FILIP 1 - Bible en langue Bulu

¹ Ma Paul a Timôté bi too, ma tili mimfufube mise mi ne be Krist mi too e Filip, ô laté a betebʼôsu a bediakone bap.

² Mvam a mvoʼé bi boʼo e be mia, bi soʼo e be Zambe Esaa wongan a e be Nti Yésus Krist.

Mvean akéva a meyeʼelan

³ Ma ve Zambe wom akéva éyoñ ése ma simesane mia.

⁴ Eyoñ ése, ma yeʼelan ajô denane mia bese. Ma yeʼelane fe me vaʼak,

⁵ amu ngap mia nyoñ a bia ajô Mbamba Foé, ataté e môs ôsu a kui den.

⁶ E ndi nleme jam e nje le. Nyô a nga taté mbamba ésaé e be mia a ye ke ôsu a sondô je a kui e môse Yésus Krist wo ye kpwaan.

⁷ E ne foʼo zôsôô na, me ve mamien ajô denane mia bese. Amu me beʼe mia e nleme wom été. Mia bete, jaʼan éyoñe minkôme jam, nge ji ya kamane mamien, a ñyemetane ya yemete Mbamba Foé, mia bese mia nyoñe ngabe mvam é nga vebane be ma.

⁸ Yaa, Zambe a ne ngaa. Ma nyeʼe mia bese, nyeʼan ô tii be Yésus Krist.

⁹ A meyeʼelane mam e mme mana na: Nyeʼane wônan ô ke ôsu, a dañe dañ e fek a atyeñ,

¹⁰ ane mia ye yeme kandé e jam da yian. Nde mia ye bo mfuban a teke bijô e môse Krist a ye so,

¹¹ njalan a bibuma bi zôsôô bia so bia e be Yésus Krist asu étôtok a nkañane Zambe.

Meyaé me Mbamba Foé

¹² Ma yi mi yeme de a bobejañ: E jam e nga kui be ma e nga viane volô meyaé me Mbamba Foé.

¹³ Ajô te ba yem aba mejô a vôm ase na, me ne mbôk amu ajô Krist.

¹⁴ A bobejañ abui be ne ngule minlem e be Nti amu mbôʼô wom. Ba dañe ve ngu, a bo ayoʼo ya kate Mbamba Foé te ko woñ.

¹⁵ E ne foʼo été na bevok ba bo de fulu minyamete a mesengan, ve bevok ba kañete Krist a mbamba ôsimesan.

¹⁶ Bana ba bo a nyeʼan. Amu ba yeme na, me ne va amu ma kamane Mbamba Foé.

¹⁷ Balé ke ba kañete Krist a nsisime mesengan. Minsôñane miap mi nji bo mfuban . Ba buni na ba ye dañe beta ve mbôʼô wom njuʼu abui.

¹⁸ Ve nalé a nji bo ajô. Amu jaʼane mam mefe me ne été mvus, jaʼane ke na benya mejôô, Krist nye a kañeteban. A ma vak amu nalé.

¹⁹ Amu ma yeme na, mam mete mese ma ye ke suan e nyiane wom amu meyeʼelan menan a mvolane ya Nsisime Krist.

²⁰ Avale ma dañe yange a ndi nlem ése me bili, maa ye ke wôʼôson. Ndi nleme jam é ne ngumba. Eyoñe ji aval ane biyoñe bise, Krist a ye wum e nyôle jam, nge ényiñe jam été nge awu dam été.

²¹ Amu mfaʼa wom, ényiñe jam é ne Krist, a awu e ne me maʼan.

²² Ve nge nyiñane ya nyiñ e si nyô wo ve me ngule ya bo ésaé ja ve bibuma, me nji yeme jam ma yiane top.

²³ Fek é ne ma njañan. Me bili nkômbane ya ke, a tabe bia Krist. Nalé a dañe mvaé.

²⁴ Ve ntabane ya tabe si nyô wo dañe mfi amu mia.

²⁵ Avale ma buni, ma yeme na, ma ye tabe mia bese bebé mfaʼa meyaé menan a avaʼa ya mbunane wônan.

²⁶ Nde étôtoʼo mi bili e be Krist ja ye nen amu ma, amu mbulane wom e be mia.

Nyiñan ane Mbamba Foé a yeʼele

²⁷ Ve jame da, nyiñan ényiñ ja yiane Mbamba Foé Krist, nde, nge ma zu yene mia, nge na, me too momo, ma wôʼô be kobôʼô ajô denan, me wôʼô na mi yeme ngu e nsisime wua été. Mi yitaʼane bese nleme wua aval ane mbunane Mbamba Foé ô né.

²⁸ Te ko besiñe woñ a jam éziñ; jame te e ne ndeme ja yené ya nkuane wop, a nyô ya nyiane wônan. A jame te da so e be Zambe.

²⁹ Amu a nga mvamane mia mfaʼa Krist, Saa ve na mi buni nye, ve na, mi wôʼô mintaé amu nye,

³⁰ éyoñe mia wosan avale mewosan ebien mi nga yene me wosaʼan, a, ane mia yem, me ngenane me wosaʼan.