EZAYI 44 - Bible en langue Bulu

Nti étam a ne Zambe

¹ Vʼéyoñe ji, vôʼôlôʼô a Yakob, mbo ésaé wom. A Israél nyô me nga top!

² Avale di nde Nti, nyô a nga kôme wo, Nyô a nga mé wo aso abialé dôé, nyô a nʼésukaʼa jôé a jô na: te ko woñ, a mbo ésaé wom Yakob, Yésurum, nyô me nga top.

³ Amu ma ye sôé nyô a wôʼô évé mendim a atôñe mendim e si é ne nkôte yôp; ma ye sôé Nsisime wom e mvoñe bôte jôé, a ébotane jam e be bone bôé.

⁴ Ba ye faa ézezañe mbamba ôbut été aval ane bone bilé ya mfôm asôé.

⁵ Wua a ye jô na: Me ne nyô Nti nyô mbok a ye lobane jôé Yakob, mfe a ye tili akule wo wé été na: me ne jôme Nti; a a ye tabe jôé Israél ndi.

Zambe a bulane ve bôte bé étôtoʼo jap

⁶ Avale di nde Nti, njô bôt Israél, Nyô a kôté nye, Nti ya minsamba mewosan a jô na: me ne môt ôsu a nyô a suʼulan, Zambe mfe a nji bo ve ma.

⁷ Za a ne kobô avalʼane ma? A tame kate de a liti ma de! Ataté éyoñe me nga té bôt melu mvus, a tame kat e mam ma ye boban, a kate fe ma ma ye zu!

⁸ Te fôʼôban, a te koone woñ. Ye me nji bo wo na ô wôʼô de, a kate wo de aso ayap? Ye mi nji bo ma bengaa yʼété? Nge ô vaa ma, ye zambe mfe a ne? E ne foʼo bebela na te kʼakôm éziñ e né, me dimiʼi de.

⁹ Ba ba mé azezambe, bese be ne ve momo, biveʼela ba jeñ bi ne teke mfi. Bengaa babe bebien, be nji yene jôm, a, asu ôsone viap, be nji yeme jôm!

¹⁰ Za a tameya mé ôzezambe, nge nyemen ngunemelan asu njembane mfi?

¹¹ Tame yen ane bebuni bé bese ba woban ôson, bebaa biôm be ne ve bôt! Be sulaʼane bese a tebʼasu dam: ba ye fôʼôban a woban ôsone bese nsamba.

¹² Nlui étyé a lui ôvôn, a tulan vie e metyeʼe me nduan été, a nga mé vie a vamak. a bo vie ésaé a wo ô bili ngu, ve nge a tabe te di, ngule jé ve man. Nge a nyu mendim, a ye tek.

¹³ Mbaa bilé a limi nko, a mane kañe jôm a kômbô ba a nkôs, a nga tyiʼi je a njo, yaa a kañe je a kompa, a ve je éveʼela môt, étôtoʼo môta binam, ane é ne nguleya tabe nda zambe,

¹⁴ ane be ne tyiʼi besédre asu duma dé. Môt a nyoñ ôkôʼa a tôm, e bilé yʼafan, a kômbô na bi bo ngul asu dé, môt a bé élé ba loone péñ, ve mveñ nje ja bo na é yaé.

¹⁵ Asu môt, bilé bite bi ne njaʼa ba diʼi nduan: a nyoñe je asu ya wobane nduan, a boʼé je nduan a yame bidi été, vʼa belane fe njaʼa éte asu ya ba ôzezambe, a nga kañe fe wô, a bo njaʼa éte ngunemelan , a nga kute fe je meboñe si,

¹⁶ a nyoñ éfase ya njaʼa éte, a nga diʼi je nduan, éyoñe te fe a beté tit a ye di été yôp: a yañ nyañane tite wé, a nga di a jaé; a nga wobane fe nduan a jôʼô na: aaa! Aaa! Ma wobane nduan, me lôô évele nkabaʼa!

¹⁷ Abime da buk a nga kôm ôzezambe, ngunemelane jé, a nga kute meboñe si a kañe je, a nga yeʼelane je a jôʼô na: kôtéʼé ma amu wo ô ne zambe wom.

¹⁸ Be ne teke wôk, be ne teke yeme yemelan, amu bikabak bi ne be mis abui na be bo te yen, minleme miap mi ne fe nalé na be bo te fas!

¹⁹ Teke môt, e nleme wé été, a bulane mvuse na a wôk a fas a jôʼô na: me maneya diʼi éfase njaʼa e nduan, me maneya yame bidi e maʼa yôp, ma yame tit a di je, njaʼa ja liʼi me nga bo je jôm ôson, ma ye fe kôme kute meboñe si asu aboñ élé!

²⁰ Môt a kôme kabetan asup nleme wé ô duʼubaneya, wo jañele nye fé; a ye bo te kôtéban! Vʼa ye fe kate jô na: jôme me bili mo ji, ye é se meduʼane nga?

²¹ A Yakob, simesaʼan e jame di, a Israél ô ne mbo ésaé wom, me nga mé wo ane mbo ésaé asu dam; wo, a Israél wo ye bo te ve ma ôsone nyô;

²² ane nkut a ane ôtita me fimiya abé dôé a bikobe biôé; bulaʼane be ma amu me kôtéya wo.

²³ A yôp, kute fas, amu Nti a boya; mia bidoʼo ya si, loñan ayenga! Mia beta minkô, kutane fas! Nalé fe mia mefan a bilé bienan bise! Amu Nti a kôtéya Yakob, a kulaneya duma dé e Israél été.

²⁴ Avale di nde Nti nyô a kôté wo, nyô a nga mé wo aso abialé dôé a jô na: ma, Nti, ma bo mam mese, ma étam ma same yôp, mamiene fe ma ndamé si.

²⁵ A bo mendem me ne minsos momo; a bo mimvimviʼi na mi soʼo mekut. A bo mimfefeʼe na mi bulane mvus a kôñelane ñyemane wob jôme ya te fek.

²⁶ A yemete nkobô mbo ésaé wé a tôé mame minlômane mié mia taté kat. A jô ajô Yérusalém na: bôt ba ye beta tabʼété, a ajô bitisone ya Yuda na: ba ye beta lôñe bie. A jôm é ntoo bilik, ma ye bo je na é beta bo nya jômô.

²⁷ Ma jô mendim me nʼédoʼo na: veleʼe, ma ye vele asôé dôé.

²⁸ Ma loone Sirus na: mbaʼale mintômba wom! A ye jalé minkômbane miam mise. A ye jô ajô Yérusaleme na: be betaʼa lôñe nye! A ajô nda Zambe na: be betaʼa bo mbôkaʼa yʼété.