ne za nge za.

¹¹ Ve mfaʼa wom a bobejañ, nge ma beta kate foé ya ntyiʼibane metye, ma beta wu ékpweʼele amu jé? Eyoñ éte nkolan ôbaʼa ya élé wo ye bo momo!

¹² E ba ba bo nzametaʼane zañe jenan, be kômeʼe ke tyiʼibane metye nya ntyiʼibane.

Wulaʼan a Nsisim sa a minsôn

¹³ Mia a bobejañ, mi nga loban amu éto beti, ve jame da, éto beti éte é boʼo te ve minsône fet ya nyiñ ane mia kômbô. Ve, a zene ya nyeʼan, boʼone bebo bisaé ya ba bevok.

¹⁴ Amu metiñe mese ma jaléban éfia jia jina été na: Wo ye nyeʼe môte mfe ane wo nyeʼe womien.

¹⁵ Ve nge mia lôan, a diane mia mia, tabaʼane ntye. Mia ye wôan, bana a ba bevok.

¹⁶ Vôʼôlane ma: wulaʼan a ngule ya Nsisim, nde mia ye bo te bo nkômbane ya minsôn.

¹⁷ Amu minsôn, e minkômbane mié été, mia wosane Nsisim. A Nsisim wo wosane minsôn. Ba siane zañe jap, avale ya na, mi bo te bo nkômbane wônan.

¹⁸ Ve nge mia wulu a Nsisim, mi nji fe bo metiñe si.

¹⁹ Ba yeme mimboone mi mame ya minsôn, mi ne na: Ebamba, mvin, ôdoʼé mbia mvô,

²⁰ nkañane bezambe befe, bemviʼi, ziñ, ntañete, mbia aban , ayaa, mesengan, metyamaʼane, mbia mengam,

²¹ miñyamete, nsoʼone bilam, mbia ndian a mam mefe avale te. Ma kate mia, ane me nga mane jô de na, e ba be ne bebo avale mam ete ba ye bo te nyoñe ngab éjôé Zambe.

²² Ve ébuma ya Nsisim é ne na: Nyeʼan, mevak, mvoʼé , njiban, zôsôô , mvam , mbamba nlem , mbunan,

²³ évôvoé, njôane nlem . Atiñ da wosan avale mame te e ne momo.

²⁴ E ba be ne ba be Krist, be tyeléya minsôn élé yôb a fulane mbia miñyiane mié a ayôñ minkômbane dé.

²⁵ Nge mia nyiñ a Nsisim, wulaʼane fe a ngule Nsisim ate.

Atiñe Krist

²⁶ E mboʼan te bo mebun e zañe jangan, a te soñ mintañete a minyamete wua a nyô mbok.