EZAYI 39 - Bible en langue Bulu

Ezékias a nyoñ e bôte ba so Babilôn

¹ Melu mete Mérôdak-Baladan, e mone Baladan, njô bôte ya Babilôn, a nga lôm Ezékias bekalate a bifaʼé, amu a nga wôʼô na Ezékias a nga kon ve a beteya bo mvoʼé .

² Ajô te Ezékias a nga vaʼa nsoone bekatefoé a liti be mevôm a naane bidima bi biôme bié: Argent, or, bityitaʼa, mbon ô ne mbamba menyum, mengômesane bityé a jôm ése é mbe binaan akume bié; teke jôm Ezékias a nga bo te liti be ataté nda jé a kui étabaʼa jé ése.

³ Nde nkulu mejô Ezayi a nga zu koone njô bôt Ezékias a jô nye na: Bôte bete ba te jô aya be soʼo ke vé? Ezékias a nga yalane na: Ba te zu be ma be soʼo si é nʼôyap, e Babilôn.

⁴ Ezayi nye na: Jé ba te yen e nda jôé? Ezékias nye na: Ba te yene jôm ése é ne nda jam. Teke jôme ya akume dam ma te bo te liti be.

⁵ Ane Ezayi a nga jô Ezékias na: Vôʼôlôʼô ajô Nti ya minsamba mewosan:

⁶ éyoñ ja zu nje jôm ése é ne nda jôé nje bʼésoo be nga tôkan a kui e môse wu ja keeban e Babilôn: teke jôm ja ye liʼi été, nalé Nti a jô.

⁷ Ba ye kee abui ya bobefame bôé, abui ya ba be ne nsoone be wo, mbe ô nga biaé: ba ye bo miak e nda njô bôte ya Babilôn.

⁸ Ezékias a nga jô Ezayi na: Ajô Nti wo te tot e ne mvaé. Amu a mbe a jôʼô na: Éyoñe me vee mvoʼé ja ye bo, nalé fe teke jam da tyelé ma nleme yôp.