EZAYI 43 - Bible en langue Bulu

Nti étam nye a kôté Israél

¹ Avale di nde Nti, nyô a nga té wo a Yakob! Nyô a nga kôme wo a Israél! A jô éyoñe jina na: te ko woñ amu me kôtéya wo. Me looneya wo a jôé dôé: ô ntoo éñwom.

² Nge wo lôt e mendim été, ma ye tabe be wo, nge wo dañ asôé e nʼanen, da ye bo te yandane wo yôp; nge wo wulu e nduan été, wo ye bo te dik, a nkabaʼa nduan wo ye bo te mane tume wo.

³ Amu me ne Nti, e Zambe wôé Nyô yʼIsraél a nʼétyi, nkôté wôé; ma vʼEjipte asu ngôtô jôé, Etiôpi a Séba e señe jôé.

⁴ Amu ô ne anen e mise mam, amu ô bili ésemé a amu ma nyeʼe wo, nde ma ve bôt e señe jôé, a meyoñ me bôt asu ényiñe jôé.

⁵ Te ko woñ, amu me ne be wo; Ma ye soo mvoñe bôte jôé mfaʼa jôp da tôô, a ma kôane wo aso jôp da dim.

⁶ Ma ye jô akôé na: Keʼe ma! A nké na: Te bi! Boʼo bobefame bame na be so ôyap a bobebinga bame na be so akuʼu si,

⁷ ba bese be beʼe jôé dam, ba bese me nga té, me nga mé a me nga kôme na be liti duma dam.

⁸ Be kuliʼi ayoñe bôt e ne ndim atan, a too ke na be beʼe mis, nalé fe mindôndok, a too ke na mi beʼe melo.

⁹ Meyoñ me bôte mese me ne te yeme Zambe me sulaʼane vôme wua a ba bôtô a kôʼane fe vôme wua. Za ya be be a nga kate foé ya mam mete? Bevé be nga yeʼele bia mam yʼôsu me nga boban? Be liti na ba kobô bebela; bi vôʼôlô be a bi bo nguleya jô na: mia bele!

¹⁰ Mia mi ne bengaa bam, nalé Nti a jô, mia a mbo ésaé wom me nga top, nalé ate mia ye yeme nye, mia ye buni ma a yeme na: Ma le; Zambe mfe a nji bo ma ôsu, a mfe aa ye ke bo ma mvus

¹¹ ve mamiene foʼo me ne Nti, nge ô vaa ma, nyii bôte mfe a nji bo.

¹² Ma me nga kate foé, ma me nga nyii a ma me nga kuli mejô; saake ôzezambe bikuu, be ne koone wô e be mia. Ajô te ñhe mi ne bengaa bam, nalé Nti a jô; ma me ne Zambe.

¹³ Me ne nye, te na môs ô téban, a teke jôm é ne kôté môt e wo wom été; nge me jô na ma bo ana, za a ne tebe ngame yat?

Ma lôme môt éziñ asu denan

¹⁴ Avale di nde, Nti a jô, nyô a kôté wo, nyô yʼIsraél a nʼétyi na: asu denan nde me nga lôme môt a wosane Babilôn. Ma ye bo na be mane kubu ôsôé, bôte ba tube bete bese, be Kaldééñ bete be too besitima mevaʼa map été.

¹⁵ Me ne Nti, Eñwônan a nʼétyi, njô a nga té Israél njô bôte wônan.

¹⁶ Avale di nde Nti a kobô, nyô a nga limi njoñ e mañ été, a zen e mendim me ne ngul été,

¹⁷ Nyô a nga sôʼôlô bevagoñ a bikabela, bi wulu e fé été, nalé fe minkane bita a biwôlô bi bôte biabe ya mewosan; minkane bita mite mi nga mane ku, te fe nguleya beta kôlô si. Ve mane dim a dik ane nsañe lambe, a jôʼô na:

¹⁸ te simesane mam yʼôsu me nga boban, nge semé nnôme jam.

¹⁹ Mi lôô ma zu bo mfefé jam, nde le da zu, ngaa mia ye yeme de? Ye mia ye foʼo yeme de? Ma ye tube zen e nkôte si, a bôé asôé e si é nʼayet.

²⁰ Betite ya fé ba ye kañe ma, bitumba a bʼéngutu, amu mveane ma ye ve mendim e nkôte si, a amu asôé ma ye bôôé e si é nʼayet, asu ya ve ayoñe bôte dam me nga top mendime ya nyu.

²¹ Ayoñe bôt me nga bo asu dam da ye yia ma bia yʼékañaʼa.

²² Ve sa ke ma ô nga loon, a Yakob! Amu ô nga kate ma, a Israél!

²³ Ô nji ve ma bone mintômba bôé mveane ba diʼi ngumba, bityiʼa metunaʼa biôé bi nji bo asu duma dam; me nji yemete wo na ô bo ma mimvean, nge ve wo some nyô ajô ôtu.

²⁴ O nji kuse nkaé ô nʼétyitaʼa be ma a moné, a ô nji ve mʼabume nlem a mevoñe ya bityiʼa biôé; vʼô nga tindi ma éto ôlo été a mboon abé wôé. ô nga teʼe ma nyô a bikobe biôé.

²⁵ Ve mamiene foʼo ma tyame mbia mimboone miôé, amu ma nyeʼe mamien, a ma ye bo te beta simesan abé dôé.

²⁶ Baʼalaʼan e jam wo ve ma de bijô, bia bebaé e ntame sañetane jame te, tame tote mam ma ve wo mekabe

²⁷ Esoo wôé yʼôsu a nga bo abé , a bebii ntume bôé be nga bene njôane wom,

²⁸ ajô te me nga bo bivete ya vôm a nʼétyi ane zesé bôt, me nga kee Yakob e njañ a Israél e metaa été.