FILIP 4 - Bible en langue Bulu

¹ Nalé ate ñhe, a bobejañe ma dañe nyeʼe, mia ma dañe kômbô beta yen, mia, avaʼa dam a ékate duma jam, yemane ngule nalé e be Nti, a ba ma dañe nyeʼe!

Mebendé a melep mevale meva

² Ma lebe Evôdie ba Siñtik na, be bo nleme wua e be Nti.

³ A wo, nya mvôé bia je bia wulu, ma sili wo de na, ô zu vôlô be, amu bia be be bi nga wosan ajô Mbamba Foé éyoñe jijia a Klémañ a beébe bebo bisaé bam bevok, mbe bete môé ma yené e kalate ényiñ.

⁴ Vaʼane be Nti biyoñe bise; ma beta de baʼalane na, vaʼané.

⁵ Abeñe fulu denan e boʼo di bôte bese ba yem. Nti a ntoo bebé.

⁶ Te tyelane minleme yôp a jam éziñ. Ve katane Zambe e mam mia sili biyoñe bise e meyeʼelan, a minjaʼan, mfulaʼan a mvean akéva.

⁷ A e mvoʼé Zambe ja dañe feʼése, ja ye baʼale minleme mienan a asimesane denan e be Yésus Krist.

⁸ E jam ma suʼulane jô, a bobejañ, e ne na, e jam ese e ne bebela, di ese e ne éjijin, zôsôô , mfuban , di da yiane nyeʼan, da sili duma, di ba loone mbamba fulu, da yiane meseʼesaʼa, mam mete mese, bekaʼane me ane mam mia yiane bo.

⁹ A e jam mi nga yéʼé, a nyoñ, a wôk, a yene be ma, boʼone de. A Zambe ya mvoʼé a ye tabe be mia.

Mvean akéva Paul

¹⁰ Me nga dañe vaʼa be Nti, amu nyeʼane wônan mfaʼa wom ô nga beta Vumelan. Yaa, mi nga bili nkômban, ve afôla nde e nga jembane mia.

¹¹ Saa ôsame nye a bo na me kobô, amu me nga yéʼé na, me yembane aval ényiñ ese.

¹² Ma yeme nyiñ éyoñe zaé, ma yeme fe nyiñ éyoñ afok. Me nga yéʼé mfaʼa ya biyoñ bise a mevale binyiñ bise na, me yembane jaʼane zaé, nge afok, nge ôsame.

¹³ Me ne ngule ya bo mame mese e be nyô a ve ma ngu.

¹⁴ Akôsa bo nalé mi nga yeme bo, éyoñ mi nga nyoñe ngabe ya ôlune viam.

¹⁵ Miabebien mia yem, mia, bôte ya Filip na, e metataʼa ya Mbamba Foé, éyoñ me nga kôlô Masédôan, teke keké éziñ é nga volô me jôm éziñ. Mia étam mi nga nyoñe ngabe ya mfi wom nge njañelane wom.

¹⁶ Mia, me to Tésalônik, a lôte éyoñe jia, mi nga lôme me biôm ane me nga yi.

¹⁷ Saake bifaʼé mbie ma ke ma jeñ, ve bibuma bia kôʼôlan ésaé jenan.

¹⁸ Eyoñe ji, me bili biôme bise ma yi, jaʼan alôte abime te. Me ne njalan éyoñe ji, amu me nyoñeya jôm Epafrôdite a nga kee ma é soʼo be mia, ôlobinda a ne mbamba menyum, étyiʼa ja nyoñebane be Zambe, a e nje Zambe a yene mvaé.

¹⁹ A e Zambe wom a ye jalé minkômbane mienan mise, aval ane akume dé e ne mvaé e be Yésus Krist.

²⁰ Duma e boʼo be Zambe Esaa wongan, nnôm éto a nnôm éto. Amen.

Mebatan ma suʼulan

²¹ Bataʼane ma mfufup ôse e be Yésus Krist.

²² E bobejañ bia be be bi too ba batane mia, a dañedañ e ba ya nda Sézar.

²³ E mvame Nti Yésus Krist é tabeʼe be minsisime mienan.