FILIP 3 - Bible en langue Bulu

Bikotekote beyeʼele

¹ E jame ma suʼulane jô a bobejañ, e ne na: Vaʼane be Nti. Me nji jañele jôm éziñ éyoñe ma tili mia avale mame da, a mfaʼa wônan, nalé a yemete mia.

² Tabaʼane bemvu ntye! Tabaʼane mbia bebo bisaé ntye! Tabaʼan ékotekote ntyiʼibane metyele ntye!

³ Amu bia bi ne mintyiʼibane metye, e bia bia kañ a Nsisime Zambe, e bia bia futi duma dangan e be Krist Yésus, a bi nji tabe biabebiene mebun.

⁴ Akôsa bo nalé, me bili beamu ya tabe mamiene mebun. Nge môt éziñ a buni na a ne tabe émiene mebun, me ne ngule ya dañe tabe mamiene mebun,

⁵ ma, nyô a nga tyiʼiban atyele môse muame, mvoñ Israél, mvôʼô Bényamin, bialébialé mone Hébre. Mfaʼa metiñ, me ne Farizieñ;

⁶ mfaʼa nyeʼane ya bo ésaé, me mbe nkpweʼele keké, mfaʼa zôsôô a yené metiñ, me mbe te bijô.

Yésus a nga bi ma

⁷ Amu e mame mese me nga too ane nsenge mfaʼa wom, ma yene me ane los amu Krist.

⁸ Ma yene na, mam mese me ne los éyoñe wo veʼane me a beta mvaé a dañ, nye ate a ne ñyemane ya yeme Yésus Krist Nti wom. Amu nye me maneya jañele mam mese, a ma yene me mese ane mbuan, asu ya bi Krist ane maʼan,

⁹ a yené e be nye, saa fe a zôsôô a ne éñwom, nyô a so metiñ, ve a nyô a so amu mbunane ya buni Krist, e zôsôô a so e be Zambe, nyô a yeʼebe a mbunan.

¹⁰ E ne na, be yeme nye, émien, a ngule ya ñwômane wé, mfulaʼan a mintaé mié, a na be funane nye awu dé été.

¹¹ Ajô te bia ye kui e ñwômane miñwuan, nge e ne nguleya bobane nalé.

¹² Saa na, me maneya bi mam mete mese, nge na me ntoo mvoʼé é ne ngum. Ve ma ke ôsu a jeñe zene ya bi me, amu Yésus Krist a nga bi mamien.

¹³ A bobejañ, me nji yene na me biya me, susuʼa jam ma tyelé nleme yôp a ne na, éyoñe me vuaneya dulu ya mvus, a same nlem ôsu,

¹⁴ me tôñesan e jame ma sôñ, asu maʼan me tii a e nloone ya yôp, ñwô Zambe a loone bia e be Yésus Krist.

¹⁵ Bia bese, e ba be ne nya mvoʼé , e ntabaʼane ñhe nalé. A nge mfaʼa éziñ mia wulu aval afe wôna, e mfaʼa ôte fe, Zambe a ye faé mia éfufup.

¹⁶ E nté bia yange vôme bi kuiya nyô, e ñwulaʼane zene jia.

¹⁷ Mia bese, nsamba wua, a bobejañ, vuane ma a fombaʼane ba ba wulu ane éveʼela mi bili mfaʼa wongan é né.

¹⁸ E ne été na, bôt abui, ane me mbe me jôʼô mia de biyoñ biyoñ, a ma beta baʼalane mia de éyoñe ji a miliʼi mise na, ba wulu dulu besiñe Krôa Krist.

¹⁹ Asuʼulane dap e ne njañan. E zambe wop a ne mebume map, a ba futi duma dap ôsone viap été, mbe bete minleme miap mi luu ve mame ya si nyô.

²⁰ Amu mvôʼô jangan é ne yôb été, e vôme bia yange Nyii bôtô, nye a ne Nti Yésus Krist.

²¹ Nye a ye kôñelane nyôl ôsone jangan a bo je é funane nyôle jé é ne étôtok, a ngule ja ve nye nguleya futi biôme bise éjôé jé e si.