GALATI 2 - Bible en langue Bulu

Paul ba minlôman ba kui tyiñ

¹ Wôna, e mvuse mimbu awôm a minyin, me nga beta bet a ke Yérusalém, bia Barnabas. Me nga kee fe Tite e nsamba wom.

² Amu me nga bet a ke wé a nlitan éziñ. A me nga kañete be Mbamba Foé ma kat e be bikuu. Me nga kañete fe nye a zen ya minlañ e zañ bia be beta be bôt, a za bo a zen éziñ na, ma mate mbi nge mane wu mbile zesé.

³ Ve be nji yemete Tite, e nye bia nye bi mbe nsamba na, a tyiʼiban atyel.

⁴ Nalé a mbe amu mbia be bobenyañ be nga nyiin asoé a jeñe zene ya ndaman éto fili jangan ja so bia e be Krist a toé bia belo.

⁵ Bi nji suu biabebiene si e be bôte bete, jaʼane kui tyiñ a be nté éziñ, e nde benya mejôô ya Mbamba Foé ba ye bo ñyemetan amu mia.

⁶ Ve mfaʼa beta be bôt, akôsa bo nkôñe wop, nalé nye teke me ajô: Zambe a nji semé ngum avale môt. Ve akôsa bo nalé, bôte bete be nji tindi ma jam afe éziñ a ngu.

⁷ Ve be nga suʼulane yene na, ésaé nkatane Mbamba Foé e be tee mintyiʼibane metye é nga vebane be ma, aval ane é nga vebane be Pierre e be mintyiʼibane metye.

⁸ Amu nyô a nga bo Pierre nlômane be mintyiʼibane metye, nye fe a nga bo ma nlôman e be bikuu.

⁹ A, amu ñyemane ya yeme mvam é nga vebane be ma, Yakob, Séfas a Yôanes, mbe be nga yené ane mekôn, be nga batane bia Barnabas, ndeme élat ya mfulan ésaé, nde bia ye ke be bikuu, be ki be kele be mintyiʼibane metye.

¹⁰ E too ve na, bia yiane simesane minzôzoé, e ne jame me nga nyoñe njuʼu ya bo.

Paul a nji kui tyiñ a Pierre Antiôche

¹¹ Ve éyoñe Séfas a nga so Antiôche, me nga liti ne ngeññ na me nji bo tyiñ a nye bi lôane mesu mesu, amu a mbe nkoban été.

¹² Amu na, te yene bôt be nga bômane Yakob be za soʼok, a nga bo a jaʼak a bikuu. Ve éyoñ be soya, a nga bo bikôñ, a tyetebe, a ko mintyiʼibane metyele woñ.

¹³ Ane beyude bevok be nga bo ane nye, jaʼane Barnabas, a nga dutubane fe, a bo nalé.

¹⁴ Eyoñe me nga yene na be nji wulu zôsôô , aval ane benya mejôô me Mbamba Foé me né, me nga jô Séfas e bôt été na: Nge wo, mone beyude, wo nyiñ aval ane bikul bia nyiñ, ve saa aval ane beyude, ô ne yemete bikul aya na, be bo ane beyude?

¹⁵ Bia, bi ne bebialébialé ya beyude, saa bikuu, bebo mam abé bete.

¹⁶ Ve bia yeme na, môt a nji kabe amu mimboone mi mam ya metiñ, ve a mbunan a buni Yésus Krist. Bia fe bi nga buni Yésus Krist, saa mimboone mi mame ya metiñ, amu teke môt a ye kabe a mimboone mi mame ya metiñ.

¹⁷ Ve nge a njeñane ya jeñe mekabe e be Krist, bia fe bi nga yené bebo abé , ye Krist a ye bo mbo ésaé ya abé ? Teke bebé!

¹⁸ Amu nge ma beta lôñe jôme me nga tyam, ma ma bobane ntyame metiñ.

¹⁹ Amu na a zen ya metiñ, me nto ñwuan mfaʼa ya metiñ, e nde te ma ye nyiñe mfaʼa Zambe. Me ntoo ntyelan élé yôb bia Krist; a sa ke mamien ma nyiñ, ve Krist nye a nyiñe be ma.

²⁰ Amu ényiñe jame ya minsôn été va, ma nyiñe je, a mbunane ya buni mone Zambe, nye a nga nyeʼe ma, a ve émien amu ajô dam.

²¹ Me nji bo mvame Zambe na é bo momo. Amu nge môt a kui vôme ya bo zôsôô a zene ya metiñ, wôna Krist a nga wu éwuwui.