EZAYI 6 - Bible en langue Bulu

Ezayi a wôʼô nloone Zambe

¹ Mbu njô bôt Ozias a nga wu, me nga yene Nti a too éto njôane é ne étua mbetane yôp, minwôndé ya ayab ézingi jé mi nga yiane Nda Zambe.

² Besérafeñ be nga tele nye mfaʼa ya nlô yôp; wua ase yʼété a nga bili mefab mesaman; a nga belane mebaé mfaʼa ya buti asu mebaé mfaʼa ya buti mebo a mebaé mfaʼa ya yele;

³ Be mbe be yôtaʼan wua e nyô mboʼo na: Étyi, étyi, étyi! E be Nti, Nyô a ne ngul ése, si ése é jaéya ne lut a étôtoʼo jé!

⁴ Mimbôkaʼa ya mimbé mi nga tiʼitan amu tyiñe ya nyô a mbe a yôtaʼan, a Nda Zambe ése é nga jaé a ôtita.

⁵ Nde ñhe me nga jô na: Ngoʼo ma! Me jañeya, amu me ne môte biyaé bi ne te mfuban , a me too ézezañe ya bôte biyaé bi ne te mfuban , a mise mam me yeneya njô bôt, Nti ya minsamba mewosan.

⁶ Ve wua ya besérafeñ a nga yele a zu be ma, a bili atyeʼe nduane wo nde a nga toʼé ataʼa metunaʼa yôb a abas.

⁷ A nga nambe anyu dam a atyeʼe nduane te a jô na: Jôme ji é nambeya biyaé biôé; bikobe biôé bi vaseya a abé dôé é ntoo njaman .

⁸ Eyoñe te me nga wôʼô tyiñe Nti é jôʼô na: za ma ye lôm a za a ye wulu asu dangan? Nde me nga yalane na: Me nyô, lôme ma.

⁹ Nye na: Kelek, a wo ye jô bôte bete na: tukaʼa vôʼôlan, ve teke wôʼô jôm, Tukaʼa fomban, ve teke yemelan.

¹⁰ Boʼo minleme ya bôte bana ayet boʼo melo mabe ndok a bo mise mabe ndim, be za yen a mise map nge wôk a melo map, nge bi fek a nleme wop, be za kôñelane minlem a nyiñ.

¹¹ Ane me nga jô na: a Nti, a kui éyoñ évé, nde a nga yalane na: akekui bitison bia ye bo teke fe bôt a menda teke fe bôt be vee, si fe ja ye bo vʼéliʼi élik;

¹² akekui Nti a ye mane vaa bôt be ke ôyap. A si ja ye liʼi teke môt

¹³ Nge ngap awômô ya bôt be né ja liʼi ane mebukaʼa , ngabe bôt éte ja ye diʼibane nduan vʼaval ane ôkôʼa a élôn bia baʼale bikume biab éyoñ bi maneya baʼéban, nalé ate ekume ya ngab éte Ja ye ve mvoñe bôt é nʼétyi.