EZAYI 42 - Bible en langue Bulu

Mbo ésaé Nti

¹ Mi lôô mbo ésaé wom nye ma suk, ntobane wom nye nleme wom wo yene mvaé: me futiya nsisime wom e be nye. a ye kulane meyoñ me ne te yeme Zambe nya ntyiʼane mejô.

² A ye bo te yôtan, te bete tyiñe yôp nge bo na é wôʼé e minjoñ.

³ A ye bo te té nkaé ô ne ntusane si, nge dime nsañe lambe wo nyoñ; a ye liti ntyiʼane mejô avale bebela a né.

⁴ A ye bo te tek nge bo meveñ, vʼakekui a teléya nya ntyiʼane mejô e si nyô, a bikôte bi mañ bia ye yange metiñe mé.

⁵ Avale di nde Zambe a kobô, nyô a ne Nti, nyô a nga té yôp a ndamé je, nyô a limiti si a biôm bia faa été, nyô a ve ba be too si éte mvebe, a ényiñ e be ba ba wulu été.

⁶ Ma me ne Nti, me nga loone wo avale da yian, me nga bi wo e wo, me nga nañele wo na ô bo ékasaʼa yʼélat e zañe jam a ngum si nyô ése, a na ô bo éfufube ya meyoñ me ne te yeme Zambe,

⁷ Asu ya kui mindindime mis, asu ya bo na mimbôk mi kôlô menda mimbôk, a bo bôt be too dibi été na be kôlô afanefane mevôm.

⁸ Me ne Nti, éyôlé jame le; a ma ye bo te ve môte mfe duma dam. nge ve bengunemelan ékañaʼa ja yiane ma.

⁹ Mi lôô na mam me nga taté kui me maneya tôéban, a éyoñe ji ma kate mia e mame ma bobane mimfefé, a ma kate mia me te na me za bobaʼan.

Mfefé jia

¹⁰ Yiʼane Nti mfefé jia, jia ya nkañan jé ataté akuʼu ya si nyô: mia mia wulu mañ, mia mintéan mise mi too ôyap.

¹¹ Nkôte si a bitisone bié bi beteʼe tyiñe yôp, nalé fe minlame Kédar a too! E bôte be too Séla be tôtaʼan ayenga! Ayenga mevak e yôtaʼan aso abôbône minkô!

¹² Be tame ve Nti duma, a be tame mialan ékañaʼa jé e bikôte bi mam!

¹³ Nti a so ane mben, a ne nkômesane ya wosan, ane môta bita, a bame ngule tyiñe bita, a soñe besiñe bé a dañe be.

¹⁴ Me tabeya évôl a ayap. Ma dib anyu, ma baʼa mamien; ma tat ane minga a kôʼôlô mie avale ma sañelan nde fe ma vebʼabuk.

¹⁵ Ma ye fimi beta minkô a bone minkô a ma ye mane kôtô biloʼo bise; ma veñesan asôé e nʼanen e bo bikôte bi mañ, a ma ye bo menjeñe mendime na me mane kôt.

¹⁶ Ma ye bo mindindime na mi wulu e zene mi mbe te yem, ma ye ke ma yaʼale mie a so zene mi mbe mi dimiʼi; ôsu viap ma ye veñesane dibi é bo éfufup, mevôm me nʼékotekot, me bo njeʼese, jame te ebien nde ma ye bo.

¹⁷ Ba ye bulane mvus a ôson wo ye bi be, e ne na: e ba bese ba tabe ndi e be bengunemelan, e ba ba jô ñyeman étyé na: mi ne bezambe bangan.

¹⁸ A mindôndok, vôʼôlaʼan! Mia mindindim fombaʼan a yen!

¹⁹ Za a ne ndindim, ye sa mbo ésaé wom, a ndôndok ane mbeʼe mefoé wom ma lôm? Za a ne ndindim ane nyô a kooneya mvoʼé , ndindim ane mbo ésaé Nti?

²⁰ Ô maneya yen abui mam, vʼô nji tabe de ntye; be maneya kuʼi wo melo, vʼô nji wôk.

²¹ Nti a nga kômbô ve metiñ anen, a mvaé, amu zôsôô wé.

²² Ve bana be ne e ba bôt be nga mane sa biôm a liʼi be mo minsoé, be nga bi be ôlam e beta bibé été a be solô e menda mimbôʼô été be ntoo mbilan a teke môt a nyii be, be ntoo mo minsoé, ve teke môt a jô na: bulaʼane bia be.

²³ Za ya be mia a ye kee alo e mame ma? Za a ye kômbô tabe me ntye ane a ye vôʼôlô melu ma zu?

²⁴ Za a nga kalane Yakob e be ba ba liʼi ba bevok mo minsoé, a kalan Israél e be ba ba sa? Ye saa Nti, nyô bi nga bo abé ? Be nji kômbô wulu e mezene mé, a be nji ke vôʼôlô metiñe mé.

²⁵ Ajô te a nga sôé ayôñe yʼayaa dé njete ya mewosane mé e nyôl Israél. Bita bite bi nga sôé nye nduane nyô bifase bise; a a nji fe beta kômbô yeme jôm éziñ; a nga mane diʼi Israél vʼIsraél a nji nyoñe jame te anene mfaʼa wé.