EZAYI 31 - Bible en langue Bulu

Nti a wosan élat e zañe Israél a Ejipte

¹ Ngoʼo ba ba lumbu Ejipte asu ya bi mvolan, mbe ba yeʼebe e bikabela a tabe bevagoñ ndi amu abui dap, a tabe fe bewulu bikabela ndi, amu ba dañe ngu, ve be nji fombô mfaʼa Nyô yʼIsraél a nʼétyi a né, a be nji jeñe Nti!

² Ve nye fe, a ne fek, asu ya zuu bidim; a ne te bulane mejô mé mvus; a wosane nda bôte bebo abé , a wosane fe mvolane ya ba ba bo ékotekote ntyiʼane mejô.

³ Mon Ejiptieñ a ne môt sa ñhe ôzezambe; bikabela bié bi ne minsôn, sa ñhe nsisim . Eyoñe Nti a ye same wo wé, Nyô a ve mvolan a ye kolé ôbak, Nyô ba volô a ye ku, a bese ba ye wu nsamba wua.

Nti étam nye a kôté Yérusalém

⁴ Amu avale di nde Nti a kobôya ma na: avale ngbwengbwem, aval étoñe ngbwengbwem ja bam e jôm a te bi yôp, a akôsa bo bebaʼale mintômba mfulaʼan be ne nloone ya wosane je, é nji ko metyiñe mabe woñ, nge teʼebe amu tañe jap; avale te Nti ya minsamba mewosan a ye sis, asu ya wosan e beta nkôle Siôn, a e mone nkôle wé yôp.

⁵ Aval anon da tyiñelan e biyele biabe yôp avale te Nti ya minsamba mewosan a ye ndamé mbaʼalane wé a baʼale Yérusalém; a ye futi nye abume si a kôté nye, a ye kale a nyii nye.

⁶ Bulaʼan e be nyô mi nga dañe lume mvus, a bone bʼIsraél!

⁷ Nde môs ôte môt ase a ye wua bengunemelane be argent, a bengunemelane be or bé fé, e ba mo menan me nga mé asu denan,

⁸ a mon Asirieñ a ye ku e nkpwaté mekôn ô nji bo wu môte si, a nkpwaté mekôn ô ne wu môt wo ye mine nye; a ye tup ôsu ya nkpwaté mekôn, a bisoé bendômane bié bia ye saé bisaé biʼalo.

⁹ Nyô a ne akôme dé a ye mate a woñ, a bivete bié bia ye ko woñ ôsu ya nyungu, nalé Nti, nyô a bili nduan e Siôn a mbeʼe nduan e Yérusalém a jô.