EZAYI 7 - Bible en langue Bulu

Nkulu mejô Ezayi ba njô bôt Akaz

¹ Melu Akaz, e mone Yôtam, mone Ozias, njô bôte ya Yuda, mme Retsin, njô bôte ya Siri, ba Péka, e mone Remalia, njô bôte ya Israél, be nga ke bita Yérusalém na be wosane nye; ve be nji bo nguleya wosane nye.

² Nde be nga kate nda bôte David na: Besirieñ be vuleya minkan Efrayim. Ajô te nleme Akaz a wu bôte bé mi nga fôʼôban ane bilé ya fé bia fôʼôban a évuñulu.

³ Ane Nti a nga jô Ezayi na: Kuik atan ô ke tôbane Akaz, mia Sir-Yasub mone wôé, mfaʼa akuʼu nkoñ ébata yʼakôé, e zene ja lôt afube ndube biyé.

⁴ Wo ye jô nye na: tabeʼe ne séé, te ko jôm éziñe woñ, nleme wôé fe ô boʼo te ko woñ ôsu ya bisiʼi bi nduan bite bibaé mbie bia kui ôtita, ôsu ya ayaa Retsin a Siri, a e mone Remalia.

⁵ Amu Siri a jeñe wo abé ba Efrayim a mone Remalia mbe ba jô na:

⁶ mbetan bi ke wosane Yuda, bia ye bo na tison é ko woñ, bia ye mane tyame je akekui ja ye tek, a bia ye telé njô bôt e zañe jé: e mone tabil

⁷ Avale di nde Nti a jô na: jame te é se nguleya tabe ayap jame te é se nguleya boban.

⁸ Amu na Damas nye a ne nlô ya Siri A Retsin ki nlô ya Damas. A liʼiya mimbu mewôm metan, wôna Efrayim, éyoñ a buʼubaneya, a ye bo teke fe beta bo ngum ayoñ.

⁹ Samari a ne nlô yʼEfrayim. A mone Remalia a ne nlô ya Samari nge mi nji yeme ngu mbunane wônan été, mia ye bo teke dañ.

¹⁰ Ane Nti a nga beta kobô Akaz a jô nye na:

¹¹ siliʼi Nti, e Zambe wôé, ndem asu dôé, siliʼi je nge mewôm me ne mfaʼa ya si nge ma me ne mbetane yôp.

¹² Akaz a nga yalane na: Maa ye ke sili jôm, maa ye ke veʼele Nti.

¹³ Nde ñhe Ezayi a nga jô na: Vôʼôlaʼan a nda bôte David! Ye e dañeya mone Jam mfaʼa wônane na: mi ve bôt ateʼe nyôl, a na mi ve fe Zambe wom ateʼe nyôl?

¹⁴ Ajô te Nti émien a ye ve mia ndem: mi lôô ngone minga é ntoo abum, Ja ye biaé monafam, a ja ye yôlé nye na: Emmanuel.

¹⁵ A ye di mbon a wôé, akekui éyoñ a ye yeme bene jôm é nʼabé, a tobe ji é ne mvaé.

¹⁶ Ve da na te na mon a yeme bene jôm é nʼabé a tobe ji é ne mvaé, e sii bejô bôte bebaé ba kumetane wo nlem ja ye bo teke fe môt.

Minlo a mvôfôm bia soo abui minjuk

¹⁷ Nti a ye soo melu be wo e be bôte bôé a nda bôt ésoo mme me nji tame yené ataté môs Efrayim a nga kandane Yuda. Njô bôte yʼAsiri.

¹⁸ Môs ôte Nti a ye selé minlo mi né e susuʼa ya éfuse si ôsôé yʼEjipte wo ve atek. Nalé fe bemvôfôm be ne Asiri;

¹⁹ Minlo a bemvôfôm bete ba ye zu a bese ba ye bebe e bone mimbiʼili be ne nlumbu abui, e minsalane ya mekôm, e bisaé bise a Miñyanebe mise.

²⁰ Môs ôte, Nti a ye tyeñ ôtyenjeñ ñwô a ye kus Efrate yat, jame te da yiane fombô njô bôte yʼAsiri, a ye tyeñe mia minlô a mimvote mise ya nyô, nalé fe zel.

²¹ Môs ôte, môt ase a ye baʼale étoñe ngale nyak a mintômba mibaé;

²² menyañ ma ye bo étua abui avale ya na bôt ba ye di mbon. Amu môt ase a ye liʼi, a too si éte, a ye di mbon a wôé.

²³ Môs ôte, a ye bo na, e vôm ase mindiʼi mi woon toyini mi né, mi too besikele be argent toyini, minsinik a biyo bia ye kui vôm ate.

²⁴ Ba ye nyiin été a mekoñ a bilaé Amu si ése ja ye bo ve minsinik a biyo.

²⁵ Mfaʼa ya minkôle mise be nga bé a ébak; woñe minsinik a biyo wo ye bo momo, ve benyak a mintômba bia ye di été.