EZAYI 9 - Bible en langue Bulu

¹ E bôt ba wulu dibi été, be lôô beta éfufup; éfufup ja faé e be ba be too sii nsisiñ yʼawu.

² Wo bo ayoñe bôte na e bo abui; wo ve de mevak. Da vak mevaʼa ya nkôane bidi asu dôé, aval ane bôt ba vak éyoñ ba kabane biôme ya nsa.

³ Amu ébôñeté é nga titi nye yôp, nkasa ô nga bôme nye mvus, a ôlé môt a tibili nye, ô buʼuya bie ane môse ya Madian.

⁴ Amu ékôndé ése ba jaé éndundumba été, a alôʼô ése ba te dube metyi été, ba ye wua bie nkabaʼa nduan été naa nduan é mane diʼi bie.

⁵ Amu mon a vebaneya be bia, monafam a bialéya be bia, a ngule ya jôô bôt ja ye bebe nye bitule yôp, ba ye loone nye na: étua môt, Mbôndé mefek, Zambe a ne ngu, Esaa a too nnôm éto, Njôô ya mvoʼé .

⁶ A ye telé a yemete njôan ô ne ndam a e mvoʼé é ne teke nné, asu éto njôane David a asu éjôé jé. A ye yemete a telé bie, e zôsôô a nya ntyiʼane mejôô yôp, ataté éyoñe ji a kui nnôm éto, ntindane Nti ya nnôm éto ñwô wo ye bo jame te.

Bibubua Nti a kuli Samari

⁷ Nti a wuaya Yakob éfia, éfia te é biya Israél.

⁸ Mam ma tôñ éfia te, ma ye nambe bôte bese. Efrayim a e môt a too Samari, be jôʼôk mebune mab été na:

⁹ Brik é maneya ku si, bia ye lôñ a mekoʼo me ne mbaan; be kpwéya besikomor si, bia ye tyendé be a besédre

¹⁰ Nti a teléya nye Retsin e ngame yat, a veleya besiñe bé ôyo,

¹¹ Besirieñ mfaʼa yʼôsu a Befilisteñ mfaʼa ya mvus, a be maneya kui menyu a min Israél. Akôsa bo mam mete mese, ayaa dé e nji bulane mvus, a wo wé ô ngenane nsaman.

¹² Ve bôt be nji bulane be nyô a nga bôme be, be nji ke jeñe Nti ya minsamba mewosan.

¹³ Ajô te Nti a nga tyiʼi Israél nlô a njem, ntem alen a nkaé môse wuwua;

¹⁴ mvendé môt a nyô a bili duma, mbe be ne nlô; nkulu mejô a yeʼele minsos nye a ne njem,

¹⁵ betebele yʼayoñe di be nga bo na ayoñ e dimi fé, a e bôt betebele bete be nga liti zen , be nga mineban;

¹⁶ ajô te Nti a ye bo te yene bendôman yʼayoñe dina mvaé, nge wôʼô bobenyui a minkuse mié éngôngo; amu bese be ne bebo abé a bebo mbia be mam. A menyu mese ma baʼalane mejô ya te fek. Vʼamu mam mana mese, ayaa dé e nji kôlô, a wo wé ô ngenane nsaman.

¹⁷ Amu mboon abé wo yôñ ane nduan ja diʼi biyo a ndôé, a kalane bisaé yʼafan, nsum ôtita ki ô bete yôp

¹⁸ si é ne nkuan amu ayaa Nti ya minsamba mewosan e dañeya abui, a bôt be ntoo ane jôme nduan ja bi; teke môt a kame monyañ.

¹⁹ Ba tyiʼi ôfus mbo nnôm, ve beta wôʼô zaé, ba mine wu voʼo mbo ngal, ve teke jaé, môt ase a mine minsône ya wo wé.

²⁰ Manasé a di Efrayim a Efrayim a di Manasé, ba lat a wosane Yuda. Vʼamu mam mete mese, ayaa dé e nji kôlô, a wo wé ô ngenan ô same.