EZEKIEL 42 - Bible en langue Bulu

Bone menda me latane nda Zambe

¹ Ane a nga kee ma e minseñe yʼatan. Bi wuluʼu e zene yʼakôé; a nga nyiñeli ma e meba me ne zôsôô a nseñ a zôsôô a beta nda mfaʼa yʼakôé.

² Mfaʼa anyiin e né: Ayap menyiʼi me mo ntet, mfaʼa anyiine yʼakôé, ndam: Menyiʼi me mo mewôm metan.

³ Ôsu menyiʼi me mo mewôm mebaé ya nseñe yʼété a ôsu mbôʼane nseñe yʼatan, bitune bi nda bina ntaʼane bi bivoʼo yôp e nga too nda yôp é ne bifase bilaa.

⁴ Mone zen a mbe ôsu ya meba; ndam menyiʼi me mo awôm mfaʼa nseñe yʼété; ayap: Menyiʼi me mo ntet; menyiine map me mbe akôé;

⁵ meba ya yôp mme me nga dañ ôbametan amu bitune bi nda di ngabe yʼété a dañe meba ya si a ma yʼézezañe ya beta nda .

⁶ Meba mete me mbe, me boʼo bifase bi nda yôp bilaa beta mekône yʼété teke funane ma ya nseñ; ajô te me mbe tyôtyoé a dañe meba ya si a ma yʼézezañ éyoñe wo taté si.

⁷ Mvine ya nseñ ô mbe ô lukaʼan a meba mfaʼa nseñe yʼatan, zôsôô a meba; ayabe dé: Menyiʼi me mo mewôm metan.

⁸ Amu ayabe ya meba nseñe yʼatan ô ne menyiʼi me mo mewôm metan; ve zôsôô a beta aba ki a too menyiʼi me mo ntet.

⁹ Anyiine ya jôp da tôô e mbe e vamek e meba mete si asu ya wulu été ataté nseñe yʼatan.

¹⁰ E ndame mfine ya nseñ, mfaʼa jôbe da tôô, zôsôô a nseñ zôsôô fe a beta nda , meba me mbé ,

¹¹ a zen é too me ôsu; avale da fe ane meba me mbe mfaʼa yʼakôé: Ayap avale da, ndam avale da, bevundi a mimbé avale da, ntaʼane mam avale da a mimbé avale da.

¹² Mimbé mi mbe ane mi meba me ne mfaʼa ya nké: Anyiin e too akuʼu zen , zôsôô a mfin ô ne mfaʼa jôp da tôô, anyiine yʼété.

¹³ Ane môt a nga jô me na: Meba yʼakôé a ma ya nké, zôsôô a nseñ me ne meba ya vôm a nʼétyi; amu vôm ate betuni ba subu Nti bebé ba yiane di biôme bia dañ étyi. Vôm ate nye ba yiane bôôé biôme bia dañ étyi: Mveane ya mefup a étyiʼa asu abé a étyiʼa asu nkôman étom, amu vôm ate a nʼétyi.

¹⁴ Eyoñe benyiineya betuni ba ye bo te kôlô vôm a nʼétyi a ke nseñ yʼatan ve ba ye liʼi mengômesan ba bo me ésaé valé, amu mengômesane mete me nʼétyi. Ba ye jaé mengômesane mefe; a éyoñe te ba ye bo nguleya subu mevôm me ne asu bôte bevoʼo bebé.

¹⁵ Ane môt ate a nga sondô mane veʼe nda Zambe mfaʼa yʼété; wôna a nga kee mʼatan a lôt e zene ya mbé ô ne zôsôô a mfaʼa jôbe da tôô a veʼe wô mbômaʼan.

¹⁶ A nga veʼe éfase jôp da tôô a ôlé ba veʼe je: bilé bise bi mbe mintete mitan, ô laté ôlé ba veʼe wô.

¹⁷ A nga vek mfaʼa yʼakôé: bilé bise bi mbe mintete mitan, ô laté ôlé ba veʼe wô.

¹⁸ A nga veʼe fe mfaʼa ya nké: Alé mintete mitan aval ôlé ba veʼe wô ô né.

¹⁹ A nga sondô ésaé mveʼan mfaʼa ya mañ; a nga vek a yene alé mintete mitan, aval ôlé ba veʼe vie ô né.

²⁰ A nga veʼe Nda Zambe ése mimfaʼa minyin; akak é nga bômane je: ayap mintete mitan, ndam mintete mitan. Akaʼa di e nga yiane kandé jôm é nʼétyi a jôm é ne tʼétyi.