EZAYI 53 - Bible en langue Bulu

¹ Za a nga buni foé jangan, a wo Nti ô litibaneya be za?

² A nga yaé asu Nti ane éfaʼalé, ane nkañ wo vame si ja wôʼô évé; a mbe tekʼéyekaʼa nge abeñ bia tindi na bi fombô nye. Ñyenan bi nga yene nye ô nji bi jam éziñe ya na bi fombô nye.

³ Bôt be nga biasé a liʼi nye. A mbe môt yʼôlun a a nga yembane mintaé, éfunan, ane nyô a solé asu dé ôsu vié. Be nga biasé nye a bi nji ke semé nye.

⁴ E ne foʼo bebela na, mintaé miangan mmie a nga beʼe; a minjuʼu miangan mmie fe a nga jibi; ve bia bi nga yene nye ane nyô Zambe a nga ve melep , ane nyô Zambe a nga bibi a samele.

⁵ Ve be nga jii nyʼakoñ amu mintyamane metiñe miangan, melep ma ve bia mvoʼé Nye a nga nyoñe me, a bi yeteya amu beduʼi bé.

⁶ Bia bese bi mbe bôt ba ndeñ ane mintômba, môt ase a mbe a tôñe zene jé émien; ve Nti a nga bo na ékobe jangan ése é bo mfaʼa wé.

⁷ Be nga kpweʼele nye, vʼa nga sili émiene si a a nji ke kui anyu dé avalʼane mone ntômba ba ke tyik, avalʼane mvumvuʼu ntômba ôsu ya ba ba tyiʼi wô mimvot a nji ke kui anyu dé.

⁸ Ntyiʼane mejô a évô bi nga vaa nye si nyô; e miaé wé été za a nga simesan ajô ya na a nga vaabane si bevevee amu angônda mbia mimboone ya bôte bam, mbe be nga yiane nyoñe meleb mete?

⁹ Be nga faʼa soñe jé ézezañe bebo mam abé , a jame nye baa minkukum, akôsa bo na a nji ke bo jam éziñ yʼévô, a teke jame ya meduʼan é nga yené anyu dé.

¹⁰ Nti a nga yene mvaé ya jalé nye a mintaé; éyoñ a maneya ve émien anʼétyiʼa mekua, a ye bi mvoñe bôt, a melu mé ma ye bo ayap, a nye a ye jalé nkômbane Nti.

¹¹ Eyoñe éndeñelaʼa ya nleme wé é maneya, mise mé ma ye jaé; amu ñyemane ba ye yeme nye, zôsôa mbo ésaé wom a ye kale bôt abui a beʼe bikobe biap.

¹² Ajô te ma ye ve nye abui bôt ane ngap; a ye kabane biôme ya nsa ba be mingungu amu a nga ve émien awu, a lañeban ézezañe ya benyoñe mekua, amu a nga beʼe abé yʼabui bôt, a yeʼelan ajô benyoñe mekua.