EZAYI 51 - Bible en langue Bulu

Bone bʼAbraham ba kôtéban

¹ Vôʼôlaʼane ma mia mia tôñe zôsôô , mia mia jeñe Nti! Mi fombaʼan akôm e vôm mi nga baaban, a mful ébé e vôm mi nga nyoñeban

² Fombaʼan Abraham, ésoo wônan, a Sara, nyô a nga biaé mia; éyoñ Abraham a mbe étam, me nga loone nye, mvus éte me nga botane nye a fôlô nye.

³ Avale te nde Nti a volô Sioñ nlem , a volô nleme ya biliʼi bié bise, a ye bo fé jé anʼ Eden, a nkôte si wé ane afube Nti. Mevak a mefôn bia ye boban ézezañe jé, minsamba beyia bia a jia besame fe avale da da.

⁴ A bôte bam tama vôʼôlane ma, a ayoñe bôte dam tame kee alo dôé be ma! Amu atiñ da ye so be ma, a ma ye kuli ntyiʼane mejô wom asu ya bo éfufube ya meyoñ .

⁵ Zôsôô wom a ntoo bebé, nyiane wom wo ye yené a mo mam ma ye tyiʼi meyoñ me bôte mejô; bikôte bi mañ bia ye tabe ma ndi, bia ye tabe wo wome ndi.

⁶ Betaʼane mis mfaʼa ya yôp, a fombaʼane si nyô mfaʼa ya si, amu yôp da ye man a nʼôtita, a si ja ye yômbô ane ngômesan, a e bôt be too été ba ye wu ane minlo; ve nyiane wom wo ye tabe nnôm éto a zôsôô wom a ye bo te vas.

⁷ Vôʼôlaʼane ma, mia mia yeme zôsôô , wo, ayoñe bôt e bili metiñe mam e nleme wé été! Te koon ôsame nkobô ya be bôte woñ nge fôʼôban amu ékpweʼele jap.

⁸ Amu kômebua a ye di be avalʼane ngômesan a fos ja ye mine be ane sut. Ve zôsôô wom a ye tabe nnôm éto a nyiane wom akekui miaé mi bôte mise.

Jia ya ndi nlem asu Israél a Yérusalém

⁹ Veʼe ôyo, veʼe ôyo! Tame jaé ngu a wo Nti! Veʼe ôyo ane melu kôa, melu ya miaé mi bôte betô! Ye sa wo ô nga bibi Ejipte, a lume ébibi te akoñ?

¹⁰ Ye sa wo ô nga vele mañ, mendime ya beta yee, ye sa wo ô nga tube zen e bidoʼo ya mañe na, ba ô nga kôté be lôt?

¹¹ Nalé ate ba Nti a nga kôté ba ye bulan, ba ye kui Sioñ a bia ya ndañan, a avaʼa ya nnôm éto da ye bo ékat e nlô wop. Mevak a mefôn bia ye bo bebé, ôlun a mintat bia ye tup.

¹² Mamien, mamiene ma volô mia minlem. Ô ne za wo ko ñwu ba loone môte woñ, e mon Adam, nyô asuʼulane dé e ne di bilok?

¹³ Ye wo ye vuane Nti, nyô a nga kôme wo, a ndamé yôp a bo mbôkaʼa ya si? Ye wo ye bo ve ko woñ éyoñ ése a môs ôse ôsu ayaa ya nyô a tibili wo, avalʼanʼéyoñ a kômesane na a jian? Ayaa ntibili e ne ñhe vé?

¹⁴ Anaʼana môt a yeme nda mbôk a ye bi afôla e ne ndam a ye bo te wu e beta ébé été a jôme ya di ja ye bo te jembane nye.

¹⁵ Me ne Nti, e Zambe wôé, nyô a fôʼô mañ a bo mendime mé na me duñ, jôé dé e ne na: Nti ya minsamba mewosan.

¹⁶ Ma futi mejô mam anyu dôé, a ma buti wo éjijine ya wo wom, éyoñ ma ndamé yôp a bo mbôkaʼa ya si, éyoñe ma jô Sioñ na: Ô nʼayoñe bôte dam!

¹⁷ Veʼe ôyo, veʼe ôyo! Kôlôʼô si a Yérusalém, wo ô nga nyu, élaé ya ayaa dé, é soʼo wo Nti, wo ô nga nyu a vele élaé ya ndumekan a kui je si!

¹⁸ Bone bese Yérusalém a nga biaé, teke wua a ne liti nye zen , bone bese a nga yale, teke wua a ne bi nye wo;

¹⁹ mame mana mebaé me kuiya be wo: za a ye wôʼô ajô dôé ôlun? Nsa, a bilik, zaé a nkpwaté mekôn, me ne za na me volô wo nlem ?

²⁰ Bobefame bôé nteʼan ne botok, be mbe be bôô e mefôla mese ya minjoñ, ane tite mimbiaé é biliya avot, be beʼe ayaa Nti, minkomekan mi Zambe wôé.

²¹ Ajô te vôʼôlôʼô jame di a éngôngole Yérusalém, nyô a sok, ve sa bilam!

²² Avale di nde Nti, e Zambe wôé, e Zambe wôé a kaman ajô ya ayoñe bôte dé na: tame yen, ma nyoñ élaé ndumekan e wo wôé été, mebukaʼa mʼélaé yʼayaa dam wo ye bo te beta nyu me!

²³ Ma ye futi élaé te e wo ya ba be nga bo na ô wôʼôlun, ba be nga jô jô wo na: vitibiʼi, wôna bia ye lôt! O nga bo mvuse jôé é funane si a njoñe na bôt be lôt.