EZEKIEL 10 - Bible en langue Bulu

Metyeʼe me nduan, mfefé ñyenane vagoñ

¹ Eyoñe te me nga fombô a yene na, mfaʼa ñyeme yôp ô nga too Bekerubime yôp, jôm é yenéʼé anʼakoʼo safir, jôm é yenéʼé anʼéveʼela éto njôan.

² A nga jô môt a beʼe éfumulu ngômesane na: Nyiʼine zañe minka mi ne Bekerubime si jaléʼé mo môé a maʼa me nduan wo ye nyoñe zañe Bekerubim, wôna mialaʼane me e tison. Nde a nga nyiin mise mam me lôô.

³ Eyoñ a nga nyiin Bekerubim be nga tele mbo nnôme ya Nda Zambe a nkut ô nga jaé nseñe yʼété.

⁴ Etôtoʼo Nti é nga kôlô kérubime yôp a lumbu mfaʼa mbalaʼasi ya nda Zambe ô mbe. Nda Zambe é mbe njalan a nkut a nseñe ki njalan a mfaane yʼétôtoʼo Nti.

⁵ Eduñe mefabe Bekerubim é nga wôʼé a kui nseñe yʼatan avalʼane tyiñe Zambe a ne ngul ése éyoñ a kobô.

⁶ Eyoñe Nti a nga bendé môt a beʼe éfumulu ngômesane na: Nyoñe nduan e zañe Bekerubim! Nde môt ate a nga ke tebe fefele nka.

⁷ Wua ya Bekerubim a nga same wo nduan é mbe nye bebé a toʼé maʼa me nduan été a jalé me mo môt a beʼe éfumulu ngômesan, nye ve nyoñ a kee me.

⁸ Biveʼela bi mo me môt bi nga yené mefabe Bekerubim si.

Bekerubim a minka

⁹ Ane me nga fombô a yene minka minyin fefele Bekerubim, nka wua fefele kerubim ase a minka mite mi nga faé anʼakoʼo krizôlit.

¹⁰ Nyenane ya mis, mise minyini mi mbe avale da; nka ôse ô nga yené ane nge ô ne ézezañe nka ôfe.

¹¹ Eyoñe mia ke ôsu, mi mbe nguleya ke mekuʼu menyin; teke ke fefe; ve mi mbe mi kelek mfaʼa nlô wo liti mie zen; mi mbe te ke fefe.

¹² Nyô, mvus mo a mefabe Bekerubim bi mbe njalane mis mbômaʼan; avale te fe minka, minka be benyini be nga beʼe.

¹³ Me nga wôk be loʼone minka mite jôé na ôlende.

¹⁴ Kerubim ase a nga beʼe mesu menyin: di ôsu é too di kerubim, di baa é too di môt di lale é too di ngbwengbwem a di nyini é too di ndôé.

¹⁵ A Bekerubim be nga bete yôp: be mbe bevevee be biôm me nga yene bebé ôsôé Kébar.

¹⁶ Eyoñe Bekerubim be mbe be wuluʼu, minka mi mbe mi wuluʼu fefele jap; éyoñe Bekerubim be mbe be ndaméʼé mefabe map asu ya kôlô si a yele, minka fe mi nji tebe fefe ve lat a be fefele jap.

¹⁷ Eyoñe Bekerubim ba tebe, minka fe mi tebe éyoñe ba bet, minka fe bi beté a be; amu nsisime bevevee be biôm ô mbe mie été.

¹⁸ Anʼétôtoʼo Nti é nga kôlô mbalaʼasi ya nda Zambe a bebe Bekerubime yôp.

¹⁹ Nde Bekerubim be nga ndamé mefabe map a kôlô si, mise mam me lôô éyoñe be nga ke, minka mi tôñe be. Be nga tebe anyiine mbé ya Nda Nti mfaʼa jôbe da tôô; a étôtoʼo Zambe Israél é mbe be be yôb été.

²⁰ Be mbe betite me nga yen e Zambe Israél si bebé ôsôé Kébar; a me nga yeme na be mbe Bekerubim.

²¹ Wua ase a mbe a beʼe mesu menyin, mefabe menyin a mo me bôt me nga yené mefabe mabe si.

²² Mesu map me nga funane ma me nga yene bebé ôsôé Kédar; aval éyekaʼa da, be mbe foʼo bebien. Kérubim ase a mbe a wuluʼu tetele ôsu vié.