EZAYI 57 - Bible en langue Bulu

¹ Môt a ne zôsôô a jañ, ve teke môt a nyoñe de ngap e nleme wé été; ba vaa mbamba be bôt, ve môt éziñ teke wôʼô na zôsôa môt a ne mvaan asu ya mate bidim.

² Nyô a tôñe zen é ne zôsôô a ye nyiine mvoʼé été, a ye woʼon énoñe jé yôp.

³ Ve mia, zaʼane bebé va mia bone be ngbwengbwele minga, mvoñe mbo mejian a minga ébamba.

⁴ Mia kpweʼele za? Mia ndamé za anyu nyô a sooé nyʼ ôyem? Ye mi nji bo bone be beneya njôan, e mvoñ é ne njalan a ékotekot?

⁵ Mia wobane nduan bebé bilé bi térébeñte, élé ése é bili abui mekaé si; mia wôé bon e mimbiʼili été a e mimbane mekoʼo été.

⁶ Ngabe jôé é ne bikôkone mekoʼo ya mbiʼili, bili bite mbie bi nʼakabe dôé amu mbie ô maneya sôôé mveane binyunyui a ve mimveane miôé ya nkañan! Ye jame te é ne volô ma nlem ?

⁷ Wo kôm énoñe jôé e nkôl ô ne mbetan, a ôyabe yôp; nne fe wo bete wé a ve bityiʼa , bili bite mbie bi nʼakabe dôé amu mbie ô maneya sôôé mveane binyunyui a ve mimveane miôé ya nkañan! Ye jame te é ne volô ma nlem ?

⁸ Wo futi jôme jôé ya simesan e mvuse mbé , a mekôn me bili wo; amu wo liti soé jôé a bet ô tele mʼôyap. Wo nene éjôʼôba jôé, a ô boya élat a bezambe befe, wo nyeʼe énoñe jap a nyeʼe ô yene be.

⁹ Wo ke be njô bôt ô bili mbon, wo mialane beôlobinda bôé, wo lôme minlômane miôé ôyap, wo bo na mi ke a kui vôme miñwuan mi né.

¹⁰ Nwulan abui wo bo na ô tek ve wo teke jô na: Me tame bulane mvus! Ô ngenan ô wôʼôtane ngu e wo wôé été: ajô te ô ngenane teke tek.

¹¹ Za a mbe a tyeléʼé wo nleme yôp, ô mbe ô koo za woñe na ô duʼu ma, na ô bo te simesan, te bisi ma? Ye me nji tabʼévô aso ayap? Ajô te nde ô nji ko me woñ.

¹² Ma ye kañete zôsôô wôé a mimboone miôé mbie bia ye bo te volô wo.

¹³ Eyoñ wo ye yôn, jama azezambe wôé nye ñhe a ye tame kôté wo! Vʼévuñulu ja ye mane kee nye, mfep wo ye vaa nye, ve nyô a sobô be ma, a ye nyoñe si nyô ane ngap, a tabe nkôle wom ô nʼétyi.

Ngakaʼa mvolane nlem asu bebuni zambe

¹⁴ A ye jô na: Faʼane, faʼane, kômane zen , vaʼane kobetakobetan ase a ne zene bôte bam!

¹⁵ Amu avale di Nyô a dañ ôyabe yôp, Nyô étabaʼa jé é too nnôm éto, a nyô jôé dé é nʼétyi a jô na: me too mevôm me ne mbetan a étyi été, ve da me ne a môt ba tibili, a nyô be sameleya nsisime wé été, nalé ma beta wômôlô minsisim mi ntoo nsamelan, a minlem mi ntoo ntyaʼan.

¹⁶ Eyoñe minsisim mia ku som asu dam, e bôte me nga té, ma ye bo te ben éyoñ ése nge baʼale ôlun nnôm éto.

¹⁷ Me nga yaa amu miñyamete mia yiane mekua mié, ajô te me nga bibi nye, me nga sobô ayaa dam été, ve melo mé été, a nga tôñe zene ya nleme wé.

¹⁸ Me nga yene mezene mé, ve ma ye saé nye a ma ye jalé nye a mvolane nlem , émien a ba baa be be ba yi du.

¹⁹ Ma ye futi ékañaʼa e biyaé mvoʼé , mvoʼé e be nyô a nʼôyap a e be nyô a ne bebé! Nalé Nti a jô. Ma ye saé be.

²⁰ Ve bebo abé be ne ane mañ ma fôʼôsan mme me se nguleya bo ne mieññ, a mendime yʼété ma fôʼé mbotok a mbuan.

²¹ Mvoʼé é nji bo, nalé Zambe wom a jô mfaʼa bebo abé .