EZAYI 5 - Bible en langue Bulu

Afube ndiʼi woone Nti e ne Israél

¹ Me tame yia mvôé jam jia ya nyô ma dañe nyeʼe a afube mindiʼi dé. Nyô ma dañe nyeʼe a nga bili afube mindiʼi mi woon e mfaʼa nkô ô nʼabui atek.

² A nga tyee si a vaa mekok , ndʼa nga bé ndiʼi woon wo dañe mvaé, Ezezañ, a nga lôñe nda benonô afup a faʼa ébé ba miate bibuma. A nga yange na mbamba bibuma bia ye wum été, ve viane teme na bibuma bi nʼabé mbie bi nga viane wum été.

³ Eyoñe ji, a bôt be too Yérusalém, A bôte ya Yuda, boʼone betyiʼi mejô e zañe bia afube mindiʼi dam.

⁴ Za jam afe e nga yiane beta boban e be afube mindiʼi dam nde me nji ke bo asu dé? Amu jé da bobane na Eyoñe me nga yange na e wum mbamba bibuma e nga viane wum bibuma bi nʼabé?

⁵ Eyoñe ji ma zu kate mia e jam ma ye bo afube mindiʼi dam: ma ye té nkaʼalé wo bômane de, A mimbame betit mia ye di de. Ma ye buʼu afôla éziñ ya mfin wo bômane de Nalé ba ye tibi de a mebo.

⁶ Ma ye bo de ne sangaññ, ba ye bo te sebe de nge bale de biyo a ndôé bia ye faa été, a ma ye kamane minkut mi bo te noo mveñ été.

⁷ Afube mindiʼi Nti ya minsamba mewosan e nji bo jôm éfe ve Nda bôte Israél. A bôte ya Yuda be ne Atôk a mbe a dañe nyeʼe. A nga yange nya ntyiʼane mejôô be nye, ve miñyône bingôngole bi bôt mmie mia viane wôʼé.

Biyoʼé biwôlô bi bôte ya Yuda

⁸ Ngoʼé ba ba beté nda fe e nyô be bili yôp, a beté fe afub afe e di be bili yôp, a kui ba mane nyoñe vôm ase A suʼulane tabe si ve beebe.

⁹ E ngana nti ya minsamba mewosan e é wôʼéya e melo mam été na: ézuʼu menda, ma me nʼanen a abeñ, ma ye bo bifut amu teke bôt ba tabe été.

¹⁰ Beéktar bʼafube mindiʼi belaa, ba ye bo te ve lita woon mewôm metan. Môt a bé kili nlisi ntet a ye kôane ve awôme da.

¹¹ Ngoʼé ba ba kune kôlô si a jeñe binyunyui bi ne ngu, éyoñe ngôʼé é ntoo abui, ba ve nyôl ayôñ a woon!

¹² Engombé a mvet, ngom a ndiñ, bia kobô e menda menyu map, ve be ne te fombô e jame Nti a bo, a teke yen e mame mo mé ma bo.

¹³ Ajô te ayoñe bôte dam da ye ke minkôm amu ñyemane momo. E bôte si é too be ndi ba ye wu zaé, A jama bôt a ye wu évé.

¹⁴ Eyoñe te ébé ja ye ndamé anyu ne ngeññ A vundi éngoñ; beta be bôt a bone be bôt ba ye sis été, a melitane mab a mevaʼa map.

¹⁵ Ajô te bôte bese ba yiane luu mesu si, a di mbuluk; e môt a ne mise bivéé a yiane sili mise mé si.

¹⁶ Nti yʼémo ése a ye liti anene dé éyoñ a ye telé nkômane mame wé e Zambe a nʼétyi A ye liti étyi jé éyoñ a ye beta telé nya ntyiʼane mejôô.

¹⁷ Bitoñe mintômba bia ye di valé ane vôme wob be wôʼô di, a biyem bi ne avem bia ye di e biliʼi ya vôm bi nga too beyeñ.

¹⁸ Ngoʼé e ba ba dutu abé si a minkole ya minsos a dutu fe ékobe si a minkole mi vagoñ.

¹⁹ A ba jô na: A boʼok avô, e jam a kômbô bo a boʼo de avô bi yen. Ôsimesane Nyô yʼIsraél a nʼétyi ô yenéʼé a ô bobaʼan nalé ate bia ye yeme wô.

²⁰ Ngoʼé bôt ba jô mvaé na abé a abé na mvaé! Ba veñesane dibi na e bo éfufup, a éfufube na e bo dibi. Jôm é nʼavoé ba nyoñe je ayô a ji é nʼayô ba nyoñe je avoé!

²¹ Ngoʼé ba ba yene bebiene na be ne fek, a tyiʼi bebiene na be ne mintyetyeñ!

²² Ngoʼé e bôt be ne mimbene ya menyu a bemedañ ya mbundane bilam.

²³ Ba kale e môt a yiane ku amu tañ a bene ve môt a ne te bijô mekabe mé.

²⁴ Ajô te, aval ane nduan ja diʼi mimbop, a aval ane bikumba bi fôn bia jañ e nkabaʼa nduan été nalé ate ba ye boé ataté minkañ, a e same jab ja ye yele ane mbuluk, amu be nga bene ñyeʼelane Nti ya minsamba mewosan, a be nga biasé nkobô Nyô ya Israél a nʼétyi.

Ayaa Nti

²⁵ Ajô te ayaa Nti da yôñ e be bôte bé, a same wo wé na a bôme be, Minkôl mia fôʼôban, a mimbime miab mia funane mbuan ô ne minjoñe yôp. Vʼakôsa bo mam mete mese, ayaa dé e nji bulane mvus a e wo wé ô ngenane nsaman.

²⁶ A bete nlinga asu ayoñ e nʼôyap, a loone de a éloñ é soʼo mekuʼu ya si, tame yen ane da bo avô a da jiʼa zu.

²⁷ Teke wua ya bôte bé a ne nteʼan, teke wua yʼété a kolé ôbak, teke wua a ndeñ nge ke ôyo, meses me tii be mengeteñ me ne teke kulan, a minkole besilefase miab teke téé.

²⁸ Mekoñ mʼélaé mé me ne njeban, bilaé bié bise bi ne nkolan, biboʼos ya bikabela bié bi ne ane mekok , minka ya bevagoñe bé ki ane ôlende.

²⁹ Mbamane wé ô ne wu ngale ngbwengbwem, ngale ngbwengbwem ate a bam ane bitoñ bengbwengbwem, a bôm a bi jôme jé a yiane bi a kee je, teke jôm é ne wôlé nye je.

³⁰ Ve môs ôte, ba ye bame nye, mvam éte é funaʼane éduñe mañ. Ba ye fombô mfaʼa ya si a yene dibi a ôlun, afibe nkut da ye bo éfufube naé na é bo dibi.