EZAYI 34 - Bible en langue Bulu

Biliʼi bi Edom a mbulan Israél

¹ Zaʼane bebé, mia meyoñe bikuu mi wôk, mi vôʼôlô mia meyoñe me bôt. Si é vôʼôlôʼô, ébien a biôme bise bia jalé je, si nyô a biôme bise bia faa été;

² amu ayaa Nti da ye jimbi meyoñe mese, ayoʼo dé da ye jimbi nkane bita wob ôse. Be ntoo ntiñetane ya jañ, a veya be be wôéban.

³ Mimbime miab mia ye wuabane fé ne ntyamela tyamelan. A mimbime miab mia ye kuli mbia ényum. Metyi mab ma ye lôt e minkô ane atôñe mendim.

⁴ Ateté ya yôb da ye mane nyemé, a ba ye vule yôb ane kalate; ateté ese da ku si ane minkôte mi akaé mi élé woon nge figié.

⁵ Amu nkpwaté mekône wom wo yené e yôb été wô le wo vibane bôte yʼEdome yôp, ayoñe bôte Nti a nga ve mekua ya mane jañ ese.

⁶ Nkpwaté mekône Nti ô jaéya a metyi, avoñ é ne mmialan été, ane metyi beyôme mintômba a beyôme bikela, anʼavoñe ya bikeʼe biap. E Bôtsra, nlô tison, Nti a bo ntyiʼane biyem e sii Edom.

⁷ Benyat, beyôme benyak be ne menen a ba be ne ôbe abim ba ye ku éyoñe jia: si jab ja ye nyu metyi, a mbuluʼu yʼété wo ye jaé a avoñ.

⁸ Mfaʼa Nti, môs ôte ô ne wu yʼakunaʼa, môse mesôñ amu ajô Siôn.

⁹ Atôñe mendime yʼEdom da ye veñesane meyemete mʼôtui a mbuluʼu ki nduan awusa. Si éte ja ye suʼulane meyemete mʼotui ma yôñ,

¹⁰ mme ma ye bo te dim, toʼo na a alu nge a amôs, ôtita via ye bet teke tebe: si éte ja ye bo bilik ataté miaé wu a kui wu ôvok, teke môt a ye beta lôt été môs éziñ.

¹¹ Ngôkoé a mvep bia ye nyoñe je. Akuñ a éngbwañ bia ye tabʼété Nti a ye limi nkole momo été yôp, nalé fe lévo nzametaʼan.

¹² Benya bôtô baa ye ke fe bo asu ya tobe njô bôt, bivete bise bia ye man.

¹³ Bisaé biyo bia ye faa e menda bejô bôt été, sas a ndôé e aleme yʼété. Ja ye bo étabaʼa bitumba a nseñe bʼéngutu.

¹⁴ Bisingi mefan bia ye tôbane mekamenyañ été, a vôm ate beyôm bikela yʼafan ba ye tôban! Nne mbia nsisim yʼalu ba loone lilit a ye tabe valé, a yen émien vôme ya woʼon.

¹⁵ Vôm ate nyo ja ye bo jenga dé, ja ye biaé a bôʼôbô metyi mé yôp; a a ye bo na me tyek abume si dé. Vôm ate abam da ye sulane mbam.

¹⁶ Jeñan e kalate Nti a lañe ntilane na: tekʼôbame wua yʼété wo ye jemban, teke wua yʼété wo ye kolôbô wu ôvoʼo nlem , amu anyu Nti nde e veya a bendé de, nsisime wé ñwô ô maneya kôane de.

¹⁷ Emien a maneya tyik e jam da ye bo ôbam ôse yʼété, a wo wé ñwô ô nga kabe de si a nlimane nko. Da ye bi je nnôm éto a tabʼété a kui miaé mise.