GALATI 3 - Bible en langue Bulu

Mekute me bôte ya Galati

¹ A mekute me bôte ya Galati, za nye a nga ndumekane mia, éyoñ e ne na, Krist ntyelan élé yôp, a nga kañeteban e mise menan été?

² E jame dina étam nde faane ma éfufup: ye amu mbaʼalane metiñ nde mi nga nyoñe Nsisim? Ye e nji bo amu ñwôʼane mi nga wôʼô Mbamba Foé ya mbunan?

³ Ye mi ne akaʼa nkôñ mekute te? Mia mi nga taté a Nsisim, ye mia ye ke sondô a minsôn?

⁴ Ye abime ñyemane te e mbe zezé? A na, nge ô mbe zezé,

⁵ nyô a ve mia Nsisim a bo bitua bi mam e zañe jenan, ye a bo mam mete amu mbaʼalane metiñ? Ye sa amu mi nga wôʼô Foé ya mbunan?

Ebotane bebuni amu Abraham

⁶ Amu Abraham a nga bili mbunane be Zambe, ane ô nga lañebane nye mfaʼa ya zôsôô ,

⁷ yemane ñhe na, bebuni , mbe be ne bone be Abraham.

⁸ E ne fe na, ntilan wo taté yené ôsu na, Zambe a ye kale bikuu ve a zene ya mbunan. A nga taté kate Abraham foé éte na: Meyoñe mese ma ye yen ébotan e be wo.

⁹ Ajô te ba be ne bebuni , be bili bibotan baa be Abraham, mbuni.

¹⁰ Ke bebaʼale metiñe bese, be ne e biyoʼé si. Amu e ne ntilane na. Biyoʼé bi boʼo e be nyô ase a nji ke ôsu a baʼale mame mese me ne ntilane kalate metiñ.

¹¹ A e ne teke bisô na, teke môt a ye kabe amu metiñ asu Zambe, éyoñ e ne na, e môt a ne zôsôô amu mbunan nye a ye nyiñ.

¹² Amu na metiñ me nji so e mbunan. Ve mfaʼa metiñ, nyô a jalé mintilane mise ya été a ye nyiñ a me.

¹³ Krist a nga mane yaʼane señe jangan mfaʼa ya kôté bia e biyoʼé ya metiñ, a a nga bobane biyoʼé e señe jangan, ane e ne ntilane na: Biyoʼé bi boʼo e be nyô ase a tyele élé yôp.

¹⁴ E nde te ébotan Abraham ja ye kui e be bikuu amu Yésus Krist, ane bi ne ngul ya nyoñe Nsisime ya ntiñetan amu mbunan.

Ngakaʼa, a ésaé metiñ

¹⁵ A bobejañ, bi tame fombô a yen ane bôt be wôʼô zu ba bo mam. Eyoñ kalate nkaban élik a ne ngômôtô, teke môt a ne tyame nkaban ôte nge kôʼôlane wô.

¹⁶ E ne na, mengakaʼa me nga boban e be Abraham a mvoñe bôte jé, aval ane nge a mbe ajô ya abui bôt, ve a mbe ajô môte wua: a mvoñe jôé, e ne na Krist.

¹⁷ Osimesane wom ñwô wu: kalate nkaban élik a ne mvoʼé a nga taté mane boban e be Zambe. Atiñ e nga so mvuse mimbu mintete minyin a mewômela, e nji bo ngule ya bo ngakaʼa momo.

¹⁸ Amu nge éliʼi ja nyoñeban amu metiñ, e nji fe bo a zen ya ngakaʼa. Amu Zambe a nga mvamane Abraham amu ngakaʼa.

¹⁹ A taté éyoñ éte, metiñ me ma beta fe volô jé? Ma baʼaban a kôʼôlan foʼo ve na, ntyamane metiñ ô yené nté ma yange nsoone mvoñe bôt, nje éte ngakaʼa é nga tiñetiban. Ngakaʼa éte é nga kateban a zen ya bʼéngele, a wo ya ntebe zañ.

²⁰ Amu ntebe zañ ate a nji bo ntebe zañe ya môte wua. Ve Zambe a ne wua.

²¹ Ye metiñ ma wosane mengakaʼa me Zambe? Teke bebé: nge atiñ éziñ e nga veban, e nde e bili ngule ya ve ényiñ, wôna zôsôô a nga ye so metiñ.

²² Ve mintilan mi nga liti na, si nyô ése é ne nkôm abé si, nde, amu mbunane ya buni Yésus Krist, ngakaʼa é nga jalébane mfaʼa bebuni .

²³ Mbunan ô ngenane te so, bi nga vaa éto belo ya metiñe si, nté mbunan ô nga yiane yené ô mbe momo.

²⁴ Ajô te ñhe metiñ me nga too mbaʼale nté bi nga yange Krist, nde bia ye kaleban amu mbunan.

²⁵ Ve éyoñe mbunan ô soya, bi nji fe bo éjôé mbaʼale ate si.

²⁶ Mia bese, amu mbunan, mi nto bone be Zambe e be Yésus Krist.

²⁷ Yaa, e mia bese mi nga dubane be Krist, mi nga jaé Krist.

²⁸ Mone Yude a nji ke fe bo, nge mone Grék, a ôlo ô nji ke fe bo, nge nti , fam é nji ke fe bo, nge minga, amu mia bese mi ne jôme jia e be Yésus Krist.

²⁹ A, nge mi ne ba be Krist, wôna mi ne mvoñe bôt Abraham. Amu ngakaʼa, mi ne benyoñe ngap.