EZAYI 54 - Bible en langue Bulu

Mfefé élate ya mvoʼé zañe Zambe a Israél

¹ Dañek, a nkôkôm, wo ô nji ke biaé mon! Beteʼe tyiñe ya ndañan a fôn, a wo ô nji tame yeme mintaé yʼabiaé! Amu bone be minga a nga liʼi éngôngo ba ye bo abui a dañe ba be nyô a ne nluʼan nalé Nti a jô.

² Neneʼe afôla ya nda éndelé jôé; be ndaméʼé bindelé ya étabaʼa jôé; te wo kamane bie! Limitiʼi minkole miôé a yemete mekône môé!

³ Amu wo ye nene mbo nnôm a e mbo ngal; mvoñe bôte jôé, ja nyoñe meyoñ me bo jôme jé, a ja ye fôle bitison bi ntoo bilik.

⁴ Te ko woñ amu ôson wo ye bo te bi wo; te tebe ne zemeté amu wo ye bo te same; ve wo ye vuan ôsone ya melu ô mbe ésoé, a wo ye bo te beta simesan ôsame ya éyoñ ô mbe nkus.

⁵ Amu nyô a nga té wo a ne nnôme wôé, jôé dé e ne na Nti ya minsamba mewosan, a nkôté wôé a ne Nyô yʼIsraél a nʼétyi, jôé dé e ne na: Zambe ya si ése;

⁶ Amu Nti a beta nyoñe wo ane minga be nga suu nye nsisime wé ô ne mbiban a ôlun. Ye môt a ne suu minga a nga jô nye ndôman! Nalé Nti a jô!

⁷ Me nga liʼi wo tañ étun éyoñ ve ma ye beta nyoñe wo a abui nkoon éngôngo;

⁸ e ñwôʼan ôlun wo nemban été, me nga vaa asu dame be wo ôyôme nté, ve ma ye mvamane wo a nyeʼan ô too nnôm éto, nalé Nti, nkôté wôé a jô.

⁹ Mfaʼa wom da ye bo ane melu Noé: me nga kane ngana na: mendim me Noé ma ye bo te beta mialan e si nyô; avale te ma kane ngana na: ma ye bo te beta wôʼô wo ôlun, nge bo wo ayok.

¹⁰ Toʼo beta minkô ba fôʼôsan, toʼo ke bone minkô ba ndeñetan, ve mvame jam ma liti wo ja ye bo te man, a élate mvoʼé jam ja ye bo te tyamé. Nalé Nti, nyô a ko wo éngôngo a jô.

Nti Nyô a kaman Israél

¹¹ A wo ô nʼéngôngo, ntyaʼan ébôm a ôkôs a teke môt a volô wo nlem ! Ô lôô ma ye bé mekoʼo môé abeñe meyañ été a bôôé mimbôkaʼa miôé e mekoʼo me Safir été;

¹² Minsoñ yʼandile dôé, ma ye bo mie a mekoʼo me rubis, a bo mimbé miôé a mekoʼo me éskarbukel, akaʼa dôé ki a mekoʼo me nʼédima.

¹³ Bone bôé bese ba ye bo beyéʼé be Nti, afoʼo ya bone bôé da ye bo anen.

¹⁴ Zôsôô a ye yemete wo wo ye tebe étibelaʼa ôyap amu ô nji ke bi jôm wo ko woñ; wo ye fe tebe ébubua jam ôyap amu ja ye bo te kui wo bebé.

¹⁵ Nge ba té wo ntañete jame te da ye bo te so be ma; môt ase a ye té wo ntañete a ye ku amu wo.

¹⁶ Ô lôô me téya nlui melui nye a vuñulu maʼa me nduan a nye a lui évôle bita avale dé; ve me téya fe ntyame mam asu ya buʼu évôle te.

¹⁷ Evôl bita ése é ne nluibane na é wosane wo, ja ye bo teke jam; a ôyem ôse via ye bet a wosane wo aba mejô wo ye teʼe vie a mveane wô mekua. Ngabe bebo bisaé be Nti nje le. Zôsôô wop a so be ma nye le, nalé Nti a jô.