EZEKIEL 3 - Bible en langue Bulu

¹ Nde a jô me na: A mona môt, jaʼak e jôm ô lôô, jaʼak mvulekane kalate wu a kele kobô nda bôt Israél!

² Ane me nga yooé anyu a a nga bo na me di mvulekane kalate te.

³ A nga jô me na: A Mona môt vaʼa abume dôé bidi a jalé miñya miôé a mvulekane kalate ma kee wo wu! Nde me nga di wô a ô mbe ma zam anyu ane wôé.

Esaé Ezékiél a yiane bo

⁴ A nga jô me na: A Mona môt, kele be nda bôt Israél a wo ye kate be mejô ma!

⁵ Amu me nji lôme wo be bôt be nji yeme kobô, be bôt be bili nkobô ô ne te kʼawôʼé, ve be nda bôt Israél.

⁶ Sa ñhe be bizuʼu bi bôt bi bili nkobô ô nʼayaé, nkobô ô ne te kʼawôʼé ñwô ô ne te wôʼô minkobô yʼété. Ve nge ma lôme wo e be balé bete be ba ye wôʼô wo.

⁷ Ve nda bôt Israél ja ye bo te vôʼôlô wo amu é nji kômbô vôʼôlô ma; amu nda bôt Israél ése é nʼasu ayet a nleme ntip.

⁸ Ô lôô ma bo mvom asu jôé ayet ndemben da ye tebe éndabe ngame yat

⁹ Ma ye bo asu dôé ane diaman*(a) ayet a dañ akok. Te ko be woñ nge kumetane nlem ôsu viap, amu be ne nda bôte bebene njôan.

¹⁰ A nga jô me na: Mona môt nyoñe nleme wôé été a vôʼôlô mejô mese ma ye kate wo a melo môé!

¹¹ Kele koone bekee minkôm, bone yʼayoñe dôé, wo ye kobô be toʼo ba vôʼôlô nge bo te nyoñe ngap, wo ye kobô be na: Avale di Zambe nyô a ne Nti a jô na:

¹² Nsisim ô nga beʼe ma a me nga wôʼô éduñe beta zôʼé mvuse jame na: Étôtoʼo Nti é boʼo ébotan é soʼo vôm étabaʼa jé é né!

¹³ Ane me nga wôʼô éduñe mefabe betit, afab ése é bibiʼi di avok; me nga wôʼô fe éduñe minka fefele betit a éduñe beta zôʼé.

¹⁴ Nde nsisim éziñ ô nga beʼe ma a kee ma. Me mbe me kelek éjôé a ñyaan a wo Nti ô mbe ô boʼo ésaé be ma a ngul ése.

¹⁵ Ane me nga kui e Tél-Abib, e be bekee minkôm be nga too bebé ôsôé Kébar, a e vôm be nga too; me nga tabe valé melu zamgbwa njuʼu ô bili ma.

¹⁶ Mvuse melu zamgbwa, ajô Nti e nga zu be ma na:

¹⁷ A mona môt, ma telé wo mmombô e nda bôt Israél. Wo ye wôʼô ajô da ye kui mʼanyu a wo ye ve bʼayemé mfaʼa wom.

¹⁸ Eyoñ ma ye jô mbia môte na: Yaa wo ye wu! Nge wo bo te ve nyʼayemé, nge wo bo te kobô asu ya ve mbia môt ayemé na a kôlô mbia zene wé a asu ya nyii ényiñe jé, mbia môt ate a ye wu ékotekote jé été, ve ma ye sili wo metyi mé.

¹⁹ Ve nge wo wo ve mbia môt ayemé, ve nye te kôlô mbia mboone wé a mbia zene wé, a ye wu ékotekote jé été ve wo wo ye nyii ényiñe jôé.

²⁰ Nge zôsôa môt a liʼi zôsôô wé a bo jam é nʼékotekot, ma ye kolé ôlam ôsu vié a a ye wu; nge ô nji ve nye ayemé, a ye wu abé dé été. Ba ye bo te beta simesane mimboone ya zôsôô a nga bo a ma ye sili wo metyi mé.

²¹ Ve nge wo wo ve zôsôa môt ayemé, asu ya na zôsôa môt a bo te bo abé , a nge a bo te bo abé , yaa a ye nyiñ amu ô nga ve nyʼayemé, a womien wo ye nyii ényiñe jôé.

Mendem asu nda bôt Israél

²² Vôm ate fe wo Nti ô nga too be ma, nde a nga jô ma na: Kôlôʼô si ô ke mbiʼili a ma ye kobô wo wé.

²³ Ane me nga kôlô si a ke mbiʼili; ô lôô na étôtoʼo Nti é mbe wé avale me nga yene je bebé ôsôé Kédar. Nde me nga ku asu é butu si.

²⁴ Ane Nsisim ô nga nyiine be ma a bo me na me tebe a mebo mam. Nde Nti a nga kobô ma a jô me na: Kele feteban e nda jôé été.

²⁵ Mfaʼa wôé, a mona môt, ô lôô ba ye kaʼa wo minko; wo ye bo te kôlô ézezañe jap.

²⁶ Ma ye lat ôyeme viôé ndʼanyu jôé na ô tabe mvuk a bo te komekane be amu be ne nda bôte bebene njôan.

²⁷ Vʼéyoñ ma ye kobô wo ma ye kui wo anyu ô jô be na: Avale di Zambe nyô a ne Nti a jô na: Nyô a wôk a wôʼôk, a nyô a nji nyoñe ngap a boʼo te nyoñe ngap, amu be ne nda bôt bebene njôan.